01 އޮކްޓޯބަރ 2025 - 23:16
ވިކްޓަރީގެ ރައީސަކަށް މަޖިލީހުގެ ކެލާ ދާއިރާގެ މެންބަރު އަބްދުﷲ ޝަރީފް އިންތިހާބުކޮށްފި އެވެ.
ވިކްޓަރީގެ ކުރީގެ ބޯޑު އިސްތިއުފާ ދިނީ، އާ އިންތިހާބަކަށް މަގު ފަހި ކުރުމުގެ ގޮތުންނެވެ.
ސަރުކާރުގެ އެކި މަގާމުތަކުގައި ތިއްބެވި ބޭފުޅުން ވަނީ ވިކްޓަރީގެ މިފަހަރުގެ ބޯޑުގެ މަގާމުތަކަށް ވަޑައިގެންފަ އެވެ.
ހަތަރު ނައިބު ރައީސުން ތިއްބަވާ، ކްލަބްގައި ދެ ނައިބުންނަކީ ސަރުކާރުގެ އިސް މަގާމުތަކުގައި ތިއްބެވި ބޭފުޅުންނެވެ. އެއީ ހެލްތު މިނިސްޓަރު އަބްދުﷲ ނާޒިމާއި އާރްޑީސީގެ މެނޭޖިން ޑިރެކްޓަރު އިބްރާހިމް ނަޒީމް އެވެ.
ނަޒީމަކީ އަބަދުވެސް ވިކްޓަރީއާ ގާތް ބޭފުޅެކެވެ. އޭނާ ވަނީ މީގެ ކުރިން އެ ކްލަބްގެ ރައީސްކަން ވެސް ކުރައްވައިފަ އެވެ. މިއީ އެ ކްލަބްގެ ނައިބު ރައީސްކަމަށް އޭނާ ވަޑައިގެންނެވި ދެވަނަ ފަހަރެވެ.
ދެން ތިއްބެވި ދެ ނައިބު ރައީސުންނަކީ އަބްދުﷲ ވަހީދާއި އަބްދުރަހީމް ލަތީފެވެ.
ބޯޑް މެންބަރުންގެ ގޮތުގައި އެމްއެމްޕީއާރްސީގެ މެނޭޖިން ޑިރެކްޓަރު އަދި ޓީޓީ އެސޯސިއޭޝަންގެ ނައިބު ރައީސްކަން ވެސް ކުރައްވާ، ކުރީގެ ޓީޓީ ކުޅުންތެރިޔާ އިބްރާހިމް ޝިއުރީ އާއި ސްޓެލްކޯގެ ކުރީގެ މެނޭޖިން ޑިރެކްޓަރު އަދި ރައީސް އޮފީހުގެ މިހާރުގެ މިނިސްޓަރު ހުސައިން ފަހްމީ އާއި އެމްއޭސީއެލްގެ ޑެޕިޔުޓީ މެނޭޖިން ޑިރެކްޓަރު މުޖުތޮބާ ލަތީފު ވެސް ހިމެނިވަޑައިގަންނަވަ އެވެ.
ބޯޑްގައި ދެން ތިއްބެވި މެންބަރުންނަކީ ވިކްޓަރީގެ ދެ ހިދުމަތްތެރިން ކަމަށްވާ، އަހްމަދު ރިޔާޒު (ގާނާ) އާއި އަހްމަދު އަރީޝް (ޕަޓޭ) އެވެ.
ބޯޑުގައި އަންހެން މެންބަރެއްގެ ގޮތުގައި އިންތިހާބުކޮށްފައި ވަނީ އާއިޝަތު ރައިހާނާ އެވެ.
ސެކްރެޓަރީ ޖެނަރަލްކަން ކުރައްވާނީ މިދިޔަ ދައުރުގައި ވެސް ވިކްޓަރީގައި މަސައްކަތް ކުރި ހުޒާމް ހުސައިން ދީދީ އެވެ. ހަޒާންދާރަކީ މުހައްމަދު މުޖާހް މުނީރެވެ.
ވިކްޓަރީގެ ބޯޑުގެ ދައުރުގެ މުއްދަތަކީ ހަތަރު އަހަރެވެ.
ވިކްޓަރީގެ ކުރީގެ ވާދަވެރިޔާ ނިއު ރޭޑިއަންޓްގެ ބޯޑްގައި ވެސް ސަރުކާރުގެ އެކި މަގާމުތަކުގައި ތިއްބެވި ބޭފުޅުންނާއި ވެރިކަން ކުރާ ޕީއެންސީގެ މަޖިލިސް މެންބަރުން ހިމެނި ވަޑައިގަންނަވަ އެވެ.