05 އޮކްޓޯބަރ 2025 - 10:05
ރަސްމާލެ ޑިޒައިންކޮށް، ޑީޓެއިލް މާސްޓަ ޕްލޭނެއް އެކުލަވާލަން ކޮންސަލްޓެންޓެއް ހޯދަން ފިނޭންސް މިނިސްޓްރީން އިއުލާނުކޮށްފި އެވެ.
އެ އިއުލާނުގައިވާ ގޮތުން، މާސްޓަ ޕްލޭންގެ ދަށުން އެ ސަރަހައްދުގެ އިކޮލޮޖިކަލް ސަސްޓެއިނަބިލިޓީ އާއި އިގްތިސާދީ މުހިއްމުކަމާއި ސޯޝަލް އިންކްލޫސިވިޓީއަށް އިސްކަން ދޭންޖެހޭނެ ކަމަށް ބުނެފައިވެ އެވެ. އަދި ތިމާވެއްޓާ ރައްޓެހި މޮޑެލްއެއްގެ ދަށުން ތަރައްގީގެ ޕްލޭން ރޭވުމަށް ހާއްސަކަމެއް ދިނުމަށް ވެސް ބުނެފައިވެ އެވެ.
އެކަމަށް ޝައުގުވެރިވާ ފަރާތްތަކުން ޓާމްސް އޮފް ރިފަރެންސް ހުށަހެޅުމަށް ވަނީ އެދިފަ އެވެ. އެ މަސައްކަތަށް ކޮންސަލްޓެންޓެއް ހޮވާނީ މާލިއްޔަތުގެ ގަވައިދުގައި ބަޔާންކޮށްފައިވާ ކޮލިޓީ އެންޑް ކޮސްޓް ބޭސްޑް ސިލެކްޝަން (ކިއު.ސީ.ބީ.އެސް) މެތަޑާ އެއްގޮތްވާ ގޮތުގެ މަތިން ކަމަށް އިއުލާނުގައިވެ އެވެ.
އެކަމަށް ޝައުގުވެރިވާ ފަރާތްތަކުން މިމަހުގެ 14 ވަނަ ދުވަހުގެ މެންދުރު ފަހު 2:00 ގެ ކުރިން އެކްސްޕްރެޝަން އޮފް އިންސްޓްރެސްޓް ހުށަހެޅުމަށް އެ މިނިސްޓްރީން ވަނީ އެދިފަ އެވެ.
މާލޭ ސަރަހައްދުގެ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދުމަށް ސަރުކާރުން ހިންގާ އެންމެ ބޮޑު މަޝްރޫއު، ރަސްމާލޭގެ ގާތްގަނޑަކަށް 100 ހެކްޓަރުގެ ބިން މިހާރު ވަނީ ހިއްކާފަ އެވެ. އެއީ މަޝްރޫއުގެ 10 ޕަސެންޓެވެ. ނުވަތަ ހުޅުމާލެ 1 ގެ ދެބައިކުޅަ އެއްބައަށްވުރެ ބޮޑު ސަރަހައްދެއް ކަމަށް އެޗްޑީސީން ހާމަކޮށްފައިވެ އެވެ.
ރަސްމާލެއިން 11،000 ގޯއްޗާއި 26،000 އަށްވުރެ ގިނަ ފްލެޓު ދޫކުރާނެކަން ރައީސް ޑރ. މުހައްމަދު މުއިއްޒު ވަނީ އިއުލާންކުރައްވައިފަ އެވެ. އެއީ 240،000 އަށްވުރެ ބޮޑު އާބާދީއަކަށެވެ. ގެދޮރުވެރިކަމުގެ އިތުރުން ވިޔަފާރިތަކާއި އިންޑަސްޓްރިއަލް އެކި ބޭނުންތައް އަދި ޓޫރިޒަމްގެ ތަރައްގީއަށް އެކި މަސައްކަތް އެތަނުގައި ކުރާނެ އެވެ.