04 ނޮވެމްބަރ 2025 - 07:08
އައްޑޫ ސިޓީން ހުޅުދު އާއި މީދޫ ވަކިކޮށް، އެ ދެ ރަށަށް ވެސް ވަކި ދެ ކައުންސިލެއް އުފައްދަން ރައީސް ޑރ. މުހައްމަދު މުއިއްޒު ރޭ ނިންމަވައިފި އެވެ.
އެކަން އެ މަނިކުފާނު ނިންމެވީ، އައްޑޫ ސިޓީ ކައުންސިލްގެ ދަށުން އިދާރީ ގޮތުން ވަކިވާން އައްޑޫގައި އެއްފަސްކޮށް އުފެދިފައިވާ ރަށްތަކާ މުޅިން ވަކިން އޮންނަ މީދު އާއި ހުޅުދޫގެ އިތުރުން ފޭދޫގެ ރައްޔިތުންނަށް ފެނޭތޯ ބެލުމަށް މިދިޔަ މަހުގެ 25 ގައި ނެގި ހިޔާލު ހޯދުމުގެ ވޯޓުގެ ނަތީޖާ އަށް ރިއާޔަތް ކުރައްވައި ނެރުއްވި ގަރާރެއްގަ އެވެ.
ހިޔާލު ހޯދުމުގެ ވޯޓުން ދެއްކި ގޮތުން، ހުޅުދޫން ވޯޓުލީ މީހުންގެ 1،069 މީހުންގެ ތެރެއިން 723 މީހުން ވޯޓު ދިނީ އެ ރަށުގައި ވަކި ކައުންސިލެއް އުފައްދަން ފެންނަ ކަމަށެވެ. ނުފެންނަ ކަމަށް ހުޅުދޫން ވޯޓު ދިނީ 329 މީހުންނެވެ.
މީދޫން ވޯޓުލީ މީހުންގެ 1،008 މީހުންގެ ތެރެއިން 847 މީހުންނަށް ފެނުނީ އެ ރަށުގައި ވަކި ކައުންސިލެއް ހަދާށެވެ. މީދޫގައި ވަކި ކައުންސިލެއް އުފައްދަން ނުފެނުނީ ވޯޓުލީ މީހުންގެ ތެރެއިން އެންމެ 144 މީހަކަށެވެ.
ނަމަވެސް ފޭދޫން ވޯޓުލީ މީހުންގެ ތެރެއިން ބޮޑު ބޮޑު ޕަސެންޓެއް ވޯޓު ދިނީ އައްޑޫ ސިޓީ ކައުންސިލްގެ ދަށުގައި ތިބޭށެވެ. ފޭދޫގައި ވަކި ކައުންސިލެއް އުފައްދަން ތާއީދުކުރީ ވޯޓުގައި ބައިވެރިވި 2،436 މީހުންގެ ތެރެއިން 616 މީހުންނެވެ. ފޭދު އަށް ވަކި ރަށު ކައުންސިލެއް އުފައްދަން ނުފެންނަ ކަމަށް 1،784 މީހުން ވޯޓު ދިނެވެ.
އެ ނަތީޖާތަކަށް ބުރަވެ، ރައީސް މުއިއްޒު ރޭ ނެރުއްވި ގަރާރުގައިވާ ގޮތުން މީހުން ދިރިއުޅޭ ވަކި ރަށެެއްގެ ގޮތުގައި ކަނޑައަޅާފައިވާ "އައްޑޫ" އަކީ "އައްޑޫ ސިޓީ" ކަމަށް ވަނީ ނިންމަވައިފަ އެވެ. އައްޑޫ ސިޓީގެ ތެރޭގައި ހިމެނެނީ ގަރާރުގައިވާ ބުނެފައިވާ ގޮތުން އައްޑުއަތޮޅު ހިތަދު އާއި އައްޑުއަތޮޅު މަރަދު އާއި އައްޑުއަތޮޅު މަރަދޫފޭދޫ އާއި އައްޑުއަތޮޅު ފޭދޫ އެވެ. އެ ހަތަރު ރަށް އެއްކޮށްލައިގެން އައްޑުއަށް ސިޓީގެ ދަރަޖަ ލިބޭ ކަމަށް ވެސް ގަރާރުގައި ވެ އެވެ.
މިހާތަނަށް އައްޑޫގެ އިހުތިސާސްގެ ތެރޭގައި އޮތް ހުޅުދު އާއި މީދުއަކީ މީހުން ދިރިއުޅޭ ވަކި ދެ ރަށް ކަމަށް ރައީސް މުއިއްޒުގެ ގަރާރުގައި ކަނޑައެޅުއްވި އެވެ. އެ ނިންމެވުމާ އެކު، ރާއްޖޭގައި ވަކިން މީހުން ދިރިއުޅޭ ރަށުގެ ލިސްޓަށް ހުޅުދު އާއި މީދޫގެ ނަން ވަނީ އިތުރު ކޮށްފަ އެވެ.
ނަމަވެސް ރައީސްގެ ދެ ގަރާރުގައިވާ ގޮތުން ވެސް ހުޅުދު އާއި މީދުއަކީ މީހުން ދިރިއުޅޭ ދެ ރަށް ކަމަށް ބަލައި އަދި އެ ދެ ރަށުގައި ވަކި ދެ ކައުންސިލް ވެސް އުފައްދާނީ ދެން އެންމެ އަވަހަށް ބާއްވާ ލޯކަލް ކައުންސިލްތަކުގެ އިންތިހާބުގައި އުފައްދާ ކައުންސިލްގެ އުމުރު ގުނާ ދުވަހުން ފެށިގެންނެވެ. އަދި ހުޅުދު އާއި މީދު އަށް ވެސް ވަކި ކައުންސިލެއް އުފައްދައި އަމަލު ކުރަން ފަށާނީ އެ ތާރީހުން ފެށިގެން ކަމަށް ގަރާރުގައި ރައީސް މުއިއްޒު ވިދާޅުވި އެވެ.
އެހެންވެ، ދެން އެންމެ އަވަހަށް ބާއްވާ ލޯކަލް ކައުންސިލްތަކުގެ އިންތިހާބުގައި އައްޑޫ މީދޫ ކައުންސިލާއި އައްޑޫ ހުޅުދޫ ކައުންސިލަށް މެމްބަރުން އިންތިހާބު ކުރަން ގަރާރުގައި ވަނީ ކަނޑައަޅައިފަ އެވެ.
ހުޅުދު އާއި މީދޫ އަދި ފޭދޫގައި ވަކި ކައުންސިލެއް ހަދަން ފެނޭތޯ ބަލަން ފެންނަ ނުފެންނަ ވޯޓެއް ނެގީ ރައީސް މުއިއްޒު ވިދާޅުވެފައިވާ ގޮތުގައި 2023 ގެ ރިޔާސީ އިންތިހާބުގެ ކެމްޕެއިނަށް އެ މަނިކުފާނު އައްޑު އަށް ވަޑައިގަތުމުން އެ ތިން ރަށުގެ ބައެއް މީހުން އެ ކަމަށް އެދިފައިވާތީ އެވެ.
ހުޅުދު އާއި މީދޫ އާއި ފޭދޫގައި މިދިޔަ މަހު ބޭއްވީ ހިޔާލު ހޯދުމުގެ ރިފަރެންޑަމް ގާނޫނުގެ ދަށުން ނެގި ފުރަތަމަ ވޯޓު ވެސް މެ އެވެ.