06 ނޮވެމްބަރ 2025 - 12:25
ތަރައްގީއާ ގުޅޭ 206 މަޝްރޫއެއްގައި ސަރުކާރުން މިއަދު ރާއްޖޭގެ އަމިއްލަ ކުންފުުނިތަކާ އެކު ސޮއިކޮށް ރެކޯޑެއް ގާއިމް ކޮށްފައިވާއިރު، މަސައްކަތުގެ އުޖޫރައަށް ވާ ފައިސާ ދިނުމުގައި އެއްވެސް މައްސަލައެއް ނުޖެހޭނެ ކަމަށާއި އަމަލީ މަސައްކަތް މިއަދުން ފެށިގެން 21 ވަރަކަށް ދުވަހުގެ ތެރޭގައި ފަށަން ޖެހޭ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ބާސެލޯ ނަސަންދުރާގައި ބޭއްވި ހާއްސަ ހަފުލާގައި ވަނީ 206 މަޝްރޫއުއެއް ކޮންޓްރެކްޓަ ފައިނޭންސްގެ އުސޫލުގެ ދަށުން ދިވެހި ކުންފުނިތަކާ މިއަދު ހަވާލުކޮށްފަ އެވެ.
އެ ރަސްމިއްޔާތުގައި ރައީސް މުއިއްޒު ވިދާޅުވީ، ތަފާތު 53 ކުންފުންޏާ 206 މަޝްރޫއެއް މިއަދު ހަވާލު ކޮށްފައިވާއިރު، އޭގެ ނަތީޖާއަކީ ރާއްޖޭގެ އިގުތިސާދު ފުޅާވެ، އިގުތިސާދަށް ދިރުން އައުން ކަމަށެވެ. ހާއްސަކޮށް އިމާރާތް ކުރުމުގެ ދާއިރާ ކުރިއަރައިގެން ދިއުން އެ މަނިކުފާނު ފާހަގަކުރެއްވި އެވެ.
"ޕޭމަންޓުގެ ފައިސާ ލިބުމުގައި އެއްވެސް ކަހަލަ ތާށިކަމެއް ނާންނާނެ މަޝްރޫއުތަކެއްގައި މި ސޮއިކުރެވިގެން ދިޔައީ. އާންމުކޮށް ސަރުކާރުގެ ތެރެއިން ފައިސާ ދޫކުރުމުގައި އެ އަންނަ ދަތިތަކުގެ ތެރެއިން އެ އަންނަ ޑިލޭތައް އެއްވެސް ވަރަކަށް ނާންނާނެ. މަސައްކަތްތައް ބަރާބަރަށް އެގްރީމަންޓުގައިވާ ގޮތަށް ކުންފުނިތަކުން ކުރަމުން ގެންދާނެ. ކުރުމަށް މަޖުބޫރުވާނެ،" ރައީސް ވިދާޅުވި އެވެ.
އެ މަނިކުފާނު ތަކުރާރުކޮށް ވިދާޅުވީ، އެ ކުންފުނިތަކުން މަސައްކަތް ކުރުމަށް ފަހު ފައިސާ ހޯދަން ހުށަހެޅުމުން ސަރުކާރުން ބަރާބަރަށް ފައިސާ ދޫކުރާނެ ކަމަށެވެ. އަދި އެއީ "ވަރަށް ހަލުވި ދުވެލީގައި" އަދި "ވަރަށް އެފިޝަންޓުކޮށް" ކުރިއަށް ގެންގޮސް ނިންމާލެވޭނެ މަޝްރޫއުތަކެއް ކަމަށް ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި، މި މަޝްރޫއުތައް ހިންގަން ސަރުކާރުގެ ކަމާ ގުޅޭ އިދާރާތަކުގެ ތެރެއިން ވެސް އެ ކުންފުނިތަކަށް އެއްބާރުލުން ދޭނެ އެވެ.
ރައީސް މުއިއްޒު ވިދާޅުވީ 206 މަޝްރޫއު މިއަދު ހަވާލުކުރި ހުރިހާ ކުންފުންޏަކުން ވެސް ތިން އަހަރުގެ ދުވަހުގެ "އޮޑިޓެޑް ފައިނޭންޝަލް ސްޓޭޓްމަންޓް" ހުށަހެޅި ކަމަށެވެ.
އެ ކަމަށް ބާރު ދެއްވަމުން ރައީސް ވިދާޅުވީ، އެ ސްޓޭޓްމަންޓު ހުށަހަޅައިގެން ނޫން ގޮތަކަށް އެ އިން އެއްވެސް ކުންފުންޏަކުން މިއަދު ސޮއިކުރި މޭޒާ ހަމައަށް ވެސް ނާދެވުނު ކަމަށެވެ. ހާއްސަކޮށް މި މަޝްރޫއުތައް ހަވާލު ކޮށްފައި ވަނީ މާލިއްޔަތުގެ ގާނޫނުގެ ތެރެއިން ކަމުގެ ޔަގީންކަން ރައީސް ދެއްވި އެވެ.
