01 އޮކްޓޯބަރ 2025 - 10:31
ޖަޒީރާ ކުދިކުދި ރަށްތަކުގައި އެއް ރަށުގެ ހާލު އަނެއް ރަށަށް ނޭނގި ތިއްބާ, އެ ދުރުމިން ކައިރި ކޮށްދީ, މުޅި ރާއްޖެ ގުޅުވައިދިން ކުންފުންޏަކީ ދިރާގެވެ. އެއީ މެއި އިނގިރޭސި ވިލާތުގެ ކޭބަލް އެންޑް ވަޔަލެސް ކުންފުންޏާ އެކު ދިވެހި ސަރުކާރުން ވި އެއްބަސްވުމެއްގެ ދަށުން 1988 ގައި ރަޖިސްޓަރީ ކުރި ކުންފުންޏެކެވެ.
އެ އަހަރުގެ އޮކްޓޯބަރު މަހު, އެ ކުންފުނީގެ މަސައްކަތް ފަށައިގެން އެ ހިދުމަތް ކުޑަ ދުވަސްކޮޅެއްގެ ތެރޭގައި އަތޮޅުތަކަށް ފުޅާކުރި އެވެ. އެ އަށް ފަހު ދެން ދިރާގުން މަސައްކަތް ފެށީ ދިވެހިންނާއި ދުނިޔެއާ ގުޅުވައިދިނުމަށް އިންޓަނެޓުގެ ހިދުމަތް ތައާރަފް ކުރުމަށެވެ. އެ ކުންފުނިން އެ މަސައްކަތް ކާމިޔާބުކޮށް, 1996 ވަނަ އަހަރު އިންޓަނެޓުގެ ހިދުމަތް ރާއްޖޭގައި ދޭން ފެށި އެވެ.
ރާއްޖޭގެ ޓެލެކޮމިއުނިކޭޝަން ސިނާއަތުގެ މޭސްތިރިއެއްގެ ގޮތުން އެ ކުންފުނިން މިދިޔަ 37 އަހަރު މަސައްކަތް ކުރަމުން އައީ ދިވެހިންގެ ގުޅުން ދަމަހައްޓައި، އެ ގުޅުން އިތުރަށް ކުރިއަރުވައި، އަލަށް ތައާރަފްވަމުން ދިޔަ ޓެކްނޮލޮޖީ ރާއްޖެއާ ހަމައަށް ފޯރުކޮށްދިނުމަށެވެ. އެގޮތުން ދިރާގުން 1997 ވަނަ އަހަރު މޮބައިލް ފޯނުގެ ހިދުމަތް ތައާރަފްކުރި އެވެ. އަދި 2008 ވަނަ އަހަރާ ހަމައަށް އައި އިރު އެކުންފުނިން މީހުން ދިރިއުޅޭ ހުރިހާ ރަށަކަށް މޮބައިލް ކަވަރެޖް ފުޅާކުރި އެވެ.
ދުނިޔެ އަށް ޓެކްނޮލިޖީގެ ރޮނގުން އަންނަމުންދާ ބޮޑެތި ހަލުވި ކުރިއެރުންތަކާ އެއް ހަމައެއްގައި ދެމި އޮތުމަށް ދިރާގަކީ ގިނަ މަސައްކަތްތަކެއް ކުރަމުންދާ ކުންފުންޏެކެވެ.
ޑިޖިޓަލް ރާއްޖޭގެ ތަސައްވުރާ އެކު އެ ކުންފުނިން އަމާޒު ހިފާފައި ހުރީ ރާއްޖޭގެ ޑިޖިޓަލް ތަރައްގީ އާއި ކުރިއެރުމުގެ އެންމެ ބޮޑު އެއް ހިއްސާދާރަށް ވުމަށެވެ. އެ އަމާޒުގައި ދިރާގުން އަންނަނީ ކޮންމެ އަހަރަކު ވެސް މުހިންމު ލަނޑުދަނޑިތަކެއް ހާސިލް ކުރަމުންނެވެ. މިދިޔަ އަހަރުގެ ތެރޭގައި އެކަނި ވެސް, މި ފަދަ މުހިންމު ގިނަ ލަނޑުދަނޑިތަކެއް އެ ކުންފުނިން ވަނީ ހާސިލްކޮށްފަ އެވެ.
- ރާއްޖޭގައި މީހުން ދިރިއުޅޭ ހުރިހާ ރަށަކަށް ދިރާގު ފައިބަރ ބްރޮޑްބޭންޑް ހިދުމަތް ފޯރުކޮށްދީ, ރާއްޖޭގެ ކޮންމެ ގޭބީސީއަކަށް ވެސް ހައި ސްޕީޑް އިންޓަނެޓުގެ ހިދުމަތް ދިނުން:
ދިރާގަކީ ރާއްޖޭގައި އިންޓަނެޓުގެ ހިދުމަތް މީހުން ދިރިއުޅޭ ހުރިހާ ރަށެއްގައި ދޭން ފެށި ފުރަތަމަ ކުންފުންޏެވެ. ރާއްޖެ ފަދަ ޖަޒީރާ ގައުމެއްގައި ފައިބާ ހިދުމަތް ހުރިހާ ރަށަކަށް ތައާރަފް ކުރުމަކީ ބޮޑު ގޮންޖެހުމެއް ކަމަށް ވިޔަސް އެ ކުންފުނިން ވަނީ މިކަން ހާސިލް ކޮށްފަ އެވެ. މިއީ ކުރިއަރާފައިވާ ގައުމުތަކުގައި ވެސް މީހުން މަދު، ދުރު ހިސާބުތަކާއި ޖަޒީރާ ތަންތަނުގައި ތައާރަފްކުރަން ދަތި، އުނދަގޫ ކަމެކެވެ.
