30 އޮކްޓޯބަރ 2025 - 14:28
މިއަހަރުގެ ތިން ވަނަ ކުއާޓާގައި އެސްޓީއޯއަށް ފައިދާގެ ގޮތުގައި 186 މިލިއަން ރުފިޔާ ލިބިއްޖެ އެވެ.
އެ ކުންފުނީގެ ތިން ވަނަ ކުއާޓާގެ މާލީ ހިސާބުތަކުން ދައްކާ ގޮތުން، އެ ކުއާޓާގައި އެ ކުންފުންޏަށް 3.8 ބިލިއަން ރުފިޔާގެ އާމްދަނީއެއް ލިބުނެވެ. އެއީ މިދިޔަ އަހަރުގެ ތިން ވަނަ ކުއާޓާއަށް ވުރެ 259 މިލިއަން ރުފިޔާ އިތުރު އަދަދެކެވެ.
މިއީ މިދިޔަ 15 މަސް ތެރޭ އެންމެ ބޮޑު ފައިދާއެއް އެ ކުންފުންޏަށް ލިބުނު ކުއާޓާ އެވެ. މިދިޔަ އަހަރުގެ ތިން ވަނަ ކުއާޓާގައި ލިބުނީ 156 މިލިއަން ރުފިޔާ އެވެ. އަދި މިއަހަރުގެ ދެވަނަ ކުއާޓާގައި ފައިދާގެ ގޮތުގައި ލިބުނީ 163 މިލިއަން ރުފިޔާ އެވެ.
ޖުމްލަ އާމްދަނީ އިތުރުވުމުގެ މައިގަނޑު ސަބަބަކީ ތެލުގެ ވިޔަފާރި ރަނގަޅުވެ، ވިކުނު ތެލުގެ އަދަދު އިތުރުވެފައިވުން ކަމަށް އެސްޓީއޯއިން ބުންޏެވެ. އެ ކުންފުނީގެ އެހެނިހެން ވިޔަފާރިތަކުން ލިބުނު އާމްދަނީ ވެސް ވަނީ 8 ޕަސެންޓް އިތުރުވެފަ އެވެ.
ތިން ވަނަ ކުއާޓާގައި ވިއްކުމާއި މާކެޓް ކުރުމުގެ ހަރަދުން ލީސް އެޖަސްޓްކުރުމަށް ފަހު ހިންގުމާއި ފައިނޭންސް ކުރުމުގެ ހަރަދު ވަނީ ރީކްލެސިފައި ކުރެވިފަ އެވެ. އެއާ އެކު ޖުމްލަ ހިންގުމުގެ ހަރަދު ވަނީ 367 މިލިއަންއިން 358 މިލިއަން ރުފިޔާއަށް ދަށްކުރެވިފަ އެވެ.