04 ނޮވެމްބަރ 2025 - 22:33
ފުވައްމުލަކަށް ކައިރި އަތޮޅަކުން ފަޅުރަށެއް ހަމަޖައްސައިދޭން އެ ރަށު ސިޓީ ކައުންސިލުން މިއަދު ރައީސް ޑރ. މުހައްމަދު މުއިއްޒުގެ އަރިހުގައި އެދިއްޖެ އެވެ.
ރާއްޖޭގައި އެންމެ ރަށެއްގެ މައްޗަށް އޮންނަ ހަމައެކަނި އަތޮޅު ކަމަށްވާ ޏ. އަތޮޅުގެ ފުވައްމުލަކާ އެންމެ ކައިރީގައި، ދެކުނުން އޮންނަ އައްޑު އަތޮޅު ވެސް 35 ކިލޯމީޓަރަށް ވުރެ ދުރެވެ. އުތުރުން އެންމެ ކައިރި ގދ. އަތޮޅާ ދެމެދު 55 ކިލޯމީޓަރު ހުރެ އެވެ.
ރައީސް މުއިއްޒު ފުވައްމުލަކަށް މިހާރު ކުރައްވާ ރަސްމީ ދަތުރުފުޅުގައި ސިޓީ ކައުންސިލާއި މި ރަށުގެ އަންހެނުންގެ ތަރައްގީއަށް މަސައްކަތްކުރާ ކޮމިޓީގެ މެމްބަރުންނާ ވެސް އެ އިދާރާގައި މިރޭ ވަނީ ބައްދަލުކުރައްވައިފަ އެވެ.
ރައީސް އޮފީހުން ބުނީ އެ ބައްދަލުކުރެއްވުމުގައި ސިޓީ ކައުންސިލް މެމްބަރުން ވަނީ ރަށުގެ ތަރައްގީއަށް އެންމެ ބޭނުންވާ ކަންކަން ރައީސްއާ ހިއްސާކުރައްވައިފައި ކަމަށެވެ. މި ރަށުގެ ފެނާއި ކަރަންޓަށް މިހާރު ދިމާވެފައިވާ މައްސަލަ، ވަރަށް ބޮޑު އިސްކަމެއް ދެއްވައިގެން ވީހާ ވެސް އަވަހަށް ހައްލުކޮށްދެއްވުމަށް ސިޓީ ކައުންސިލުން އެދުނު ކަމަށާއި ރަށުން ފެން ކެނޑުމުގެ މައްސަލަ އާއި ބޯން ބޭނުންކުރާ ފެނަކީ ރައްކާތެރި ފެންތޯ ޓެސްޓު ކުރެވޭނެ އިންތިޒާމު ހަމަޖައްސައިދިނުމަށް އެދުނު ކަމަށް ވެސް ރައީސް އޮފީހުން ބުންޏެވެ.
ކަރަންޓުގެ މައްސަލަ އަންނަ ރޯދަ މަހުގެ ކުރިން ހައްލުކޮށްދިނުމަށާއި ރަށުގެ އިންޖީނުގެ، މީހުން ދިރިއުޅޭ ހިސާބުގައި ހުރުމުން ދިމާވާ ދަތިތައް ހައްލުކޮށްދިނުމަށް، މިހާރު މި ރަށުގައި އަޅަމުން އަންނަ އިންޖީނުގެ އަވަހަށް ނިންމައި، އެ އިމާރާތަށް ބަދަލުކޮށްދިނުމަށް ވެސް ކައުންސިލުން އެދިފައިވެ އެވެ.
"... ގެދޮރުގެ ދަތިކަމާއި ފުވައްމުލަކު ކައުންސިލަށް ކައިރި އަތޮޅަކުން ފަޅުރަށެއް ލިބޭނެ ގޮތް ހައްދަވައިދެއްވުމަށް ވެސް ކައުންސިލުން ވަނީ އެދިވަޑައިގެންފަ އެވެ،" ރައީސް އޮފީހުން ބުންޏެވެ.
ފުވައްމުލަކުގައި އިމާރާތްކުރުމަށް ހަމަޖެހިފައިވާ އޮފީސް ކޮމްޕްލެކްސް އަކީ ރަށުގައި މިހާރު ހިންގަމުން އަންނަ ސަރުކާރުގެ އޮފީސްތައް، އެއް އިމާރާތެއްގައި ހިންގުމަށް ވަރަށް މުހިންމު އިމާރާތަކަށް ވާތީ އެ މަސައްކަތް އަވަސްކޮށްދޭން ސިޓީ ކައުންސިލުން އެދިފައިވެ އެވެ.
ފުވައްމުލަކަކީ ޓޫރިޒަމް ކުރިއަރަމުން އަންނަ ރަށެއްކަން ފާހަގަކޮށް، ކައުންސިލުން ވަނީ ރަށަށް ލިބޭ ޖީއެސްޓީ އާއި ޓީޖީއެސްޓީގެ ވަކި ޕަސެންޓެއް، އުސޫލެއްގެ ދަށުން ކައުންސިލަށް ލިބޭނެ ގޮތް ހަދައިދިނުމަށް އެދިފަ އެވެ. އަދި މި ރަށުގައި ކުރިއަށް ގެންދާ ސިޓީ ހޮޓަލުގެ މަސައްކަތް އެމްއޭސީއެލް އިން ކުރިއަށް ގެންދާއިރު، ފުވައްމުލަކު ލޯކަލް ކައުންސިލް އޮތޯރިޓީއާ ގުޅިގެން ކުރިއަށް ގެންދިނުމަށް ވެސް ސިޓީ ކައުންސިލުން އެދުނެވެ.
މި ރަށުގެ އެއާޕޯޓް ބޮޑުކުރުމުގެ މަޝްރޫ އާއި ކުނިކޮށީގައި ހުރި ކުނިތައް އުކާލުމާއި އެތަނުގައި ހުރި ވެހިކަލްތައް ބައުވެ ހަލާކުވެފައި ހުރުމުން ވެހިކަލްގެ ދަތި ކަމަށް ހައްލު ހޯދައިދިނުމަށް ވެސް ކައުންސިލުން ވަނީ އެދިފަ އެވެ.
ސަރުކާރުން ކުރިއަށް ގެންދާ ކޮންމެ ކަމެއްގައި ފުވައްމުލަކު ސިޓީ ކައުންސިލުން ދޭން ޖެހޭ އެއްބާރުލުން ސަރުކާރަށް ދޭނެ ކަމުގެ ޔަގީންކަން ވެސް އެ ކައުންސިލުން ވަނީ ދީފަ އެވެ.
ރައީސް އޮފީހުން ބުނީ ކައުންސިލުން ފާހަގަކުރި ކަންކަމުގެ ތަފުސީލަށް ވަޑައިގެން، ފުވައްމުލަކުގައި ހިންގާ މަޝްރޫއުތަކުގެ އެންމެފަހުގެ މައުލޫމާތު މިނިސްޓަރުންނާއި ސަރުކާރު ކުންފުނިތަކުގެ ވެރިން މެދުވެރިކުރައްވައި، ރައީސް އެ ކައުންސިލާ ހިއްސާކުރެއްވި ކަމަށެވެ.