- ރާއްޖޭގެ އާބާދީގެ 73 ޕަސެންޓަށް 5ޖީގެ ހިދުމަތް ފުޅާކުރުން.
- ރާއްޖޭގެ އެންމެ ފުރަތަމަ ޓިއާ-4 ސެޓިފިކޭޝަން ހޯދައިފައިވާ ޑޭޓާ ސެންޓަރު ހުޅުވުން:
މިއީ އަޕްޓައިމް އިންސްޓިޓިއުޓް އިން ޑޭޓާ ސެންޓާ ރިލައިބިލިޓީ އަށް ކަނޑައަޅާފައިވާ އެންމެ މަތީ މިންގަނޑުގެ ތަނެކެވެ. މި ސެންޓަރު މެދުވެރިކޮށް ވިޔަފާރިތަކަށް ރައްކާތެރި، ދުނިޔޭގެ ފެންވަރުގެ ކްލައުޑް ހިދުމަތްތައް ފޯރުކޮށްދީ، ރާއްޖޭގެ ޑިޖިޓަލް އިންފްރާސްޓްރަކްޗާ އިތުރަށް ހަރުދަނާ ކުރުމަށް މަގުފަހިވާނެ އެވެ.
- ސީ-މީ-ވީ 6 ސަބްމެރިން ކޭބަލް ރާއްޖެ އަށް ގުޅާލައި ރާއްޖެ އާއި ދުނިޔޭގެ އެހެން ގައުމުތަކާ ދެމެދު އޮތް ކަނެކްޓިވިޓީ އިތުރަށް ވަރުގަދަކުރުމުގެ މަސައްކަތް.
- އޫކްލާ ސްޕީޑް ޓެސްޓްގެ ފަރާތުން ދޭ 'ފާސްޓެސްޓް 5ޖީ ނެޓްވޯކް އިން މޯލްޑިވްސް' އެވޯޑު ކާމިޔާބު ކުރުން.
- ޒަމާނީ އާ ހިދުމަތްތަކާ އެކު އީ-ވޮލެޓް, "ދިރާގުޕޭ"ގެ އާ ޕްލެޓްފޯމް ތައާރަފްކުރުން.
މުވާސަލަތީ ގޮތުން ހޯދި ގިނަ ކާމިޔާބީތަކުގެ އިތުރުން ދިރާގަކީ ރާއްޖޭގައި ޒުވާނުން ބާރުވެރިކުރުވައި ޒުވާނުންނަށް އެކި ދާއިރާތަކުން ފުރުސަތުތައް ފަހިކޮށްދިނުމަށް އެންމެ ބޮޑަށް މަސައްކަތްކުރާ އެއް ކުންފުންޏެވެ. ޒުވާން ގޭމަރުން ބާރުވެރި ކުރުވުމަށް ދިރާގުގެ ގޭމިން ޕްލެޑްފޯމް ދިރާގު ގޭމާސް ގިލްޑް (ޑީޖީޖީ)އިން ވަނީ މިދިޔަ އަހަރު ބޮޑެތި ކާމިޔާބީތަކެއް ހޯދައިފަ އެވެ. ރާއްޖޭގައި ބޭއްވި އެންމެ ބޮޑު އެއް ގޭމިން ފެސްޓިވަލް ޑީޖީޖީއިން ބާއްވާ, ރާއްޖޭގެ އެކި ހިސާބުތަކުގައި ދިރިއުޅޭ ގޭމަރުންނާ ގުޅުވައިދިނުމަށް މުހިންމު މަސައްކަތްތަކެއް ވަނީ ކޮށްފަ އެވެ.
ގޭމިންގެ ދާއިރާގެ އިތުރުން ދިރާގުން ވަނީ ކުޅިވަރުގެ އެކި ދާއިރާތައް ކުރިއެރުވުމަށް, އެކި ކުޅިވަރު ޖަމިއްޔާތަކަށް އެކި ގޮތްގޮތުން އެހީތެރިކަން ފޯރުކޮށްދީފަ އެވެ. އެކި މުބާރާތްތައް ބޭއްވުމަށް ވެސް ދިރާގުން ވަނީ އެހީވެ ދީފަ އެވެ. އޭގެ އިތުރުން ރާއްޖޭގެ ތަރައްގީ އާއި އިގްތިސާދާ ގުޅޭ އެކި ދާއިރާތަކާއި އިލްމީ އެކި ދާއިރާތައް ކުރިއރުވުމުގައި ދިރާގުން ވަނީ އެހީތެރިކަން ފޯރުކޮށްދީފަ އެވެ.
ދިރާގަކީ މުވާސަލަތީ ހިދުމަތުގެ ޒަރީއާ އިން ދިވެހިން ގުޅުވައި ދިނުމުގެ އިތުރުން, އިޖުތިމާއީ ޒިންމާގެ އެކި މަސައްކަތްތަކުގެ ތެރެއިން މުޖުތަމައު ގުޅައިދޭ ބައިވެރިއެކެވެ. އެއީ ކަސްޓަމަރުންނާ ގާތް ގުޅުމެއް ބާއްވާ, ކަސްޓަމަރުންގެ އަގުވަޒަން ކުރުމަށް އަގުހުރި ގިނަ ފުރުސަތުތަކެއް ހޯދައިދޭ ކުންފުންޏެކެވެ. މިދިޔަ 37 އަހަރުގެ ކާމިޔާބީގެ ސިއްރަކީ އެއީ އެވެ.