09 ނޮވެމްބަރ 2025 - 16:16
ހަނިމާދޫ އިންޓަނޭޝަނަލް އެެއާޕޯޓް އަލުން ތަރައްގީކޮށް، ކުލަގަދަ ހަފުލާއަކާ އެކު މިރޭ ހުޅުވަން ތައްޔާރުވެއްޖެ އެވެ.
ހަނިމާދޫ އެއާޕޯޓުގެ އާ ޓާމިނަލް ރަސްމީކޮށް ހުޅުވުމަށް މިރޭ ބާއްވާ ބޮޑު ރަސްމިއްޔާތު ޝަރަފުވެރި ކޮށްދެއްވާނީ ރައީސް ޑރ. މުހައްމަދު މުއިއްޒުގެ ދެކަނބަލުންނެވެ.
އެ ރަސްމިއްޔާތުގައި އިންޑިއާގެ ބޮޑުވަޒީރު ނަރެންދުރަ މޯދީގެ ހާއްސަ މަންދޫބު ސިވިލް އޭވިއޭޝަން މިނިސްޓަރު ކިންޖަރަޕޫ ރާމް މޯހަން ނައިޑޫ އާއި ދެ ސަރުކާރުގެ އިސް އޮފިޝަލުން ބައިވެރިވެވަޑައިގަންނަވާނެ އެވެ.
އެ ރަސްމިއްޔާތު ފެށުމުގެ ގޮތުން ހަނިމާދޫ އެއާޕޯޓަށް ފުރަތަމަ ފަހަރަށް އޭ-320 މަރުކާގެ މަތިންދާބޯޓެއް މިރޭ 7:00 ގައި ޖައްސާނެ އެވެ. އެއީ ގައުމީ އެއާލައިން، މޯލްޑިވިއަންގެ ބޯޓެކެވެ. އަދި މިރޭގެ 8:30 އިން ފެށިގެން ތިން މިނިޓަށް ހަވާއަރުވާނެ އެވެ.
އެމްއޭސީއެލް އިން ހިންގާ ހަނިމާދޫ އެއާޕޯޓު އާ ޓާމިނަލްގެ ކުރިމަތީގައި ބާއްވާ އެ ރަސްމިއްޔާތަށް ރައީސް މުއިއްޒުގެ ދެކަނބަލުންނާއި މިރޭގެ އެހެން މެހުމާނުންނަށް މަރުހަބާ ކިޔުމަށް ސަގާފީ އައިޓަމެއް ހުށަހަޅާނެ އެވެ.
ހަނިމާދޫ ކައުންސިލްގެ ރައީސް އަބްދުއްސައްތާރު ހަސަން "މިހާރު" އަށް މިއަދު ވިދާޅުވީ މިރޭގެ ރަސްމިއްޔާތުގައި ހަނިމާދު އާއި ކައިރި އެހެން ރަށްރަށުން މެހުމާނުންނަށް ޖާފަތް އަރުވާ ގޮތަށް ވެސް ހަމަޖެހިފައިވާ ކަމަށެވެ. އެ ރަށުން އެކަނި ވެސް 43 ޖާފަތް އަރުވާނެ ކަމަށް އޭނާ ވިދާޅުވި އެވެ.
އެ ރަސްމިއްޔާތަށް ޖާފަތް ގެންދާ އެހެން ރަށްރަށުގެ ތެރޭގައި އެ އަތޮޅު ކުޅުދުއްފުއްޓާއި މަކުނުދު އާއި ކުރިނބި އާއި ނެއްލައިދު އާއި ހިރިމަރަދޫ ވެސް ހިމެނެ އެވެ.
ކައުންސިލް ރައީސް ވިދާޅުވީ އެއާޕޯޓު އަލުން ހުޅުވުމަށް ތައްޔާރުވުމުގެ ގޮތުން އެމްއޭސީއެލް އިން އެދިގެން މިދިޔަ ތިން ދުވަހު އެ ރަށުގެ ރައްޔިތުން ނުކުމެ ވަނީ އެއާޕޯޓުގެ ޓާމިނަލްގެ އެެތެރެ އާއި ބޭރުގެ ސަރަހައްދު ވެސް ސާފުކޮށްފަ އެވެ. މިހާރު ވެސް އެ މަސައްކަތުގައި ރައްޔިތުން އެބައުޅޭ ކަމަށް އޭނާ ވިދާޅުވި އެވެ.
"ރަށުގެ ރައްޔިތުން ގުޅިގެން ވަރަށް ފޯރީގައި މި ރަސްމިއްޔާތަށް މި ތައްޔާރުވީ،" އޭނާ ވިދާޅުވި އެވެ.
އިންޑިއާގެ ލޯނު އެހީގައި ހަދަމުން އަންނަ ހަނިމާދޫ އެއާޕޯޓަކީ މިވަގުތު ރާއްޖޭގައި ހިންގާ އެއާޕޯޓް ތަރައްގީކުރުމުގެ އެންމެ ބިޔަ އެއް މަޝްރޫއު އެވެ. އެ އެއާޕޯޓުގެ އާ ޓާމިނަލް މިދިޔަ މަހުން ފެށިގެން އަންނަނީ ބޭނުންކުރަމުންނެވެ.
އެ އެއާޕޯޓު ތަރައްގީކޮށް، ރަސްމީކޮށް ހުޅުވުމަށް މިރޭ ބާއްވާ ރަސްމިއްޔާތުގައި ރައީސް މުއިއްޒާއި ސަރުކާރުގެ އިސްވެރިން ވެސް ބައިވެރިވެވަޑައިގަންނަވާނެ އެވެ.
ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އިންޑިއާގެ ކަލްޕަތަރު ޕްރޮޖެކްޓްސްއާ އެ އެއާޕޯޓްގެ މަސައްކަތް ހަވާލުކުރީ ސެޕްޓެމްބަރު، 2022 ގަ އެވެ.
އެ މަޝްރޫއުގެ ދަށުން ހަނިމާދޫ އެއާޕޯޓުގައި 2.7 ކިލޯމީޓާރުގެ އާ ރަންވޭއަކާއި އަހަރަކު 1.3 މިލިއަން ފަސިންޖަރުންނަށް ހިދުމަތް ދެވޭ އާ ޓާމިނަލަކާއި އާ އެއާޓްރެފިކް ކޮންޓްރޯލް ޓަވަރަކާއި ކާގޯ އިމާރާތެއްގެ އިތުރުން ފިއުލް ފާމެއް ހެދުމުގެ މަސައްކަތް ވެސް ދަނީ ކުރަމުންނެވެ.
އެންމެ ބޮޑެތި ބޯޓުތައް ޖެއްސޭ ވަރަށް ތަރައްގީ ކޮށްފައިވާ ރަންވޭގެ މަސައްކަތް މިދިޔަ އަހަރު ވަނީ ނިމިފަ އެވެ.
އިންޑިއާގެ އެގްޒިމް ބޭންކުން ދީފައިވާ 800 މިލިއަން ޑޮލަރުގެ ލައިން އޮފް ކްރެޑިޓްގެ ދަށުން އެ މަޝްރޫއަށް 136 މިލިއަން ޑޮލަރު (ދެ ބިލިއަން ރުފިޔާ) ހަރަދުކުރެ އެވެ.