21 އޮކްޓޯބަރ 2025 - 11:30
ގައުމީ ޔުނިވާސިޓީ އެމްއެންޔޫ އިން ލ. ހުޅިމެންދޫގައި ހަދާ ރިސޯޓާއި ހޮޓެލް ސްކޫލްގެ އެއްބަސްވުމެއްގައި އެމްއޭސީއެލްއާ އެކު މިއަދު ސޮއިކޮށްފި އެވެ.
އެ އެއްބަސްވުމުގައި ސޮއިކުރެއްވީ ރައީސް ޑރ. މުހައްމަދު މުއިއްޒު ލ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި މިއަދު ހެނދުނު މާމެންދުއަށް ވަޑައިގެން އެ ރަށުގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގަ އެވެ.
އެމްްއޭސީއެލްގެ ފަރާތުން އެ އެއްބަސްވުމުގައި ސޮއިކުރެއްވީ މެނޭޖިން ޑިރެކްޓަރު އިބްރާހިމް ޝަރީފް މުހައްމަދެވެ. އަދި އެމްއެންޔޫގެ ފަރާތުން ސޮއިކުރެއްވީ ޑެޕިއުޓީ ވައިސް ޗާންސެލަރު ރަހީމާ އަބްދުއްރަހީމެވެ.
ހުޅިމެންދޫގައި ރިސޯޓަކާއި ޓްރެއިނިން ސްކޫލެއް އަޅަން ޓޫރިޒަމް މިނިސްޓްރީން އެމްއެންޔޫއާ ހަވާލުކުރީ މިދިޔަ އަހަރު ނޮވެމްބަރު މަހުގެ 10 ވަނަ ދުވަހު އެވެ. އެއީ، އެ ރަށުގައި ޓޫރިސްޓުންނަށް ހިދުމަތް ދިނުމުގެ އިތުރުން އެ ދާއިރާއިން މީހުންނަށް ކިޔަވައިދީ ފަންނީ މީހުން ބިނާކުރުމަށެވެ.
މިއަދުގެ ޖަލްސާގައި ރައީސް ވިދާޅުވީ ހުޅިމެންދޫގައި ހަދާނީ ފަސް ތަރީގެ ރިސޯޓެއް ކަމަށެވެ. އަދި އެ ރިސޯޓުގައި ހަދާ ހޮޓެލް ސްކޫލް ނުވަތަ ޓްރެއިން ސްކޫލަކީ ހޮސްޕިޓަލިޓީ ދާއިރާގެ ފަންނީ މީހުން ބިނާކުރުމަށް ހަދާ އެންމެ މަތީ ފެންވަރުގެ ތަނަކަށް ވާނެ ކަމަށް ވެސް ރައީސް ވިދާޅުވި އެވެ.
"މިއީ އަޅުގަނޑު ރިޔާސީ އިންތިހާބުގައި ވީ ވައުދު ފުއްދުމަށް ހަވާލުކުރެވުނު މަޝްރޫއެއް،" ރައީސް ވިދާޅުވި އެވެ.
ރައީސް ވިދާޅުވީ އެ މަޝްރޫއުގެ ސަބަބުން އެ ރަށާއި އެ އަތޮޅާއި މުޅި ރާއްޖޭގެ ޓޫރިޒަމް ސިނާއަތަށް ފައިދާކުރާނެ ކަމަށެވެ.
އެ މަޝްރޫއު ކުރިއަށް ގެންދަން އެމްއޭސީއެލްއާ ހަވާލުކުރީ އެ ކުންފުންޏަކީ މިހާރު ވެސް، މި ދާއިރާގެ މަސައްކަތްތައް ކުރަމުންދާ ކުންފުންޏަކަށް ވާތީ ކަމަށާއި މ. އަތޮޅުގައި މިހާރު ވެސް އެ ކުންފުނިން ވަރަށް ކާމިޔާބު ރިސޯޓެއް ހިންގަމުން އަންނަ ކަމަށް ރައީސް ވިދާޅުވި އެވެ.
އެމްއޭސީއެލް އާއި ސިންގަޕޫރުގެ ޗަންގީ އެއާޕޯޓް ސާވިސް ކުންފުނި ގުޅިގެން މ. އަތޮޅުގައި ރިސޯޓެއް ހިންގަ އެވެ. އެއީ މަޑިފުށި ޕްރައިވެޓް އައިލެންޑް ރިސޯޓެވެ.