21 އޮކްޓޯބަރ 2025 - 19:33
އެމްޑީޕީން މި މަހުގެ ތިންވަނަ ދުވަހު މާލޭގައި ކުރި މުޒާހަރާއާ ގުޅިގެން އެ ޕާޓީގެ ބައެއް މެންބަރުންނަށް ތުހުމަތުތަކެއްކޮށް، ފުލުހަށް ހާޒިރުވާން އަންގައިފި އެވެ.
ފުލުހުން ބަލަމުންދާ މައްސަލައާ ގުޅިގެން ހާޒިރުވާން އަންގާފައިވަނީ އެމްޑީޕީގެ ގައުމީ މަޖިލިސް މެންބަރެއް ކަމަށްވާ ފާތިމަތު ޒަހިއްޔާ (ޒާޔާ) އާއި އިތުރު ދެ މީހަކަށެވެ. ޒާޔާގެ ފޯނު މީގެކުރިން ފުލުހުން ހިފަހައްޓާފައިވެ އެވެ.
ޒާޔާގެ އިތުރުން ދެން ޕޮލިހަށް ހާޒިރުކުރަނީ ޕާޓީގެ އާންމު ދެ މެންބަރުން ކަމަށްވާ މުހައްމަދު ހަމާއިދު އަބްދުލްޣަނީ އާއި އާއިޝަތު ނަޖުދާ އަލީ އެވެ.
އެމްޑީޕީން ބޭއްވި މުޒާހަރާއާ ގުޅިގެން ބައެއް މީހުން ފުލުހަށް ހާޒިރުވާން އެންގިއިރު، އެ މުޒާހަރާ ތެރެއިން ހަ މީހަކު ހައްޔަރު ވެސް ކުރި އެވެ. އެމީހުން 15 ދުވަހު ބަންދުގައި ބޭތިއްބުމަށްފަހު ކްރިމިނަލް ކޯޓުން ދާދިފަހުން ވަނީ ޝަރުތުތަކާ އެކު އެ މީހުން ދޫކޮށްލައިފަ އެވެ. އޭގެ ތެރޭގައި ރައްޔިތުންގެ މަޖިލީހުގެ ކުޅުދުއްފުށީ އުތުރު ދާއިރާގެ ކުރީގެ މެމްބަރު ޔާސިރު އަބްދުއްލަތީފާއި ދާންދޫ ދާއިރާގެ ކުރީގެ މެމްބަރު ޔައުގޫބު އަބްދުﷲ އާއި މާފުށީ ކައުންސިލްގެ ރައީސް ހަސަން ސޮލާހް ވެސް ހިމެނިވަޑައިގަންނަވަ އެވެ.
އެމްޑީޕީގެ މުޒާހަރާއާ ގުޅިގެން ބައެއް މީހުންގެ މައްޗަށް ޖިނާއީ ތަހުގީގެއް ހިންގަމުން ދާއިރު، އެ ޕާޓީން ދަނީ އަންނަ މަހުގެ 17 ވަނަ ދުވަހު މާލޭގައި ބޮޑު މުޒާހަރާއެއް ބާއްވަން ތައްޔާރުވަމުންނެވެ.