26 ސެޕްޓެމްބަރ 2025 - 09:21
ރާއްޖޭގައި ގަވާއިދާ ހިލާފަށް ވިޔަފާރިކުރާ ބިދޭސީން އަތުލައިގަތުމަށް ކުރާ މަސައްކަތުގެ ދަށުން މި މަހުގެ މިހާތަނަށް މިހާތަނަށް 340 މީހަކު ޑީޕޯޓު ކޮށްފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ފ. އަތޮޅަށް މި ހަފުތާގައި ކުރެއްވި ދަތުރުފުޅުގައި އެ އަތޮޅު ނިލަންދޫގައި މިދިޔަ ހޮނިހިރު ދުވަހުގެ ރޭ ވާހަކަފުޅު ދައްކަވަމުން ރައީސް ވަނީ، ރާއްޖޭގައި މަސައްކަތްކުރާ ބިދޭސީންގެ ހާލަތު އޮތް ގޮތް އޮޅުންފިލުއްވައި ދެއްވައިފަ އެވެ. ރައީސް ވިދާޅުވި ރާއްޖޭގައި އުޅޭ ބިދޭސީންގެ އަދަދު ވަރަށް ބޮޑަށް އިތުރުވެފައިވާ ކަމަށެވެ. އެއާ އެކު، ބިދޭސީން ގަވާއިދާ ހިލާފަށް ކުރާ ވިޔަފާރި ވެސް އިތުރުވެފައިވާ ކަމަށް އެ މަނިކުފާނު ވިދާޅުވި އެވެ.
އެހެންވެ، އެ ވިޔަފާރިތަކުގައި އުޅޭ މީހުން ހޯދައި ވަގުތުން ޑީޕޯޓުކުރަން މިދިޔަ ހޯމަ ދުވަހުން ފެށިގެން އޮޕަރޭޝަން ފަށާނެކަން އިއުލާން ކުރެއްވި އެވެ. އެ އޮޕަރޭޝަން އެ ދުވަހު ވަނީ ފަށައިފަ އެވެ.
ތ. ގުރައިދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ އެ މަސައްކަތުގެ ބައެއް ތަފާސްހިސާބުތައް ހާމަކުރައްވައިފަ އެވެ.
ރެއާ ހަމައަށް 475 ވިޔަފާރިއެއް ބަލައިފާސްކޮށް، އެ ތަންތަނުގައި މަސައްކަތް ކުރަމުން ދިޔަ 955 ބިދޭސީންގެ މައުލޫމާތު ނަގާފައިވާ ކަމަށް ރައީސް މުއިއްޒު ވިދާޅުވި އެވެ. އެ މުއްދަތުގައި 108 ބިދޭސީން ހިފަހައްޓާފައިވާ ކަމަށައި އެ މީހުން ޑީޕޯޓު ކުރުމުގެ މަސައްކަތް ކުރަމުން ގެންދާކަމަށް ރައީސް ވިދާޅުވި އެވެ.
މިދިޔަ ފަސް ދުވަހު 108 ބިދޭސީން ހިފަހައްޓާފައިވާކަމަށާއި އެ މީހުން ޑީޕޯޓު ކުރުމުގެ މަސައްކަތް ކުރަމުން ގެންދާކަމަށް ވެސް ވިދާޅުވި އެވެ.
ރައީސް ހާމަކުރެއްވި ހިސާބުތަކުން އެނގޭ ގޮތުގައި މި މަހުގެ އެކަކުން އިއްޔެގެ ނިޔަލަށް 110 ބިދޭސީއަކު ވަނީ ޑީޕޯޓު ކޮށްފަ އެވެ. އަދި މަރުހަލާތައް ފުރިހަމަ ކުރަމުން ދަނިކޮށް 230 މީހަކު އަމިއްލައަށް ފުރުވައިލުމަށް އެދުމުން އެ މީހުން ވެސް ޑީޕޯޓު ކޮށްފައިވާ ކަމަށް ރައީސް ވިދާޅުވި އެވެ.
މި މަހުގެ މިހާތަނަށް 340 ބިދޭސީން ޑީޕޯޓުކޮށްފައިވާކަމަށް ރައީސް ވިދާޅުވި އެވެ.
ރާއްޖޭގައި ގަވައިދާ ހިލާފަށް އުޅޭ ބިދޭސީންގެ މައްސަލަތައް އަހަރުން އަހަރަށް ގޯސްވީ އިރު ވެސް ހައްލު ނުވާކަން ފާހަގަ ކުރައްވާ ރައީސް ވިދާޅުވީ މާލެ އާއި އެކި ތަންތަނުގައި ބިދޭސީން ވިޔަފާރި ކުރަމުން ދަނީ އެއްވެސް ބިރެއް، ޖެހިލުމެއް ވެސް ނެތި ކަމަށެވެ. އަދި މީގެ ސަބަބުން އެތައް ކުދި ވިޔަފާރިއަކަށް އޭގެ އަސަރު ކުރާކަން އެ މަނިކުފާނު ފާހަގަ ކުރެއްވި އެވެ.
"ދިވެހިން ކުރަމުން އައި ވިޔަފާރިތައް ގެއްލެމުން ދަނީ. ކުދި ވިޔަފާރިތައް ހާއްސަކޮށް. ކުދިކުދި ފިހާރަތައް ހިންގާ ފަރާތްތަކާއި މިފަދަ ފަރާތްތައް،" ރައީސް ވިދާޅުވި އެވެ.
"އަޅުގަނޑުމެން ބޭނުމެއް ނޫން މިގޮތަށް ދިވެހީންގެ މަސައްކަތުގެ ތެރެއަށް ކުރިން އެކި ގޮތްގޮތުން ނުގަވައިދުން ވައްދާފައި ތިބި ބިދޭސީން ނުގަވައިދުން އަޅުގަނޑުމެންގެ އިގްތިސާދީ ކަންކަން ހަލާކުވެގެން ދާކަށް."
ބިދޭސީންގެ މައުލޫމާތުތައް އެއްކޮށް، އެއީ ކާކު ކަމައި ކޮން ގައުމެއްގެ ރައްޔިތެއްކަން ދެނެގަތުމަށް މި ސަރުކާރުން ފަށާފައިވާ ކުރަނގި އޮޕަރޭޝަން ޕްރޮގްރާމުން އެނގުނު އެއް ކަމަކީ ރައީސް މުއިއްޒު މިދިޔަ އާދިއްތަ ދުވަހުގެ ރޭ ވިދާޅުވި ގޮތުގައި މިދިޔަ ދެ އަހަރުގެ ތެރޭގައި 178،982 ބިދޭސީން ރާއްޖޭގައި އުޅޭ ކަމެވެ.
"މިއީ ވަރަށް ބޮޑު އަދަދެއް. މިހާރު އެބަ އެނގޭ ރާއްޖޭގައި ދެ ލައްކައެއްހާ ބޭރު މީހުން އުޅޭކަން. މި އޮތް ހުރިހާ ދުވަސްވީއިރު މިކަން ނޭނގޭ،" ރައީސް ވިދާޅުވި އެވެ.
އެ މިނިސްޓްރީން ކުރިން ބުނެފައިވާ ގޮތުގައި ބަޔޯމެޓްރިކްސް އެއްކޮށް ނިމުމުން، ރާއްޖޭގައި ގަވައިދަށް ފެތިގެން މަސައްކަތް ކުރަން ބޭނުންވާ މީހުން ރެގިއުލަރައިޒް ކުރުމުގެ ޕްރޮގްރާމެއް ހިންގާނެ އެވެ.