11 އޮކްޓޯބަރ 2025 - 10:52
އާޓީފިޝަލް އިންޓެލިޖެންސް (އޭއައި) ބޭނުންކޮށްގެން ހުރިހާ މާއްދާއެއް ކިޔަވައިދޭނެ ޓީޗަރުން ތަމްރީނު ކުރުމުގެ ކެމްޕޭނެއް އަންނަ އަހަރު ފެށުމަށް ނިންމާފައިވާ ކަމަށް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ވިދާޅުވެއްޖެ އެވެ.
ކްރޮސްރޯޑްސް މޯލްޑިވްސްގައި މިއަދާއި މާދަމާ ކުރިއަށް ގެންދާ ޕްރިންސިޕަލުންގެ މި އަހަރުގެ ކޮންފަރެންސް ފެށުމުގެ ރަސްމިއްޔާތު ޝަރަފުވެރި ކޮށްދެއްވީ ރައީސް ޑރ. މުހައްމަދު މުއިއްޒު އެވެ.
އެ ރަސްމިއްޔާތުގައި ވާހަކަ ދައްކަވަމުން އެޑިއުކޭޝަން މިނިސްޓަރު ވިދާޅުވީ ވިސްނައި ފިކުރު ކުރާ ދަރިވަރުންތަކެއް ނެތް ނަމަ ސްކޫލު މަރުހަލާ ނިންމުމަށް ފަހު، އޮއްޓަރު ހުރި ކަންތަކުގައި ޒުވާނުން އުޅޭ ތަން ނުފެންނާނެ ކަމަށެވެ.
ތައުލީމީ ނިޒާމުގައި ކުއްޖަކު ދިރިއުޅުމަށް ތައްޔާރު ކުރާއިރު އެންމެ ބޮޑު އިސްކަމެއް ދޭން ޖެހެނީ ވިސްނައި، ފިކުރު ކުރާ ކުއްޖެއް ބިނާ ކުރުމަށް ކަން ފާހަގަ ކުރައްވަމުން މިނިސްޓަރު ވިދާޅުވި ގޮތުގައި އެކަމަށް ޓީޗަރުން ތަމްރީނު ކުރަން ޖެހެ އެވެ.
އެގޮތުން އަންނަ އަހަރު އޭއައިގެ ދާއިރައިން ޓީޗަރުން ތަމްރީނު ކުރުމުގެ ޕްރޮގްރާމެއް ފެށުމަށް ތައްޔާރު ވަމުން އަންނަ ކަމަށް އޭނާ ވިދާޅުވި އެވެ.
"އަންނަ އަހަރު އޭއައި ދާއިރާ އިން ޓީޗަރުން ތަމްރީނު ކުރުމަށްޓަކައި ބޮޑު ކެމްޕޭނެއް އަޅުގަނޑުމެން ކުރިއަށް ގެންދާނަން. ރޯދަ މަހު ޕްރޮފެޝަނަލް ޑިވެލޮޕްމެންޓަށް އެކަށީގެންވާ ކަންކަން ހިމަނާފައި ވާނީ. އޭއައި ޓެކްނޮލޮޖީ ބޭނުން ކޮށްގެން އެކި މާއްދާތައް ކިޔެވުމަށް ބޭނުންވާ އުކުޅުތަކާއި އެކަމުގެ ފަންނީ ގާބިލުކަން މަތިކުރުމަށްޓަކައި ދޭން ޖެހޭ ޓްރެއިނިން މި މުއްދަތުގެ ތެރޭގައި ދިނުން،" އިސްމާއިލް ވިދާޅުވި އެވެ.
އޭއައި ބޭނުންކޮށްގެން ޓީޗަރުން ތަމްރީނު ކުރުމުގެ މައްޗަށް މީގެ ކުރިން ވެސް މިނިސްޓަރު ވާހަކަ ދައްކަވާފައިވެ އެވެ. އޭރު މިނިސްޓަރު ވިދާޅުވީ ޓެކްނޮލޮޖީގެ ބޮޑު ބަދަލަކަށް ދުނިޔެ މިސްރާބު ޖަހާފައިވާއިރު، ތަރައްގީގެ މައިދާނުގައި ރާއްޖޭގެ މުސްތަގުބަލުގެ ޖީލު ބައްޓަން ކުރަންވާނީ ޓެކްނޮލޮޖީ އަށް އަހުލުވެރި ބައެއްގެ ގޮތުގައި ކަމަށެވެ.
ތައުލީމީ ނިޒާމަށް މިއަދު ކުރިމަތިވެފައިވާ އެންމެ ބޮޑު އެއް ގޮންޖެހުމަކީ ފެންވަރު ރަނގަޅު ޓީޗަރުން އެ ދާއިރާގައި މަދުވުމުގެ މައްސަލަކަން ފާހަގަ ކުރައްވައި އިސްމާއިލް ވިދާޅުވީ، އެ މައްސަލަ ހައްލު ކުރުމަށް ރައީސް މުއިއްޒުގެ ވައުދުފުޅާ އެއްގޮތަށް އަމަލު ކުރައްވާނެ ކަމަށެވެ.