05 ނޮވެމްބަރ 2025 - 15:07
ދަރިވަރަކަށް ޓީޗަރަކު އެއްވެސް ގޮތަކުން ގޯނާއެއް ކުރިކަން އެތެރޭގެ ތަހުގީގުގައި ސާބިތުވެއްޖެ ނަމަ އެ ޓީޗަރަކު ވަޒީފާ އިން ވަކިކުރުމަށް ބަދަލުތައް ގެނައުމުގެ ވިސްނުން އެބަހުރި ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ރާއްޖޭގެ އެކި ސަރަހައްދުތަކުގައި ހިންގާ ހަތަރު ސްކޫލެއްގެ ބައެއް ޓީޗަރުން ޖިންސީ ގޯނާގެ ތުހުމަތުގައި މި ފަހުން ހައްޔަރުކޮށް، ސަސްޕެންޑު ކޮށްފައި ވަނިކޮށް މިނިސްޓަރު "މިހާރު" އަށް ވިދާޅުވީ އެފަދަ ހާދިސާތައް ހިނގަނީ ސްކޫލުން ބޭރުގައި ކަމަށެވެ. ނަމަވެސް، އެފަދަ ކަންތައްތަކުން ސްކޫލްތައް ރައްކާތެރި ކުރުމަކީ މިނިސްޓްރީ އަށް އެންމެ މުހިއްމު އަދި ސަމާލުކަންދޭ ކަން ކަމަށް އޭނާ ވިދާޅުވި އެވެ.
އޭގެ ތެރެއިން، ޓީޗަރަކަށް ތުހުމަތެއް ކޮށް، އަދި އެކަން އެތެރޭގެ ތަހުގީގުން ސާބިތުވެއްޖެ ނަމަ އެ މީހަކަށް ފިޔަވަޅު އެޅުމަށް ސިވިލް ސާވިސް ކޮމިޝަން (ސީއެސްސީ) އާއެކު ގަވައިދު ބަދަލުކުރުމުގެ މަޝްވަރާތައް ކުރާނެ ކަމަށް މިނިސްޓަރު ވިދާޅުވި އެވެ.
މިހާރު އޮންނަ ގޮތުން، ޓީޗަރަކަށް ޖިންސީ ގޯނާގެ ތުހުމަތު ކުރެވޭ ހިސާބުން ފުލުހުންގެ ޖިނާއީ ތަހުގީގު ނިންމައި ދައުވާކޮށް، މައްސަލަ ނިމެންދެން އެ ޓީޗަރަކު ހުންނަނީ ސަސްޕެންޑު ކޮށްފަ އެވެ. ނަމަވެސް، ޝަރީއަތް ދިގުދެމިގެންދިއުމާއި މަގާމާ އެކު، ސަސްޕެންޑު ކޮށްފައި ހުންނާތީ އެ މަގާމަށް އިތުރު މުވައްޒަފުން ހޯދަން ސްކޫލުތަކަށް ދަތިވެ އެވެ.
އިސްމާއިލް ވިދާޅުވި ގޮތުގައި ޖިނާއީ ދައުވާ ސާބިތުވިއަސް ނުވަތަ ނުވިއަސް، މިނިސްޓްރީގެ ވިސްނުމަކީ އިދާރީ ތަހުގީގުން އެ މީހެއްގެ މައްޗަށް ސާބިތުވާ ނަމަ ވަޒީފާއިން ވަކިކުރުމެވެ.
"ޝަރީއަތުން ސާބިތު ނުވެދާނެ [ޖިންސީ ގޯނާގެ މައްސަލަ]. އެކަމަކު، ސްކޫލުތަކުގައި ތިބޭ ޓީޗަރުންނަކީ އެންމެ އިތުބާރު ކުރާ ބަޔަކަށް ވާން ވާނެ. އެކަމުގައި ފިޔަވަޅު އެޅޭނެ،" އޭނާ ވިދާޅުވި އެވެ.
ޖިންސީ ގޯނާގެ މައްސަލަތަކުގައި މި ފަހުން ހައްޔަރުކުރި ހަތަރު ޓީޗަރުން ވަނީ 30 ދުވަހަށް ސަސްޕެންޑު ކޮށްފަ އެވެ. ތަހުގީގު ކުރިއަށްދާ ގޮތުން، އެ މުއްދަތު އިތުރު ކުރެ އެވެ.