10 އޮކްޓޯބަރ 2025 - 08:41
މި އަހަރުގެ ކުރީކޮޅު މުޅި ރާއްޖެ އަށް ފައިބާ ބްރޯޑްބޭންޑުގެ ހިދުމަތް ތައާރަފު ކުރުމާ އެކު، ހައިސްޕީޑް އިންޓަނެޓް ހިދުމަތް ދޭން ފެށުން ދިރާގުން ރަސްމީކޮށް ރޭ ފާހަގަކޮށްފި އެވެ.
ރާއްޖޭގެ އެންމެ ބޮޑު އަދި އެންމެ ފުރަތަމަ މުވާސަލާތީ ކުންފުނީގެ މި ތާރީހީ ކާމިޔާބީ ފާހަގަކުރީ، ބާސެލޯ ނަސަންދުރާގައި ރޭ ބޭއްވި ހާއްސަ ރަސްމިއްޔާތެއްގަ އެވެ.
އެ ހަފުލާގައި ދިރާގުގެ ސީއީއޯ އަދި މެނޭޖިން ޑިރެކްޓަރު އިސްމާއިލް ރަޝީދު ވިދާޅުވީ، ހައި ސްޕީޑް އިންޓަނެޓް ކޮންމެ ރަށަކަށް ފޯރުކޮށްދިނުމަކީ "ޑިޖިޓަލް ރާއްޖެ" އެއް ގާއިމުކުރަން މަސައްކަތް ކުރަމުން އަންނައިރު އެއްވެސް ރަށެއްގެ އެއްވެސް ގެއެއް ބާކީ ނުކޮށް، އިންޓަނެޓުގެ ހިދުމަތް އެންމެ ފުރިހަމައަށް ދިނުން ކަމެއް ކަމަށެވެ. އަދި މިއީ ވިޔަފާރިތަކާއި މުޖުުތަމައުތައް ކުރިއަރުވައި، ބައިނަލްއަގުވާމީ ޕްލެޓްފޯމްތަކަށް އިންޓަނެޓުގެ ޒަރީއާ އިން ފަސޭހައިން ގުޅައިދީ، ވިޔަފާރިތައް ފުޅާކުރުމަށް އެހީވާނެ ކަމެއްގެ ގޮތުގައި ސިފަކުރެއްވި އެވެ.
ސީއީއޯ ވިދާޅުވީ މިއީ އެކި ދާއިރާގެ ތަރައްގީތަކަށް ވެސް ދޮރު ހުޅުވިގެން ދާނެ، އެކި ފުރުސަތުތައް ފަހިވާނެ ކާމިޔާބީއެއް ކަމަށެވެ.
"މި ކާމިޔާބީއާ އެކު އިންވެސްޓަރުންގެ އިތުބާރާއި ކޮންފިޑެންސް ރާއްޖެ އަށް ލިބިގެން ދާނެ. އަދި އިނޮވޭޝަނަށް ރަނގަޅު ފްރޭމްވޯކެއް އުފެދި ތަރައްގީގެ އިތުރު ފުރުސަތުތަކެއް ފަހިވެގެން ދާނެ،" އިސްމާއިލް ވިދާޅުވި އެވެ.
އޭނާ ފާހަގަކުރެއްވި ގޮތުގައި، މުޅި ރާއްޖެ ފައިބާ ބްރޯޑްބޭންޑުން ގުޅާލައި، އިންޓަނެޓުގެ ހިދުމަތް ދެނީ މުޅި ދުނިޔޭގައި ވެސް މަދު ގައުމަކުންނެވެ. އަދި ރާއްޖެ ފަދަ ކުޑަ ޖަޒީރާ ގައުމަކުން މި ހިދުމަތް މުޅި ރާއްޖެ އަށް ފުޅާކުރުމަކީ ދިރާގަށް ލިބުނު ބޮޑު ފަހުރެއްގެ ގޮތުގައި ސިފަކުރެއްވި އެވެ.
"މި މަސައްކަތް ކުރެވުނީ ދުރާލައި ކުރި ގިނަ މަސައްކަތްތަކުގެ ސަބަބުން. އޭގެ ތެރޭގައި ސަބްމެރިން ކޭބަލްގެ ޕްރޮޖެކްޓުތައް ހިމެނޭ،" އިސްމާއިލް ވިދާޅުވި އެވެ.
