03 ނޮވެމްބަރ 2025 - 20:05
ހަތިޔާރު އެޅި ބަޔަކު ދިވެހި މަސްވެރިންގެ އުޅަނދަކަށް އަރައި މަސްވެރިންތަކެއް ރަހީނުކުރި އެވެ. ޓެރަރިސްޓުންގެ އަތްދަށުވުމުގެ ކުރިން މަސްވެރިން އެ މައުލޫމާތު ކޯސްޓް ގާޑަށް އެންގުމާ އެކު، ޓެރަރިސްޓުން ބަލިކޮށް މަސްވެރިން ސަލާމަތް ކުރުމުގެ އަވަސް އޮޕަރޭޝަނެއް ދިވެހި އަސްކަރިއްޔާ އިން ފެށި އެވެ.
މިއީ ރާއްޖޭގައި ކޮންމެ ވަގުތެއްގައި ވެސް ކުރިމަތިވެދާނެ ހާލަތެކެވެ. މިއާ ގާތްކުރާ ބައެއް ހާދިސާތައް ކުރިން ހިނގާފައި ވެސް އެބަހުއްޓެވެ. މި އަހަރުގެ ނަސްރުގެ ދުވަހުގެ މުނާސަބަތުގައި ރާއްޖޭގެ އަސްކަރިއްޔާ އިން ޖުމްހޫރީ މައިދާން ސަރަހައްދުގައި މިއަދު ދައްކާލީ މިފަދަ ހާލަތެއްގައި ސިފައިން ހަރަކާތްތެރިވާނެ ގޮތުގެ ތަމްސީލެކެވެ.
ރާއްޖޭގެ އިރުމަތިން މީހުން އުޅޭ ރަށްތަކާ ދުރުގައި ކުރިމަތިވި އެ ނުރައްކާ "ނައްތާލަން" ފުރަތަމަ ވެސް އުދުއްސާލީ ރައީސް ޑރ. މުހައްމަދު މުއިއްޒުގެ ވެރިކަމުގައި ސިފައިންގެ އަށް އަލަށް ހޯދައިދިން އަސްކަރީ ޑްރޯންތަކުގެ ތެރެއިން ޑްރޯން އެކެވެ. އެއީ މަސްވެރިން ރަހީނު ކޮށްފައިވާ ބޯޓު އޮތް ސަރަހައްދު ދެނެގަތުުމަށެވެ.
މަސްބޯޓު އޮތް ތަން ދެނެގަތުމާ އެކު، އެ މައުލޫމާތު ދިނީ މިފަދަ ޓެރަރިސްޓް އަމަލެއް ހިންގަން އުޅޭ ކަމުގެ މައުލޫމާތު ކުރިން ލިބިފައި ވާތީ އުފައްދާފައިވާ ޖޮއިންޓް ޓާސްކް ފޯހަށެވެ. އެ ޓާސްކްފޯހުގައި ހިމެނެނީ އެއްގަމާއި ކަނޑާއި ވައިގެ ބާރުތަކެވެ.
މިއަދުގެ ހުށަހެޅުމުގައި ދެއްކި ގޮތުން އެފަދަ ހާލަތްތަކުގައި އުފައްދާ ޓާސްކްފޯހާ އެކު، މުޅި އެމްއެންޑީއެފްގެ "އޮޕަރޭޝަނަލް ސްޓޭޓަސް" މަތިކުރެ އެވެ.
ސިފައިންގެ ހުށަހެޅުމުގައި ދެއްކި ގޮތުގައި އެހާ ދުރުގައި ހިނގާ އެ ފަދަ ނުރައްކާތައް "ނައްތާލަން" ސިފައިން ފޮނުވާނީ ތުރުކީން ހަދިޔާކުރި ޑޯގަން-ކްލާސްގެ މިސައިލުން ހަމަލާދިނުމުގެ ގާބިލްކަން ލިބިފައިވާ މަނަވަރު "ދަރުމަވަންތަ" އެވެ. އެފަދަ ހާލަތްތަކުގައި އެ އުޅަނދުގައި ހަރަކާތްތެރިވާނީ "ސްޕެޝަލް ބޯޓު ސްކޮޑްރޮން"ގެ ސިފައިންނެވެ.
