18 އޮކްޓޯބަރ 2025 - 12:38
ނޫސްވެރިޔާ އަހްމަދު ރިލްވާން ގެއްލުވާލުމާއި ބްލޮގަރު ޔާމީން ރަޝީދުގެ މަރާ ގުޅިގެން މަރު ކޮމިޝަނުން ކުރި ތަހުގީގުގައި ހައްޔަރުކުރި އަހްމަދު މުއާޒު (ގަޓު މުއާ) ބަދަލު ހޯދަން ސިވިލް ކޯޓަށް ހުށަހެޅި ދައުވާ ކުރިއަށް ނުގެންދެވޭނެ ކަމަށް ނިންމި މައްސަލަ އޭނާގެ ފަރާތުން ހައި ކޯޓުގައި އިސްތިއުނާފުކޮށްފި އެވެ.
ރިލްވާން ގެއްލުވާލުމާއި ޔާމީން ރަޝީދު މަރާލުމުގެ މައްސަލަ މަރު ކޮމިޝަނުން ތަހުގީގުކޮށް އެކަމާ ގުޅިގެން މ. ލެގޫންވިއު، އިސްމާއިލް އަބްދުއްރަހީމް (އިސޫ) އަދި މއ. ފާގަފިލާ، އަހްމަދު އިސްމާއިލް (އަހަނދު)އާ އެކު މުއާޒު ހައްޔަރުކުރީ ޖޫން 26، 2022 ގަ އެވެ.
ޝަރީއަތް ނިމެންދެން ބަންދުކުރި މުއާޒު ބަންދުން ދޫކޮށްލީ 2023 ވަނަ އަހަރުގެ ތެރޭގަ އެވެ. ޓެރަރިޒަމްގެ އަމަލެއް ކުރުމަށް ރޭވުމުގެ ދައުވާ މުއާޒުގެ މައްޗަށް ކުރިއިރު އެ ދައުވާ ސާބިތުވާ މިންވަރަށް ހެކި ނެތް ކަމަށް ބުނެ ކްރިމިނަލް ކޯޓުން އެ މައްސަލަ ބޭރުކޮށްލީ އެވެ.
އެހެންވެ، އޭނާ ހައްޔަރުކޮށްފައި ބެހެއްޓީ ހައްގުތައް ގެއްލޭ ގޮތަށް، ގާނޫނުތަކާ ހިލާފަށް ކަމަށް ބުނެ އެ ކަމުގެ ބަދަލު ހޯދަން މުއާޒު، ޕްރޮސިކިއުޓާ ޖެނަރަލްގެ އޮފީހާ ދެކޮޅަށް ސިވިލް ކޯޓުގައި ދައުވާކުރީ އެވެ. އަދި މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ތަހުގީގުކުރާ ކޮމިޝަނާއި އެ ކޮމިޝަންގެ ރައީސް ފަރީޝާ އަބްދުﷲ އާއި މެންބަރު މިސްބާހު އައްބާސް އަދި މެންބަރު އަހުމަދު ނާޝިދުގެ މައްޗަށް ވެސް ދައުވާކުރި އެވެ.
ދައުވާއާ ގުޅިގެން މި މައްސަލަ ސިވިލް ކޯޓަށް ބެލިދާނެ ކަމާ މެދު ޕީޖީ އޮފީހާއި ކޮމިޝަންގެ މެންބަރުން ސުވާލު އުފައްދައި އިހްތިސާސްއާ ގުޅޭ އިއުތިރާޒު ހުށަހެޅި އެވެ. ސިވިލް ކޯޓުން ހުކުމް ކުރީ މި މައްސަލަ ކުރިއަށް ނުގެންގޮސް، މައްސަލަ ކޯޓުން ބޭރުކުރާށެވެ.
ސިވިލް ކޯޓުގެ އެ ނިންމުން މުއާޒުގެ ފަރާތުން ހައި ކޯޓުގައި އިސްތިއުނާފުކޮށްފައިވާއިރު، އެ ކޯޓުގައި ވެސް އެ މައްސަލަ ކުރިއަށް ނުގެންދެވޭނެ ކަމަށް ބުނެ ދައުލަތުން އިއުތިރާޒު ވަނީ ހުށަހަޅައިފަ އެވެ. އެ އިއުތިރާޒުގައި ދައުލަތުން ބުނެފައިވަނީ ރިޔާސީ ކޮމިޝަން މިހާރު އުވާލާފައިވާތީ، އެ ކޮމިޝަނާ ދެކޮޅަށް ދައުވާ ހުށަނޭޅޭނެ ކަމަށެވެ.