އޭނާ ވިދާޅުވީ ދިރާގުން މިހާރު މަސައްކަތްކުރަމުން އަންނަނީ އިތުރު ޑިޖިޓަލް ހިދުމަތްތައް ތައާރަފްކޮށް، ހިދުމަތްތައް ވަރުގަދަ ކުރުމަށް ކަމެށެވެ.
"އަޅުގަނޑުމެން މި މަސައްކަތް ކުރަނީ އެއްވެސް ގައުމަކަށް ބަރޯސާ ނުވެ، އިންޓަނެޓްގެ ހިދުމަތް ފޯރުކޮށްދިމަށް. އެކަމުގެ މަސައްކަތްތައް ހަލުވި ސްޕީޑުގައި ކުރިއަށް އެބަދޭ،" އިސްމާއިލް ވިދާޅުވި އެވެ.
ރޭގެ ރަސްމިއްޔާތުގައި ހޯމްލޭންޑް ސެކިއުރިޓީ މިނިސްޓަރު އަލީ އިހުސާން ވިދާޅުވީ ދިރާގުން މުޅި ރާއްޖެ އަށް ދޭން ފެށި ފައިބާ ބްރޯޑްބޭންޑު އިންޓަނެޓު ހިދުމަތަކީ މިއީ ގިނަ ގައުމުތަކަކުން ހާސިލް ކުރަން ބޭނުންވާ ކަމަކަށް ވާއިރު، މިއީ ދުނިޔޭގެ ފެންވަރުގައި ރާއްޖެ އަށް ލިބުނު ބޮޑު ކާމިޔާބީއެއް ކަމަށެވެ. އަދި އެއީ ދިރާގުގެ ތާރީހީ މަސައްކަތެއް ކަމަށް ވިދާޅުވި އެވެ.
"މިއީ ގިނަ ބަޔަކަށް އިންޓަނެޓު ހޯދުމުގައި ތަހައްމަލު ކުރަން ޖެހުނު ދަތިތައް ތާރީހުގެ ތެރެއަށް ގެންދިޔަ ބޮޑު ކާމިޔާބީއެއް. މީގެ ކުރިން ރާއްޖޭގެ ހުރިހާ ރަށަކަށް ހައި ސްޕީޑް އިންޓަނެޓް ލިބުމަކީ ހިޔާލަށް ވެސް ގެންނަން އުނދަގޫ ކަމެއް. މިއީ ގައުމީ ހިދުމަތެއް." ދިރާގުގެ މަސައްކަތްތަކަށް ތައުރީފު ކުރައްވަމުން މިނިސްޓަރު އިހުސާން ވިދާޅުވި އެވެ.
އޭނާ ވިދާޅުވި ގޮތުގައި، މިއީ ސަރުކާރުން ފަށާފައިވާ މޯލްޑިވްސް 2.0 ގެ ވެސް އެންމެ މުހިންމު އެއް ބައެވެ. އަދި ރާއްޖޭގެ އެކި ހިދުމަތްތައް ޑިޖިޓަލް ކުރުމަށް ސަރުކާރުން އަމާޒު ހިފާފައިވާއިރު މި ފަދަ "ޑިޖިޓަލް ބެކްބޯން" އެއް ގާއިމުވުމަކީ އެ މަސައްކަތްތަކަށް ވެސް ލިބުނު ކާމިޔާބެއްގެ ގޮތުގައި އޭނާ ފާހަގަކުރެއްވި އެވެ.
ދިރާގުން މުޅި ރާއްޖެ އަށް ފައިބާ ބްރޯޑްބޭންޑުގެ ހިދުމަތްތައް ދޭން ފެށުން ފާހަގަކުރުމަށް ބޭއްވި ރަސްމިއްޔާތުގައި ސަރުކާރުން ދިރާގަށް ހާއްސަ ހަނދާނީ ފިލައެއް ދިނެވެ. އަދި ދިރާގުން ވެސް މި ތާރީހީ ކާމިޔާބީ ފާހަގަކުރުމަށް ސަރުކާރަށް ހާއްސަ ފިލައެއް ދިނެވެ.
ދިރާގަކީ ރާއްޖޭގެ އެންމެ ފުރަތަމަ ޓެލެކޮމިއުނިކޭޝަން ހިދުމަތް ދޭން ފެށި ކުންފުންޏެވެ. އެ ކުންފުނިން މަސައްކަތް ކުރަމުން އަންނަނީ ޑިޖިޓަލް ރާއްޖެއަކަށް ބޭނުންވާނެ ހިދުމަތްތައް ތައާރަފު ކުރުމަށެވެ.