29 މާޗް 2017 - 09:30
އޭޝިއަން ކަޕް ކޮލިފައިންގައި ރޭ ފަލަސްތީން އަތުން 3-0 އިން ރާއްޖެ ބަލިވި މެޗު އެނބުރިގެން ދިޔައީ އެންމެ ފަސް މިނެޓަށް ރާއްޖޭގެ ކުޅުންތެރިންގެ ކޮންސެންޓްރޭޝަން ގެއްލިގެން ކަމަށާއި މި މެޗުން ބަލިވުމުގެ ފުރިހަމަ ޒިންމާ އޭނާ ނަގާ ކަމަށް ގައުމީ ކޯޗު ޑަރެން ސްޓެވާޓް ބުނެފި އެވެ.
ރޭގެ މެޗުގެ ފުރަތަމަ ހާފު 0-0 އިން އެއްވަރުވެގެން ނިމިގެން ދިޔައިރު ފަލަސްތީނުން ފުރަތަމަ ދެ ލަނޑު ޖެހީ 62 ވަނަ މިނެޓާއި 64 ވަނަ މިނެޓުގަ އެެވެ. އަދި ފަހު ލަނޑު ވައްދާލީ އިތުރު ވަގުތުގެ ތެރޭގަ އެވެ.
"އަހަރެމެން އުއްމީދުކޮށްގެން ތިބީ މަދުވެގެން ޕޮއިންޓަކަށް. އަހަރެން ވިސްނައިގެން ތިބީ މެޗުގެ ބޮޑުބައި ފަލަސްތީން ހިފެހެއްޓުމަށް ފަހު، ފަހުކޮޅު އެ ޓީމުގެ ވަރުބަލިވުމުން ހަލުވި ކުޅުންތެރިން އަރުވައިގެން ހަމަލާތައް ދޭން،" ސްޓެވާޓް ބުންޏެވެ.
ސްޓެވާޓް ބުނީ އެކަމަކު އެއާ ހިލާފަށް ފުރަތަމަ ހާފުގައި ރާއްޖެ ފެނިގެން ދިޔައީ ވަރުގަދަކޮށް ކަމަށާއި އެގޮތުން ފަލަސްތީނަށް ވުރެ ގިނަ ފުރުސަތުތައް ތަނަވަސްކުރި ކަމަށެވެ. އެކަމަކު ދެ ވަނަ ހާފު ފަށާއިގެން އެންމެ ފަސް މިނެޓުގެ ތެރޭގައި މެޗު އެނބުރިގެން ދިޔަ ކަމަށެވެ.
"ސެންޓޭ އުފައްދަން އުޅުނު ހަމަލާއެއްގައި އޭނާ އަތުން ބޯޅަ ދޫވެގެން ދިޔައީ. އެއީ މައްސަލައެއް ނޫން. އެކަމަކު އެ ބޯޅަ ދޫވެގެން އެދިޔަ ގޮތަށް އަހަރެމެން އަތުން ކޮންސެންޓްރޭޝަން ގެއްލިގެން ފަސް ވަރަކަށް މިނެޓަށް. އަދި ދެ ވަނަ ގޯލް ވަން. ދެ ވަނަ ހާފުގައި ރާއްޖޭގެ ކުޅުންތެރިން ފެނުނީ ވަރުބަލިކޮށް. މެޗު ފިޓްނަސްގެ ބައި ދަށްކޮށް ދިޔައީ،" ސްްޓެވާޓް ބުންޏެވެ.
ކޯޗު ބުނީ އޭނާ އަށް ބަދަލުތަކެއް ގެނެވުނީ ތަންކޮޅެއް ލަހުން ކަމަށާއި އެ ބަދަލުތައް އެއަށް ވުރެ ކުރިން ގެނެވުނު ނަމަ ކޮންމެސް ބަދަލެއް ގެނެވުނީސް ކަމަށެވެ.
"އަހަރެން ނުބުނަން ބަދަލުތަކާ އެކު މޮޅުވާނެޔެކޭ. އެކަމަކު ތަފާތެއް ގެނެވުނީސް ޓެކްޓިކަލް ބަދަލުތައް އަވަސްވި ނަމަ. އެކަމުގެ ޒިންމާ އަހަރެން ނަގަން. ކުޅުންތެރިންނާ މެދު އެއްވެސް ޝަކުވާއެއް ނެތް. ކުޅުންތެރިންގެ މަސައްކަތާއި ކުރި ހިތްވަރާއި ގައުމަށްޓަކައި ކުޅުނު ކުޅުމާ މެދު ފަހުރުވެރިވޭ. މި މެޗުން ބަލިވުމުގެ ފުރިހަމަ ޒިންމާ ނަގާނީ އަހަރެން،" ސްޓެވާޓް ބުންޏެވެ.
ކޯޗު ބުނީ އިތުބާރު ވާތު ބެކް މުހައްމަދު ރަޝީދު (ހޮކޭ) ނޭރުވީ އޭނާ އަށް ނޭވާލުމުގެ މައްސަލައެއް ކުރިމަތިވެފައިވާތީ ޑޮކްޓަރުންގެ ލަފާގެ މަތިން ކަމަށެވެ.
ކޯޗު ބުނީ މި މެޗުން ބަލިވުމަކީ ފަހަތަށް އެޅި ފިޔަވަޅެއް ކަމަށާއި އެކަމަކު ބޫޓާނާ ދެކޮޅަށް ކުޅޭ ދެ މެޗުން ހަ ޕޮއިންޓް ހޯދިއްޖެ ނަމަ އަދިވެސް ރާއްޖެ އޮންނާނީ ރަނގަޅު ހިސާބެއްގައި ކަމަށާއި އެހިސާބުން އެހެން ޓީމުތަކާ ދެކޮޅަށް ހިތްވަރުކޮށް ރާއްޖެ އަށް އަދިވެސް ކުރިއަށް ދެވޭނެ ކަމަށް ގަބޫލުކުރާ ކަމަށެވެ.
"ކުރިއަށް ހުރީ ވަރުގަދަ ޓީމުތަކާ ދެކޮޅަށް ވަރުގަދަ މެޗުތަކެއް،" ސްޓެވާޓް ބުންޏެވެ. "މި މެޗުގެ ފުރަތަމަ ހާފުން ވަރަށް ގިނަ ޕޮޒިޓިވް ކަންތައްތަކެއް ނެގިދާނެ އަހަރެމެންނަށް."