އެކަމާ ގުޅޭ ގޮތުން ހައި ކޯޓުން މިދިޔަ މަހު ނިންމި ނިންމުން މިހާރު ވެބްސައިޓްގައި އާންމުކޮށްފައިވާއިރު މައްސަލަ ބައްލަވާ ފަނޑިޔާރުންގެ އިއްތިފާގުން ނިންމާފައިވަނީ އެ އިއުތިރާޒާ މެދު މުޅި މައްސަލަ ބަލައި، ހުކުމް އިއްވާއިރު ގޮތެއް ކަނޑައެޅުމަށެވެ. އެހެންވެ، މައްސަލައިގެ ޝަރީއަތް ހައި ކޯޓުގައި ކުރިއަށް ގެންދަން އޮތީ ނިންމައިފަ އެވެ.
މި މައްސަލާގައި ދައުލަތާ ދެކޮޅަށް ދައުވާކުރާ މުއާޒު ވަނީ މިފަހުން ސަރުކާރު ހިންގާ، ޕީއެންސީއަށް ސޮއިކޮށްފަ އެވެ.
މުއާޒުގެ ދައުވާގައި މައިގަނޑު ގޮތެއްގައި ބުނެފައިވަނީ ޕީޖީ އޮފީހާއި ކޮމިޝަނާއި މެންބަރުން ހެޔޮ ނިޔަތެއް ނެތި މުއާޒުގެ މައްޗަށް ތަހުގީގެއް ހިންގައި ދައުވާކޮށް ބަންދުކޮށްފައިވާތީ ގެއްލުމުގެ ބަދަލު ލިބެންޖެހޭ ކަމަށެވެ.
ސިވިލް ކޯޓުން ބުނީ ހެޔޮ ނިޔަތެއް ނެތި ތަހުގީގެއް ހިންގައި ދައުވާކޮށްފައިވާ ކަމަށް ބަލާނެ ނުވަތަ ކަނޑައަޅާނެ މިންގަނޑެއް ރާއްޖޭގެ ގާނޫނުތަކުގައި ނެތް ކަމަށެވެ. އެކަން އެގޮތަށް މަދަނީ މައްސަލައެއްގެ ތެރެއިން ވެސް ބަލަންޗާނީ ޕީޖީ އާއި ތަހުގީގު ކުރާ ފަރާތްތަކަށް ލިބިދޭ މިނިވަންކަމާއި އިހްތިޔާރުތަކާއި ބާރުތަކަށް ހުރަސްނޭޅޭ ގޮތަކަށް، ހަރުދަނާ އުސޫލުތަކެއްގެ ތެރެއިން ކަމަށް ހުކުމްގައިވެ އެވެ.
މި މައްސަލާގައި ކޮމިޝަނުން މަސްއޫލިއްޔަތާއި ބާރުގެ ބޭރުން ގާނޫނާ ހިލާފަށް އަމަލުކޮށްފައިވާ ކަމަށް ނުވަތަ ނުނިޔަތެއްގައި މަސައްކަތް ކޮށްފައިވާ ކަމަށް ބެލި ނަމަވެސް، އެކަމުގައި އެއްވެސް ހެއްކެއް ހުށަހަޅާފައި ނެތުމުން މިއީ ކޯޓުން ބެލިދާނެ މައްސަލައެއް ކަމަށް ދައުލަތުން ނުދެކޭ ކަމަށް ބުނެފައިވެ އެވެ. އެހެންވެ، މި މައްސަލަ ކުރިއަށް ގެންދިޔުމަށް ހުރަސްއަޅާ ކަންތައްތަކެއް ހުރިތޯ ބަލައި އެކަމުގައި ގޮތެއް ނިންމިދާނެ ކަމަށް ހުކުމްގައިވެ އެވެ.