21 އޮކްޓޯބަރ 2025 - 13:56
ބެލްޖިއަމްގެ ބްރަސެލްސްގައި މިއަދު ބޭއްވި ވޯލްޑް ޓޫރިޒަމް އެވޯޑުގައި ރާއްޖެ އަށް ބެސްޓް ބީޗް ޑެސްޓިނޭޝަންގެ އެވޯޑް ލިބިއްޖެ އެވެ.
ގްލޯބަލް ޓޫރިޒަމް ފޯރަމް އެނުއަލް މީޓިން 2025 ގައި ބޭއްވި އެ އެވޯޑް ހަފްލާގައި ރައީސް ޑރ. މުހައްމަދު މުއިއްޒުގެ ފަރާތްޕުޅުން އެ އެވޯޑާ ހަވާލުވެވަޑައިގަތީ ކުރީގެ ރައީސް އަދި ރައީސް މުއިއްޒުގެ މިހާރު ސްޕެޝަލް އެންވޯއީ ޑރ. މުހައްމަދު ވަހީދު ހަސަން މަނިކެވެ.
ޑރ. ވަހީދު ވަނީ ރާއްޖޭގެ ރީތި ދޮންވެލި ބީޗްތަކާއި ސާފު މޫދާއި ކަނޑުގެ ދިރުންތައް ބައިނަލްއަގުވާމީ ފެންވަރެއްގައި ފާހަގަވެ، އެފަދަ އެވޯޑެއް ރާއްޖެއަށް ލިބިފައިވާތީ އެކަމަށް ޝުކުރު އަދާ ކުރައްވައިފަ އެވެ.
މިއަހަރުގެ ގްލޯބަލް ޓޫރިޒަމް އެނުއަލް މީޓިން ބާއްވާފައިވަނީ "ރީޑިފައިނިން ޓޫރިޒަމް އިން އަ ޗޭންޖިން ވޯލްޑް" މި ޝިއާރުގެ ދަށުންނެވެ. މި ހަފްލާގައި ދުނިޔޭގެ ޓޫރިޒަމްގެ ދާއިރާގައި ހަރަކާތްތެރިވާ ލީޑަރުންނާއި ސިޔާސަތު ކަނޑައަޅާ ފަރާތްތަކާއި ޓޫރިޒަމްގެ ސިނާއަތުގައި ހަރަކާތްތެރިވާ ފަރާތްތަކުން ބައިވެރިވެ، އެ ދާއިރާ ތަރައްގީ ކުރެވެން ހުރި ދާއިރާތަކުން ވަނީ މަޝްވަރާކޮށްފަ އެވެ.
ރައީސް އޮފީހުން ބުނީ ރާއްޖެއަކީ ކަނޑުފަޅާއި ގުދުރަތީ ދިރުންތައް ރައްކާތެރިކުރަން މަސައްކަތްކުރާ ގައުމެއް ކަމަށެވެ.