29 ސެޕްޓެމްބަރ 2025 - 14:05
ބޭންކް އޮފް މޯލްޑިވްސްގެ ކްރެޑިޓް ކާޑުތަކުގެ ލިމިޓް، އަންނަ އަހަރުގެ ފެބްރުއަރީ މަހުން ފެށިގެން ބޮޑުކުރަން ނިންމައިފި އެވެ.
ރައީސް ޑރ. މުހައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވި ގޮތުގައި ކްރެޑިޓް ކާޑުން މަހަކު ބޭނުންކުރެވޭ ޑޮލަރު ލިމިޓު ބޮޑު ކުރުމަށް ސަރުކާރުން ކުރަމުންދާ މަސައްކަތުގެ ތެރެއިން، 1 ފެބްރުއަރީ 2026 އިން ފެށިގެން ބީއެމްއެލްގެ ކްލެސިކް ކާޑުގެ ލިމިޓް 750 ޑޮލަރުން 1400 ޑޮލަރަށް ބޮޑުވާނެ އެވެ.
މީގެ އިތުރުން ގޯލްޑް ކާޑުގެ ލިމިޓް 750 ޑޮލަރުން 1500 ޑޮލަރަށް އަދި ޕްލެޓިނަމް ކާޑުގެ ލިމިޓް 1،500 ޑޮލަރުން 2،000 ޑޮލަރަށް ބޮޑުކުރާނެ ކަމަށް ވެސް ވިދާޅުވެފައިވެ އެވެ.
މި އަހަރުގެ ނޮވެމްބަރު 11 އިން ފެށިގެން ބީއެމްއެލްގެ ޑެބިޓް ކާޑުތަކުން ޕީއޯއެސް މެދުވެރިކޮށް ރާއްޖެއިން ބޭރުން ފައިސާ ދެއްކޭ އަދަދު 500 ޑޮލަރުން 1،000 ޑޮލަރަށް އިތުރު ކުރަން ވެސް މިހާރު ވަނީ ނިންމައިފަ އެވެ.
މީގެ އިތުރުން، ނޮވެމްބަރު 11 އިން ފެށިގެން ވަނީ އެއާލައިންތަކުން ޓިކެޓް ގަތުމަށާއި ރާއްޖެއިން ބޭރުގައި ހޮޓަލަށް ޑެބިޓް ކާޑުން ފައިސާ ދެއްކޭ އަދަދު 3،000 ޑޮލަރަށް ބޮޑު ކުރަން ވެސް ނިންމައިފަ އެވެ. އަދި ބޭސްފަރުވާ އަށް ހޮސްޕިޓަލަށް ދައްކަން ޖެހޭ ފައިސާ ބޭންކުގައި އެދުމުން ހޮސްޕިޓަލަށް ޑެބިޓް ކާޑުން ފައިސާ ދެއްކޭނެ ގޮތް ވެސް އެ ތާރީހުން ފެށިގެން ހަމަޖެހޭނެ ކަމަށް ރައީސް ވަނީ މި މަހުގެ 22 ވަނަ ދުވަހު އިއުލާނުކުރައްވައިފަ އެވެ.
ބީއެމްއެލް ޑެބިޓް ކާޑުތަކުން ރާއްޖޭން ބޭރުގެ މުދަލާއި ހިދުމަތަށް ފައިސާ ދެއްކުމަށް ކުރިން ދީފައި އޮންނަ 250 ޑޮލަރުގެ މަހު ލިމިޓް 500 ޑޮލަރަށް ބޮޑުކުރީ މިދިޔަ ޖުލައި 1 އިން ފެށިގެންނެވެ.