11 އޮކްޓޯބަރ 2025 - 12:39
މާލީ ނިޒާމު ހަރުދަނާ ކުރުމަށްޓަކައި އެންމެ މުހިންމު އެއްޗަކީ އިތުބާރު ކަމަށާއި އެ އިތުބާރު ފެެށެނީ އެކައުންޓެންޓުންގެ މަސައްކަތާ ހިސާބުން ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.
އިންސްޓިޓިއުޓް އޮފް ޗާޓާޑް އެކައުންޓެންޓްސް އޮފް މޯލްޑިވްސް (ސީއޭ) އިން މިއަދު ފެށި "މޯލްޑިވްސް އެކައުންޓެންޓްސް ފޯރަމް 2025" ޝަރަފުވެރި ކޮށްދެއްވަމުން މިނިސްޓަރު ވިދާޅުވީ، ވިޔަފާރި އާއި މާލީ ދާއިރާ އަންނަނީ މީގެ ކުރިން ދުވަހަކު ވެސް ބަދަލު ނުވާހާ އަވަހަށް ބަދަލުވަމުން ކަމަށެވެ. ނަމަވެސް އެ ބަދަލުތަކާ އެކު، އެ ކަމެއްގެ ބޭނުންތެރިކަމަށް ބަދަލެއް ނާންނަ ކަމީ އިތުބާރު ކަމަށް ވެސް ޒަމީރު ވިދާޅުވި އެވެ.
"މާލީ ނިޒާމެއް [ހަރުދަނާކޮށް] ދަމަހައްޓައިދޭ އެއްޗަކީ އިތުބާރު، އަދި އެކަން ފެށެނީ އެކައުންޓެންޓުންގެ މަސައްކަތާ ހިސާބުން،" އޭނާ ވިދާޅުވި އެވެ.
މިނިސްޓަރު ވިދާޅުވި ގޮތުގައި އިތުބާރު ހިފޭ މާލީ މައުލޫމާތު ލިބުމުން ޒިންމާދާރުކަމާ އެކު، ދަރަނި ދޫކުރަން ބޭންކުތަކަށް މަގުފަހިވާނެ އެވެ. އިންވެސްޓަރުންނަށް ރަނގަޅު ނިމުންތައް ނިންމޭނީ ވެސް އެފަދަ މައުލޫމާތު ލިބިގެން ކަމަށް ޒަމީރު ވިދާޅުވި އެވެ.
"އަދި ސިޔާސަތު ކަނޑައަޅާ ފަރާތްތަކަށް، އިތުބާރާއި ޔަގީންކަމާ އެކު ޕްލޭން ކުރެވޭނީ ވެސް [އިތުބާރު ހުރި މާލީ މައުލޫމާތު ލިބިގެން]،" ޒަމީރު ވިދާޅުވި އެވެ.
"ސީއޭ މޯލްޑިވްސް" ރާއްޖެ އަށް އެހާ މުހިންމު ވަނީ އެ ސަބަބާ ހެދި ކަމަށް މިނިސްޓަރު ވިދާޅުވި އެވެ. އެއީ ހަމަ އެކަނި ރެގިއުލޭޓަރެއް ނޫން ކަމަށާއި އެއީ އިތުބާރާއި ނަޒާހަތްތެރިކަމުގެ ބެލެނިވެރިއެއް ކަމަށް ވެސް މިނިސްޓަރު ވިދާޅުވި އެވެ.
މި އަހަރުގެ އެކައުންޓެންޓްސް ފޯރަމްގައި 300 އަށް ވުރެ ގިނަ އެކައުންޓެންޓުން ބައިވެރިވެ އެވެ. އެމްއެންޔޫގެ އޮޑިޓޯރިއަމްގައި ކުރިއަށް ގެންދާ އެ ފޯރަމްގެ ޕްލެޓިނަމް ސްޕޮންސަރަކީ ބޭންކް އޮފް މޯލްޑިވްސް އެވެ. އަދި ގޯލްޑް ސްޕޮންސަރުންނަކީ ދިރާގާއި އެސްޓީއޯ އެވެ.
އެ ފޯރަމްގައި މާލީ ދާއިރާގެ ތަޖުރިބާކާރު އެތައް ބޭފުޅުންނެއް ތަގުރީރު ކުރައްވާނެ އެވެ.
