13 އޮކްޓޯބަރ 2025 - 20:57
ނަތީޖާ ނެރެދިނުން ފިޔަވައި އިތުރު އެއްވެސް ޝައުގުވެރިކަމެއް މި ސަރުކާރުގައި ނެތް ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ށ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގައި އެ އަތޮޅު ގޮއިދޫ ރައްޔިތުންނާ ބައްދަލުކުރައްވާ ރައީސް ވިދާޅުވީ ރައްޔިތުން ގާތަށް ދަތުރުފުޅުތައް ކުރެއްވުމުގެ ބޭނުންފުޅަކީ ރައްޔިތުންނަށްވީ ވައުދުތައް ފުއްދައިދިނުމާއި ރައްޔިތުން ބޭނުންވާ އިތުރު ކަންކަން ރައްޔިތުންގެ ފަރާތުން އަޑު އައްސަވައި އެ ކަންކަން ވެސް ކޮށްދިނުމަށް ކަމަށެވެ.
އެ ކަންކަމުން ރައްޔިތުން ބޭނުންވާ ނަތީޖާ ނެރެދިނުމަކީ މި ސަރުކާރުގެ އެންމެ ބޮޑު އަމާޒު ކަމަށް ރައީސް ވިދާޅުވި އެވެ.
"މި ސަރުކާރުގައި ނެތް، ނަތީޖާ ނެރެދިނުން ފިޔަވައި އިތުރު އެއްވެސް ޝައުގުވެރިކަމެއް. ހުރިހާ ފޯކަސްއެއް ހުރީ ނަތީޖާ ނެރެދެން،" ރައީސް މުއިއްޒު ވިދާޅުވި އެވެ.
އެ މަނިކުފާނު ވިދާޅުވީ އޭގެ ތެރޭގައި ރައްޔިތުންނަށް މީގެ ކުރިން ނުވެފައި ހުރި ކަންކަމާއި ރަނގަޅަށް ނުގޮސް ހުރި ކަންކަން ބަލައި އެ ކަންކަން ކޮށްދެއްވާނެ ކަމުގެ ޔަގީންކަން ވެސް ދެއްވާ ކަމަށެވެ.
މި އަހަރާއި އަންނަ އަހަރު ފެންނަނީ ހުރިހާ ރަށަކަށް ވެފައި ހުރި ވައުދުތައް ފުއްދަވަމުންދާތަން ކަމަށް ރައީސް ވިދާޅުވި އެވެ.
ގޮއިދު އަށް ރައީސް ވަޑައިގެން ވަނީ ބަނދަރު ތަރައްގީ ކުރުމުގެ މަސައްކަތާއި މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތުގެ އެއްބަސްވުމުގައި ވެސް މިއަދު ސޮއިކޮށްފަ އެވެ.
- 8 ކްލާސްރޫމްގެ މަސައްކަތް ނިންމައި އަންނަ ދިރާސީ އަހަރު ބޭނުންކުރަން ފަށާނެ.
- ފުޓްބޯޅަ ދަނޑު ހެދުމުގެ ފައިސާ އަންނަ އަހަރުގެ ބަޖެޓުގައި ހިމެނުން.
- ވޯލީކޯޓާއި ހޭންޑްބޯލަ ކޯޓު ހެދުން.
- ގޮއިދުއަކީ ދަނޑުވެރި ރަށަކަށް ވުމުން ދަނޑުވެރިންނަށް ބޭނުންވާ ޔުޓިލިޓީ ހިދުމަތްތައް ފޯރުކޮށްދިނުން.