28 އޮކްޓޯބަރ 2025 - 21:25
ހަމަލާ ބަދަލުކުރުން ހުއްޓާލުމަށް ވެފައިވާ އެއްބަސްވުމާ ހަމާސް އިން ހިލާފުވެފައިވާ ކަމަށް ބުނެ، ޣައްޒާއަށް އަލުން ވަރުގަދަ ހަމަލާތައް ފަށަން އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަމުރުކޮށްފި ކަމަށް އޭނާގެ އޮފީހުން ދެންމެ ބުނެފި އެވެ.
"ސަލާމަތީ ކަންކަމާ މަޝްވަރާ ކުރުމަށްފަހު، ބޮޑުވަޒީރު ނަތަންޔާހޫ ވަނީ ޣައްޒާއަށް ވަގުތުން ވަރުގަދަ ހަމަލާތަކެއް ދިނުމަށް އަސްކަރިއްޔާއަށް އަންގާފައި،" ނަތަންޔާހޫގެ އޮފީހުން ބުންޏެވެ.
މިގޮތަށް ނިންމި ބައްދަލުވުމަކީ އެއްބަސްވުމުގެ ދަށުން ހަމާސްއިން ހަވާލުކުރަންޖެހޭ އަސީރުންގެ ހަށިތައް އަދިވެސް ހަވާލުކޮށް ނުނިމޭތީ އާއި އެންމެ ފަހުން ހަވާލުކުރި ހަށިގަނޑަކީ މީގެ ދެ އަހަރު ކުރިން ހަވާލުކުރި ހަށިގަނޑެއްގެ ބައެއް ކަމަށް ބުނުމަށް ފަހު އެކަމާ އަޅާނެ ފިޔަވަޅެއް ނިންމަން ބޭއްވި ބައްދަލުވުމެކެވެ.
ޣައްޒާގައި ހަމަލާދޭތާ ދެ އަހަރު ފަހުން ހަމަލާތައް ހުއްޓުމަކަށް ގެނުވި އެއްބަސްވުމާ ހަމާސް އިން ހިލާފުވެ، 28 ހަށިގަނޑު ހަވާލުކުރުމުގެ ސުންގަޑި ވެސް ހަމަވެފައިވާ ކަމަށް ބުނެ އިޒްރޭލުން ގެންދަނީ އިންޒާރުތައް ދެމުންނެވެ. އިޒްރޭލުން ބުނި ގޮތުގައި އެންމެ ފަހުން ހަވާލުކުރި، 16 ވަނަ ހަށިގަނޑަކީ، މީގެ ދެ އަހަރު ކުރިން ހަވާލުކުރި އެހެން އަސީރެއްގެ ހަށިގަނޑުގެ ބައިތަކެވެ.
މިއީ މި މަހުގެ 10 ވަނަ ދުވަހު ހަމާސް އާއި އިޒްރޭލުން އަމަލުކުރަން ފެށި އެއްބަސްވުމާ ހިލާފް އަމަލެއް ކަމަށް އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އާއި އިޒްރޭލުގެ އަސީރުންގެ އާއިލާތަކުގެ ޖަމިއްޔާއިން ދަނީ ބުނަމުންނެވެ. އަދި އެ ޖަމިއްޔާއިން ގެންދަނީ މިކަމާ ގުޅިގެން އިޒްރޭލުން ފިޔަވަޅު އަޅަންޖެހޭނެ ކަމަށް ބުނެ ޕްރެޝަރުކުރަމުންނެވެ.
އޮކްޓޫބަރު 7، 2023 ގައި އިޒްރޭލަށް ހަމާސް އިން ހަމަލާދީ 1،221 މީހަކު މަރާލި އިރު އަސީރުންގެ ގޮތުގައި 251 މީހަކު ވެސް ގެންދިޔަ އެވެ. އޭގެ ތެރެއިން ބައެއް މީހުން ކުރިން މިނިވަންކުރުމަށް ފަހު ބާކީ ތިބި 20 މީހުން މިނިވަންކުރީ މިފަހަރުގެ އެއްބަސްވުމުގެ ދަށުންނެވެ.
އިޒްރޭލުން ޣައްޒާގައި ދެ އަހަރު ތެރޭ 67،000 މީހަކު ވަނީ ޝަހީދުކޮށްލައިފަ އެވެ. އަދި މުޅި ޣައްޒާ ބިމާ ހަމަވެ މުޅި ސިޓީ ބަނޑަށް ޖެއްސި އެވެ.