05 ނޮވެމްބަރ 2025 - 23:26
އައްޑޫގެ ގުޅިފައިވާ ރަށްތަކުގައި 200 ހައުސިން ޔުނިޓް އަޅަން އެޗްޑީސީއާ މިރޭ ހަވާލުކޮށްފި އެވެ.
އެ މަޝްރޫއުގެ އެއްބަސްވުމުގައި ސޮއިކުރެއްވީ ރައީސް ޑރ. މުހައްމަދު މުއިއްޒު އައްޑު އަށް މިހާރު ކުރައްވާ ދަތުރުފުޅުގައި ހިތަދު އާއި މަރަދު އާއި މަރަދޫފޭދޫ އަދި ފޭދޫގެ ރައްޔިތުންނާ ބައްދަލުކުރެއްވުމަށް އައްޑޫ ހައި ސްކޫލްގައި ބޭއްވި ޖަލްސާގަ އެވެ.
ހައުސިން މިނިސްޓްރީގެ ފަރާތުން އެ އެއްބަސްވުމުގައި ސޮއިކުރެއްވީ މިނިސްޓަރު ޑރ. އަބްދުﷲ މުއްތަލިބެވެ. އެޗްޑީސީން ސޮއިކުރެއްވީ މެނޭޖިން ޑިރެކްޓަރު އަލީ ޒުހައިރެވެ.
އެ މަޝްރޫއުގެ ދަށުން ހިތަދޫގައި 100 ހައުސިން ޔުނިޓް އަދި މަރަދު އާއި ފޭދޫގައި، ކޮންމެ ރަށެއްގައި 50 ހައުސިން ޔުނިޓް އަޅަން ވަނީ ނިންމައިފަ އެވެ.
ރައީސް އައްޑުއަށް ކުރައްވާ މި ދަތުރުފުޅުގައި ވަނީ އައްޑޫގެ ހުރިހާ ރަށެއްގައި ވެސް ގިނަ މަޝްރޫއުތަކެއް ފައްޓަވައި ދެއްވައި، އަދި ނިމިފައިވާ ބައެއް މަޝްރޫއުތައް އިފްތިތާހު ކޮށްދެއްވައިފަ އެވެ.
ހިތަދޫގައި މިރޭގެ ޖަލްސާގައި ރައީސް މުއިއްޒު ވިދާޅުވީ ބޯހިޔާވަހިކަމަކީ އެ މަނިކުފާނުގެ އެންމެ ބޮޑު ވައުދު ކަމަށް ވާތީ، އައްޑޫގައި އަޅަން މިރޭ ހަވާލުކުރި 200 ހައުސިން ޔުނިޓްގެ އިތުރުން ވެސް އިތުރު ހައުސިން މަޝްރޫއުތައް މި ސިޓީގައި އަދި ފަށާނެ ކަމަށެވެ.