ކަނޑުމަތީ މަސްވެރިންގެ ބަޔަކު ރަހީނުކޮށްފި ނަަމަ ސަލާމަތް ކުރާނެ ގޮތުގެ ޑެމޯއާ އެކު، ޑްރޯން އާއި އިސްކަންދަރު މަނަވަރުގެ ބޭނުންތެރިކަން ސިފައިން މިއަދު ތަމްސީލުކޮށްދިނެވެ،
"ކޯސްޓްގާޑް ޝިޕް ދަރުމަވަންތަ އަކީ ދިވެހިރާއްޖޭގެ ކަނޑުގެ ދިފާއީ ގާބިލުކަން އިތުރު ކުރުމުގެ ގޮތުން ކޯސްޓްގާޑުގެ ފްލީޓަށް މި އަހަރު އަލަށް ގެނެވިފައިވާ އުޅަނދެެއް. މިއީ ދިވެހިރާއްޖެ ފަދަ ކަނޑުގެ ސަރަހައްދު ބޮޑު ގައުމަކަށް އެންމެ ބޭނުންތެރި އެއް ދިފާއީ ގާބިލުކަން ކަމަށްވާ ނޭވަލް އެޓޭކް ރޭންޖް އެތައް މިނަކަށް އިތުރުކޮށްދޭ، ވިޝުއަލް ރޭންޖު ބޭރުން އަމާޒުކަމާ އެކު، ދުޝްމަނުންނަށް ހަމަލާ ދިނުމުގެ ގާބިލުކަން ލިބިފައިވާ ދުވެލި ބާރު އުޅަނދެއް،" ސިފައިންގެ ހުށަހެޅުމުގައި ކޯސްޓްގާޑް ޝިޕް ދަރުމަވަންތަ ސިފަކޮށްދިނެވެ.
ދިވެހި ސިފައިންނަށް އަލަށް ގެނައި އެއްގަމު އުޅަނދުތަކުގެ ބޭނުންތެރިކަން ވެސް މިއަދުގެ ހުށަހެޅުމުގައި ދައްކާލި އެވެ. އެ އަސްކަރީ އުޅަނދުތަކާއި އެ އުޅަނދުތައް ބޭނުންކޮށްގެން އޮޕަރޭޝަންތައް ހިންގުމުގައި ސިފައިން ހޯދާފައިވާ ގާބިލުކަން ދައްކާލީ މުހިއްމު އިމާރާތެއް، ޓެރަރިސްޓުންގެ ބާރުގެ ދަށަށް ގެންގޮސް ބަޔަކު ރަހީނުކުރާ ހާދިސާއެއް ތަމްސީލު ކޮށްގެންނެވެ.
އެއްގަމާއި ގޮނޑުދޮށްތަކުގައި ހިންގަން ޖެހިދާނެ އޮޕަރޭޝަނަކަށް މި އުޅަނދުތަކާ އެކު އެހެން އެތައް ވަސީލަތެއް ދީގެން އުފަައްދާފައިވާ ފައުޖަކީ މެރިންކޯ އެވެ.
އާބަން ސަރަހައްދުތަކުގައި ޓެރަރިސްޓުންގެ ބަޔަކު ހަމަލާއެއް ދޭން އުޅެފި ނަމަ ވަަށައިގެންވާ މާހައުލަށް މާބޮޑު ގެއްލުމެއް ނުވާ ގޮތަށް އެފަދަ ހަމަލާތައް ހުއްޓުވަން ސިފައިންގެ ސްޕެޝަލް އޮޕަރޭޝަންސް ފޯސް ހަރަކާތްތެރިވާނެ ގޮތް ވެސް ރައީސް އަދި ސިފައިންގެ އެންމެ މަތީވެރިޔާ މުއިއްޒު ބައިވެރިވެވަޑައިގެންނެވި ރަސްމިއްޔާތުގައި މިއަދު ތަމްސީލް ކޮށްދިން ހުށަހެޅުމުގައި ދައްކާލި އެވެ.
މިދިޔަ އަހަރުގެ ނަސްރުގެ ދުވަހުން ފެށިގެން މި އަހަރުގެ ނަސްރުގެ ދުވަހާ ހަމައަށް ދިވެހި ސިފައިންގެ ހިދުމަތަށް އައިސްފައިވާ ޒަމާނީ ކުރިއެރުމާއި އެންމެ ފަހުގެ އާލާތްތަކާ އެކު އެ ތަމްސީލުން ފެނުނީ ސިފައިންގެ ކުޅަދާނަކަމެވެ.