09 ނޮވެމްބަރ 2025 - 20:33
މަސްތުވާތަކެތީގެ ބޮޑު މައްސަލައެއްގައި ކުރިން ހައްޔަރުކުރި މީހަކު އެފަދަ އެހެން މައްސަލައެއްގައި ހައްޔަރު ކުރުމުން ކްރިމިނަލް ކޯޓުން ދޫކޮށްލި މައްސަލަ އިސްތިއުނާފު ކުރަން ދައުލަތުން ހުށަހެޅުމުން އެ މައްސަލަ ހައި ކޯޓުން ބަލައިނުގަތުމަށް ނިންމައިފި އެވެ.
ސ. ހިތަދޫ ކޯޒީކޯނާ، އަލީ އަންވަރު މުހައްމަދު ހައްޔަރުކުރީ މަސްތުވާތަކެތީގެ އޮޕަރޭޝަނެއްގައި މިދިޔަ މަހު އެވެ. އޭނާއަކީ ރާއްޖެއަށް އީރާނުގެ ބޯޓަކުން ކުރިން އެތެރެކުރި 70 ކިލޯގެ މަސްތުވާތަކެތީގެ މައްސަލާގައި ވެސް 2019 ވަނަ އަހަރު ހައްޔަރުކުރި މީހެކެވެ.
އަލީ އަންވަރު މިދިޔަ މަހު ހައްޔަރު ކުރުމުން ކްރިމިނަލް ކޯޓުން ވަނީ އޭނާ ދޫކޮށްލައިފަ އެވެ. އަދި އޭނާ ދޫކޮށްލުމުން ސްރީ ލަންކާ އަށް ދިއުމާ އެކު، އެ ގައުމަށް އެތެރެވިޔަ ނުދީ އަނބުރާ ފޮނުވާލުމުން ދިވެހި ފުލުހުން ވަނީ އޭނާ އަލުން ހައްޔަރުކޮށްފަ އެވެ.
އަލީ އަންވަރު ދޫކޮށްލި މައްސަލަ އިސްތިއުނާފް ކުރަން ދައުލަތުން ހުށަހެޅި މައްސަލަ ބަލައިނުގަތުމަށް ހައި ކޯޓުން މިއަދު ނިންމީ ކްރިމިނަލް ކޯޓުގެ ނިންމުން ގާނޫނާ ހިލާފުވާ ގޮތެއް ދައުލަތަށް ބުނެދެވިފައި ނުވާތީ ކަމަށް އެ ކޯޓުން ނިންމުމުގައިވެ އެވެ.
އޭނާ ދޫކޮށްލި މައްސަލާގެ އިސްތިއުނާފް ބަލައިނުގަތުމަށް ނިންމި ނަމަވެސް، އޭނާ މިހާރު ހުރީ ކްރިމިނަލް ކޯޓުން ފަހުން ނެރުނު އަމުރެއްގެ ދަށުން ބަންދުގަ އެވެ.