28 އޮކްޓޯބަރ 2025 - 06:08
އިޒްރޭލުން ޖަލަށް ލާފައިވާ ފަލަސްތީނުގެ އިސް ލީޑަރެއް ކަމަށްވާ މަރްވާން ބަރްޣޫތީ މިނިވަންކޮށްފި ނަމަ، ޣައްޒާގައި ދެމުން ދިޔަ ހަމަލާތައް ހުއްޓާލަން ވެފައިވާ އެއްބަސްވުމުގެ ސަބަބުން ލިބިފައިވާ ފުރުސަތުގައި ދެ ދައުލަތުގެ ހައްލު ހޯދައި އެއްބައިވަންތަކަން ގާއިމުކުރެވޭނެ ކަމަށް އޭނާގެ ދަރިފުޅު އަރަބް ބަރްޣޫތީ ވިދާޅުވެއްޖެ އެވެ.
އަރަބް ވަނީ މި ފުރުސަތުގެ ބޭނުންހިފައި ބަރްޣޫތީ މިނިވަންކޮށްދިނުމަށް މަސައްކަތްކުރުމަށް އެމެރިކާގެ ރައީސް ޑޮނަލްޑް ޓްރަމްޕުގެ ކިބައިން އެދިވަޑައިގެންފަ އެވެ.
އުމުރުން 66 އަހަރުގެ މަރްވާން ބަރްޣޫތީ އަކީ 2000 ގެ އަހަރުތަކުގެ ކުރީކޮޅު ފަލަސްތީނު ރައްޔިތުން މިނިވަންކަމަށް ހިންގި ދެ ވަނަ އިންތިފާޟާގެ އެއް ލީޑަރެވެ. "ފަލަސްތީނުގެ މަންޑޭލާ" ގެ ގޮތުގައި ބައެއް ފަހަރު ނިސްބަތްކުރާ ބަރްޣޫތީ އަކީ ފަލަސްތީނުގެ ރައީސް މަހްމޫދު އައްބާސަށް ފަހު ދެން އެ މަގާމަށް ވަޑައިގަންނަވާނެ ލީޑަރު ކަމަށް ގިނަ ބަޔަކު ދެކެމުން އަ އެވެ.
ޖޫން 2004 ގައި ބަރްޣޫތީ ޖަލަށް ލީ އުމުރަށް ޖަލަށް ލުމުގެ ފަސް ހުކުމާ އެކު އެވެ. އެއީ އިޒްރޭލުގެ ފަސް މީހަކު މަރުވި ހަތަރު ހަމަލާއެއްގައި ބަރްޣޫތީގެ ބައިވެރިވުން އޮތް ކަމަށް ނިންމުމަށް ފަހު އެވެ.
މި ހުކުމަށް ފަހު ވެސް ފަލަސްތީނުގައި ބަރްޣޫތީއަށް އޮތް ތާއީދަށް އެއްވެސް ބަދަލެއް ނާދެ އެވެ.
"އެއީ ފަލަސްތީނު އެއްބައިވަންތަ ކުރުމުގެ ރެކޯޑް އޮތް ބޭފުޅެއް،" އޭއެފްޕީއަށް ދެއްވި އިންޓަވިއުއެއްގައި ދަރިކަލުން، އަރަބް ވިދާޅުވި އެވެ.
އޭނާ ވިދާޅުވީ ދެ ދައުލަތު ހައްލުން ފަލަސްތީނާއި އިޒްރޭލަށް ހަމަޖެހުން ގެނެސްދެވޭނެކަން ވިސްނައިދޭން ބަރްޣޫތީ ފަދަ ބޭފުޅަކު ނުހުންނާނެ ކަމަށާއި އެހެންވެ މިއީ ހައްލެއް ހޯދުމުގެ މަސައްކަތުގައި ސީރިއަސް ނަމަ ރަނގަޅު ފުރުސަތެއް ކަމަށެވެ.
އަރަބް މި ވާހަކަ ދައްކަވާފައި ވާއިރު ފްރާންސާއި އިނގިރޭސި ވިލާތް އަދި ކެނެޑާ ފަދަ އެތައް ގައުމަކުން މި ފަހުން ވަނީ ފަލަސްތީނަކީ ދައުލަތެއްގެ ގޮތުގައި ބަލައިގެންފަ އެވެ.
އަރަބް އަކީ ބަރްޣޫތީ ދޫކޮށްލުމަށް އެމެރިކާގެ ރައީސްގެ އަރިހުން އެދިވަޑައިގަތް، އާއިލާގެ ދެވަނަ މެންބަރެވެ. ބަރްޣޫތީގެ އަނބިކަނބަލުން ފަދްވާ ވެސް ވަނީ ޓްރަމްޕުގެ އަރިހުން މިކަމަށް އެދިވަޑައިގެންފަ އެވެ.
އެމެރިކާގެ "ޓައިމް" މަޖައްލާއަށް މި މަހުގެ 15 ގައި ދެއްވި އިންޓަވިއުއެއްގައި ޓްރަމްޕް ވަނީ އެކަމާ މެދު ގޮތެއް ނިންމަވާނެ ކަމަށް ވެސް ވިދާޅުވެފަ އެވެ. އެކަމަކު ވަކި މުއްދަތެއް ނުދެއްވަ އެވެ.
"އަޅުގަނޑު އުންމީދުކުރަނީ އެކަން ކޮށްދެއްވާނެ ކަމަށް، އަޅުގަނޑުގެ ބައްޕަ މިނިވަން ކުރުމަށް އިޒްރޭލަށް ޕްރެޝަރު ކުރައްވާނެ ކަމަށް، އެއީ ސުލްހައިގެ ބައިވެރިއެއް،" އަރަބް ވިދާޅުވި އެވެ.
އަރަބް ވިދާޅުވީ ބައްޕައާ ވާހަކަ ދެއްކުމުގެ ހުއްދަ އިޒްރޭލުން ނުދޭތާ ތިން އަހަރު ވެއްޖެ ކަމަށާއި އެކަމަކު ބައްޕަކީ އަދިވެސް ފަލަސްތީނުގެ އެއްބައިވަންތަކަން ރަމްޒުކޮށްދޭ ބޭފުޅެއް ކަމަށެވެ.
ރައީސް އައްބާސްގެ ފަތަހް ޖަމާއަތުގެ ދުވަސްވީ މެންބަރެއް ކަމަށްވާ ބަރްޣޫތީ ވަނީ އެ ޕާޓީގެ މައި ކޮމިޓީގެ މެންބަރުކަމަށް އެތައް ފަހަރަކު އިންތިހާބުވެފަ އެވެ. ޖަލުގައި ހުންނަވަނިކޮށް ވެސް ދެ ފަހަރަށް އިންތިހާބުކުރި އެވެ. -- އޭއެފްޕީ