29 ސެޕްޓެމްބަރ 2025 - 06:26
ބޮލީވުޑްގެ އެންމެ ކުޅަދާނަ އެއް ޑައިރެކްޓަރު ކަމަށްވާ ސަންޖޭ ލީލާ ބަންސާލީގެ ފިލްމަކުން އާ އެކްޓަރު އަހާން ޕާންޑޭއަށް ފުރުސަތު ލިބިފައިވާ ކަމަށް ރިޕޯޓްތައް ބުނެފި އެވެ.
އަހާން އަކީ މި އަހަރު ގެނެސްދިން އެންމެ ކާމިޔާބު ފިލްމުތަކުގެ ތެރޭގައި ހިމެނޭ އަދި ބޮކްސް އޮފީހުގައި އެންމެ ކާމިޔާބު ބޮލީވުޑްގެ ލޯބީގެ ފިލްމު "ސައްޔާރާ" އިން ދާއިރާއަށް ތައާރަފުވި ޒުވާން އެކްޓަރެކެވެ.
ބައެއް ރިޕޯޓްތައް ބުނި ގޮތުގައި، އިންޑިއާގެ މުމްބާއީގައި ހުންނަ ބަންސާލީގެ އޮފީހަށް އަހާން ވަންނަނިކޮށް ޕަޕަރާޒީންނަށް މިދިޔަ ހޮނިހިރު ދުވަހު އޭނާ ވަނީ ފެނިފަ އެވެ. އަހާން އޭނާގެ ކާރުން ފައިބައިގެން ގޮސް އެ އޮފީހަށް ވަންނަ މަންޒަރު ފެންނަ ވީޑިއޯއެއް ވެސް ސޯޝަލް މީޑިއާގައި ވަނީ އާންމުވެފަ އެވެ.
ބެލެވޭ ގޮތުގައި އަހާން އެ އޮފީހަށް ދިޔައީ ބަންސާލީގެ ފިލްމަކުން އޭނާއަށް ފުރުސަތު ލިބުމުން އެކަމާ ގުޅޭ ގޮތުން މަޝްވަރާކުރުމަށް ކަމަށް ބައެއް މީޑިއާ ރިޕޯޓުތަކުގައި ބުންޏެވެ.
ނަމަވެސް، އެ ވާހަކަތައް އަހާން އާއި ބާންސާލީ ވެސް މިހާތަނަށް ޔަގީންކޮށްދީފައި ނުވެ އެވެ.
"ސައްޔާރާ"ގެ ބޮޑު ކާމިޔާބީއަށް ފަހު އަހާން ދެން ކުޅޭ ފިލްމަކަށް އޭނާގެ ފޭނުން ވަރަށް ބޮޑަށް އަންނަނީ އިންތިޒާރުކުރަމުންނެވެ. އޭނާ މިހާތަނަށް ދެވަނަ ފިލްމަކަށް ސޮއިކޮށްފައި ނުވެ އެވެ.
ބަންސާލީ މި ދުވަސްކޮޅު ބިޒީކޮށް އުޅެނީ އަންނަ އަހަރު މާޗު 20 ގައި ގެނެސްދޭ އޭނާގެ އާ ފިލްމު "ލަވް އެންޑް ވޯ"ގެ މަސައްކަތުގަ އެވެ. އެއީ އާލިއާ ބަޓް އާއި ރަންބީރް ކަޕޫރް އަދި ވިކީ ކައުޝަލް ލީޑު ރޯލު ކުޅޭ ފިލްމެކެވެ.