"އަދި އޭގެ އިތުރަށް ވެސް މި ކަމަށްޓަކައި ބޭންކުން ބޭނުންވާ ހުރިހާ އިޖުރާތްތަކެއް ފުރިހަމަނުކޮށް މި ތަނުގައި ސޮޔަކާ ހަމައަށް ގެނެވިފައެއް ނުވޭ. އެހެންވީމާ ވަރަށް ރަނގަޅަށް ހިންގަމުން އައިސްފައިވާ ވަރަށް ރަނގަޅަށް ހިނގަމުންދާ ވަރަށް ނަތީޖާ ރަނގަޅު ވަރަށް ރަނގަޅު މެނޭޖުމަންޓު ޓީމެއް އޮތް، މެނޭޖު ކުރަމުންދާ ކުންފުނިތަކަކުން މަސައްކަތްތަކާ މި ހަވާލުވީ،" ރައީސް މުއިއްޒު ވިދާޅުވި އެވެ.
ރައީސް ވިދާޅުވީ، ތަފާތު 13 ރަށެއްގައި 825 ހައުސިން ޔުނިޓް އަޅަން މިއަދު ސޮއިކުރި ކަމަށާއި ދާދި އަވަހަށް މާލެ ސަރަހައްދުގައި ވެސް ގެދޮރުވެރިކަމުގެ މަޝްރޫއުތަކެއްގެ އަމަލީ މަސައްކަތް ފަށާނެ ކަމަށެވެ.
ރައީސް މުއިއްޒު ވިދާޅުވީ، ކުރިއަށް އޮތް ދިރާސީ އަހަރު ފަށާއިރު ރާއްޖޭގެ ހުރިހާ ސްކޫލެއްގައި އޭސީ ހަރުކުރުމަށް އެ މަނިކުފާނު އިއުލާން ކުރައްވާފައިވާ "ކޫލް ސްކޫލް ޕްރޮޖެކްޓް" ގެ މަސައްކަތްތައް ވެސް ވަނީ މިއަދު ބަޔަކާ ހަވާލުކޮށްފައި ކަމަށެވެ. އޭގެ ތެރޭގައި ހިމެނެނީ އެ މަނިކުފާނު ވިދާާޅުވި ގޮތުގައި، ސްކޫލްތައް އޭސީ ކުރުމަށް ބޭނުންވާ ބަދަލުތައް ގެނައުމާއި ސާމާނު ގެނައުން ފަދަ ކަންކަމެވެ.
"އެހެންވީމާ ވަރަށް ގިނަ ކަންކަން އެއްފަހަރާ ހާސިލް ކުރެވޭ ގޮތަށް، ކަންކަން ކުރެވޭނެ ގޮތްތައް ތަރުތީބު ކޮށްގެން މި ކުރަނީ ކޮން ކަމެއް ކަން ރައްޔިތުންނަށް ސާފުކޮށް އެނގޭ ގޮތަށް، ވަރަށް ޕްރޮފެޝަނަލްކޮށް، ދެފުށް ފެންނަ ގޮތަށް ގާނޫނާއި ގަވާއިދާ އެއްގޮތަށް ރައްޔިތުންނަށް ވެފައިވާ ވައުދުތައް ފުއްދޭ ގޮތަށް ތެދުވެރިކަމާއި އަމާނާތްތެރިކަމާއި ޒިންމާދާރުކަމާ އެކީގައި އަދާކުރުމުގެ ފުރިހަމަ ނިޔަތުގައި، އަޒުމްގައި މި މަސައްކަތްތައް މުޅި ސަރުކާރު ގުޅިގެން ކުރިއަށް މި ގެންދަނީ،" ރައީސް ވިދާޅުވި އެވެ.
އެ މަނިކުފާނު ވިދާޅުވި ގޮތުގައި، މިއަދުން ފެށިގެން 21 ވަރަކަށް ދުވަހުގެ ތެރޭގައި މަސައްކަތް ފަށަން އެއްބަސްވުންތަކުގައި ވާނީ ހިމަނައިފަ އެވެ. އެ ތާރީހަށް މަސައްކަތްތައް ފެށުމަށްޓަކައި ބޭންކު ތެރެއިންނާއި ފިނޭންސް މިނިސްޓްރީން ފުރިހަމަ ކޮށްދޭންޖެހޭ ކަންކަން ދާދި އަވަހަށް ކޮށްދޭނެ ކަމަށް ރައީސް ވިދާޅުވި އެވެ.
"އެހެންވީމާ ކުރިއަށް އޮތް 21 ވަރަކަށް ދުވަހުގެ ތެރޭގައި އަޅުގަނޑަށް ޔަގީން ރަށްރަށުގައި ފެނިވަޑައިގަންނަވާނެ، މި 123 ރަށުގައި މި ކަމަށްޓަކައި މަސައްކަތްތައް ފެށިގެންދާތަން ވެސް،" ރައީސް މުއިއްޒު ވިދާޅުވި އެވެ.