08 ނޮވެމްބަރ 2025 - 20:10
ތޫނު ސިކުނޑިތަކަކާއި މުރާލި އަތްތަކެއް އުފެދޭނީ ކެއިންބުއިމާއި ދިރިއުޅުމުގެ ރަނގަޅު އާދަތަކަށް މީހުން އަހުލުވެރިކޮށްގެން ކަމަށް ރައީސް ޑރ. މުހައްމަދު މުއިއްޒުގެ އަނބިކަނބަލުން ފަސްޓް ލޭޑީ ސާޖިދާ މުހައްމަދު މިއަދު ވިދާޅުވެއްޖެ އެވެ.
"ދުޅަހެޔޮ ދިރިއުޅުން، އުފާވެރި މުޖުތަމައު" މި ނަމުގައި ކުރިއަށް ގެންދާ ޕްރިވެންޓިވް ހެލްތުކެއާގެ ގައުމީ ކެމްޕެއިން ރަސްމީކޮށް ފަށަން ކ. ގުރައިދޫގައި ބޭއްވި ރަސްމިއްޔާތެއްގައި ފަސްޓް ލޭޑީ ވިދާޅުވީ ކެއިންބުއިމާއި ދިރިއުޅުމުގެ ރަނގަޅު އާދަތަކަށް އަހުލުވެރިވުމަކީ ދުޅަހެޔޮ އުފާވެރި ދިރިއުޅުމުގެ ތަޅުދަނޑި ކަމަށެވެ. ގައުމެއް ބިނާކުރުމުގައި ޕްރިވެންޓިވް ހެލްތުކެއާ އަށް އިސްކަން ދިނުމަކީ ކޮންމެހެން ކުރަން ޖެހޭ ކަމެއް ކަމަށް ވެސް އެ ކަމަނާ ވިދާޅުވި އެވެ.
"ގައުމެއް ބިނާކުރުމުގައި އެ ގައުމެއްގެ ސިއްހަތަށް މި ފަަދައިން އިސްކަން ދިނުމަކީ ކޮންމެހެން ކުރަން ޖެހޭ ކަމެއް. ތޫނު ސިކުނޑިތަކެއް، މުރާލި އަތްތަކެއް، ހީވާގި ކެރޭ ހުނަރުވެރިންތަކެއް އުފެދޭނީ އޭރުން،" ފަސްޓް ލޭޑީ ވިދާޅުވި އެވެ.
ކެއިންބުއިމާއި ދިރިއުޅުމުގެ ރަނގަޅު އާދަތަކަށް އަހުލުވެރިވެފައިވާ ގައުމެއްގައި އޮންނާނީ އުފާވެރިކަމާއި ހިތްފަސޭހަކަމާއި ތަހުޒީބާއި އުފެއްދުންތެރިކަން ކަމަށް ވެސް ފަސްޓް ލޭޑީ ވިދާޅުވި އެވެ.
ސާޖިދާ ފާހަގަކުރެއްވި ގޮތުގައި، ކެއިންބުއިމުގައި ރަނގަޅު އާދަތައް ގެންގުޅެން އިސްލާމްދީން ވެސް ބާރު އަޅަ އެވެ. ފުރިހަމަ މުސްލިމެއްގެ ދިރިއުޅުން ބިނާވެފައި އޮންނާނީ ހަރަކާތްތެރިކަމުގެ މައްޗަށް ކަމަށާއި ރޫހާނީ ސިއްހަތާއި ޖިސްމާނީ ސިއްހަތު އަދި ނަފްސާނީ ސިއްހަތުގެ މައްޗަށް ކަމަށް ވެސް އެކަމަނާ ވިދާޅުވި އެވެ.
"ދުޅަހެޔޮ ދިރިއުޅުން އުފާވެރި މުޖުތަމައު" ކެމްޕެއިނަކީ ދިރިއުޅުމުގެ ވައްޓަފާޅިއާއި ކެއިންބުއިމުގެ އާދަތަކުގެ ސަބަބުން ޖެހޭ ގައިންގަޔަނަށް ނާރާ ބަލިތައް ރާއްޖޭގައި އާއްމުވަމުންދާ ބަލިތަކުން މީހުން ރައްކާތެރިކޮށް، ރަނގަޅު އާދަތަކަށް އަހުލުވެރިކުރަން ހެލްތު ޕްރޮޓެކްޝަން އެެޖެންސީ (އެޗްޕީއޭ) އިސްނަގައިގެން މުޅި ރާއްޖޭގައި ކުރިއަށް ގެންދާ ކެމްޕެއިނެކެވެ.
އެ ދާއިރާއިން މީހުން ހޭލުންތެރިކުރަން އެންމެ ރަނގަޅަށް މަސައްކަތްކުރާ ފަރާތްތަކަށް އެ ކެމްޕެއިންގެ ދަށުން އެވޯޑެއް ދޭން ހަމަޖެހިފައިވާ ކަމަށް އެޗްޕީއޭއިން ބުންޏެވެ.
އެ އެވޯޑް ދޭ ކެޓަގަރީތަކުގެ ތެރޭގައި އެންމެ ރަނގަޅަށް މަސައްކަތްކުރާ ރަށަކަށް ދޭ "ދުޅަހެޔޮ ދިރިއުޅުން، އުފާވެރި މުޖުތަމައު، ރަށު އެވޯޑް" އާއި އެންމެ ރަނގަޅަށް މަސައްކަތްކުރާ ސްކޫލަކަށް ދޭ "ދުޅަހެޔޮ ދިރިއުޅުން، އުފާވެރި މުޖުތަމައު. އުފާވެރި ދިރިއުޅުން ސްކޫލް އެވޯޑް" އަދި އެންމެ ރަނގަޅަށް މަސައްކަތްކުރާ ޖަމިއްޔާއަކަށް ދޭ "ދުޅަހެޔޮ ދިރިއުޅުން، އުފާވެރި މުޖުތަމައު ޖަމިއްޔާ އެވޯޑް" ހިމެނެ އެވެ.