01 ނޮވެމްބަރ 2025 - 06:34
ދުނިޔޭގެ ފުރަތަމަ އޭއައި މިނިސްޓަރުގެ ގޮތުގައި ތައާރަފުކޮށްފައިވާ އަލްބޭނިއާގެ ޑިއެލާއަށް "83 ކުދިން ލިބެން އުޅޭ" ކަމަށް އެ ގައުމުގެ ބޮޑުވަޒީރު އެޑީ ރާމާ ވިދާޅުވެއްޖެ އެވެ.
ޖަރުމަނުވިލާތުގެ ބާލިންގައި މިދިޔަ ހަފުތާގައި ބޭއްވި ބާލިން ގްލޯބަލް ޑައިލޮގް ކޮންފަރެންސްގައި އެޑީ ރާމާ ވިދާޅުވީ އެ ގައުމުގެ ފުރަތަމަ އޭއައި މިނިސްޓަރު "އިނީ ބަލިވެ" ކަމަށާއި އޭނާއަށް ވަރަށް އަވަހަށް 83 ކުދިން ލިބޭނެ ކަމަށެވެ.
އެޑީ ރާމާ ވިދާޅުވި ގޮތުގައި، އެ 83 ކުދިން ވާނީ އޭނާ ތަމްސީލުކުރާ އަލްބޭނިއާގެ ސޯޝަލިއަސްޓް ޕާޓީގެ މަޖިލިސް މެމްބަރުންގެ ވާޗުއަލް އެސިސްޓެންޓުންނަށެވެ. މަޖިލިސް ބައްދަލުވުންތަކުގައި ބައިވެރިވެ މެމްބަރުންނަށް ބޭނުންވާ އެހީތެރިކަން އެ ކުދިން ދޭނެ ކަމަށް އޭނާ ވިދާޅުވި އެވެ.
"އެ ކުދިންގެ މަންމަ [އޭއައި މިނިސްޓަރު ޑިއެލާ]ގެ އިލްމު އެ ކުދިންގެ ވެސް ހުންނާނެ،" އެޑީ ރާމާ ވިދާޅުވި އެވެ.
"މިސާލަކަށް މެމްބަރަކު ކޮފީއަކަށް ގޮސްފައި އަނބުރާ މަސައްކަތަށް ނުދެވި ހުރެއްޖެ ނަމަ، މި ކުދިން ބުނެދޭނެ އެ ބޭފުޅުން ޖަލްސާގައި ނެތް ވަގުތުގައި ދެކެވުނު ވާހަކަތައް، އަދި ރައްދު ދޭންވީ ކާކަށް ކަން ވެސް."
އޭއައި ޑިއެލާއަކީ ވާޗުއަލް އެސިސްޓެންޓެއްގެ ގޮތުގައި އަލްބޭނިއާގެ ސަރުކާރުގެ ވެބް ޕޯޓަލްއަށް މިދިޔަ ޖެނުއަރީ މަހު ތައާރަފުކުރި އޭއައި ޓޫލްއެކެވެ. އޭގެ ފަހުން "ޑިއެލާ 2.0" ތައާރަފުކޮށް، އެނިމޭޑެޓް ސިފަޔަކާއި އަޑެއް އެޔަށް ދިނެވެ. އަންހެނެއްގެ ސިފައިގައި ހުންނަ ޑިއެލާ ހުންނަނީ އަލްބޭނިއާގެ ސަގާފީ ހެދުމުގަ އެވެ.
ޑިއެލާއަކީ އަލްބޭނިއާގެ މިނިސްޓަރެއް ކަމަށް ބޮޑުވަޒީރު އެޑީ ރާމާ އިއުލާންކުރީ މިދިޔަ ސެޕްޓެމްބަރު މަހު އެވެ.
މިނިސްޓަ އޮފް އާޓިފިޝަލް އިންޓެލިޖެންސްގެ ހައިސިއްޔަތުން ޑިއެލާގެ ޒިންމާއަކީ ސަރުކާރާއި އަމިއްލަ ކުންފުނިތަކާ ދެމެދުގައި ހަދާ އެއްބަސްވުންތައް ބެލެހެއްޓުމެވެ. އެއީ، އެ އެއްބަސްވުންތައް ހެދުމުގައި މަރަކާއި ހީލަތް އަދި ކޮރަޕްޝަން ހިންގަން ފުރުސަތު ނުދިނުމުގެ ގޮތުން ކަމަށް އެ ގައުމުގެ ސަރުކާރުން ބުނެފައިވެ އެވެ.