15 އޮކްޓޯބަރ 2025 - 06:18
ނެޓްފްލިކްސްގެ ކާމިޔާބު އިނގިރޭސި ސީރީޒް "ބްރިޖަޓަން"ގެ ހަތަރު ވަނަ ސީޒަން އަންނަ އަހަރު ޖެނުއަރީ މަހު ގެނެސްދޭން ނިންމައި ފުރަތަމަ ޓީޒާ އާންމުކޮށްފި އެވެ.
ނެޓްފްލިކްސް އިން މިދިޔަ ހޯމަ ދުވަހު އެ ޓީޒާ އާންމުކޮށް ބުނީ ހަތަރު ވަނަ ސީޒަން ގެނެސްދޭނީ ދެ ބަޔަކަށް ބަހާލައިގެން ކަމަށެވެ. ފުރަތަމަ ހަތަރު އެޕިސޯޑް ސްޓްރީމްކުރަން ފަށާނީ އަންނަ އަހަރު ޖެނުއަރީ 29 އިން ފެށިގެން ކަމަށާއި ފަހު ހަތަރު އެޕިސޯޑް ސްޓްރީމްކުރަން ފަށާނީ ފެބްރުއަރީ 26 އިން ފެށިގެން ކަމަށް ނެޓްފްލިކްސް އިން ބުންޏެވެ.
"ބްރިޖަޓަން"ގެ ހަތަރު ވަނަ ސީޒަންގައި ލީޑު ރޯލުތައް ކުޅޭނީ ލޫކް ތޮމްޕްސަންގެ ބެނެޑިކްޓް ބްރިޖަޓަން ކެރެކްޓާ އާއި މި ސީރީޒަށް އަލަށް ތައާރަފުވާ ޔެރިން ހާގެ ސޯފީ ބެކްގެ ކެރެކްޓާ އެވެ.
ކްރިސް ވެން ވޫޒެންގެ މޭސްތިރިކަމުގެ ދަށުން ގެނެސްދޭ "ބްރިޖަޓަން"ގެ ޕްރޮޑިއުސަރަކީ އެމެރިކާގެ މަޝްހޫރު ޕްރޮޑިއުސަރު ޝޮންޑާ ރައިމްސް އެވެ.
މީގެ ވާހަކަ ބިނާކޮށްފައި ވަނީ ހަމަ އެ ނަމުގައި ލިޔުންތެރިޔާ ޖޫލިއާ ކްއިން ގެނެސްދިން ވާހަކައަށެވެ. މިއީ 18 ވަނަ ގަރުނުގެ ތެރޭގައި އިނގިރޭސިވިލާތުގެ މުއްސަނދި އާއިލާތަކުގެ މެދުގައި މީހުންނާ އިނުމުގެ ސަގާފަތް އޮތް ގޮތުގެ މައްޗަށް ބިނާކޮށްފައިވާ ވާހަކައެކެވެ.
މި ސީރީޒްގެ ފުރަތަމަ ތިން ސީޒަނަށް ވެސް ވަރަށް ބޮޑު ތަރުހީބެއް ލިބުނެވެ.
އެންމެފަހުން ގެނެސްދިން ސީޒަންގައި ލީޑު ރޯލުތައް ކުޅުނީ ޕެނެލޯޕް ފެތަރިންޓަން (ނިކޮލާ ކަފްލަން) އާއި ކޮލިން ބްރިޖަޓަން (ލޫކް ނިއުޓަން) އެވެ.