15 ޖޫން 2016 - 10:47
ވޮޝިންޓަން (ޖޫން 15) - ފްލޮރިޑާގެ އޯލެންޑޭގެ ނައިޓް ކްލަބެއްގައި ބަޑިން ދިން ހަމަލާ އަށް ފަހު އެތައް ބަޔަކު މަރުވުމާ ގުޅިގެން ރިޕަބްލިކަން ޕާޓީގެ ނޮމިޝޭން ކާމިޔާބު ކުރައްވާފައިވާ ޑޮނަލްޑް ޓްރަމްޕް މުސްލިމުންނަށް ބޭލި ރުޅިގަނޑަށް ރައީސް ބަރަކް އޮބާމާ ރައްދު ދެއްވައިފި އެވެ.
އޮބާމާ ވިދާޅުވީ އެމެރިކާގެ މުސްލިމުންނާ މެދު ތަފާތުކޮށް ކަންތައް ކޮށްފި ނަމަ ގައުމުގެ ސަލާމަތާއި ރައްކާތެރިކަން އިތުރަށް ނާޒުކުވެ ހުޅަނގާއި އިސްލާމީ ދުނިޔެއާ ދެމެދު ބޮޑު ހުސްކަމެއް އުފެދިގެންދާނެ ކަމަށެވެ. އަދި އެމެރިކާ އަށް މުސްލިމުން ވަނުން މަނާ ކުރުމަށް ޓްރަމްޕް ގެންގުޅުއްވާ ސިޔާސަތަކީ އެމެރިކާ ބޭނުންވާ ގޮތް ނޫން ކަމަށް ވެސް ވިދާޅުވި އެވެ.
ޓްރަމްޕް ވިދާޅުވެފައި ވަނީ އެމެރިކާ އަށް މުސްލިމުން ވަނުން މަނާކުރަން ޖެހޭކަން އޯލެންޑޯގައި ދިން ބަޑީގެ ހަމަލާއިން ވެސް ދޭހަވާ ކަމަށެވެ. އަދި މިއީ ރައީސް އަށް ލިބިފައިވާ ބާރުތަކުގެ ދަށުން ނަމަވެސް މަނާ ކުރަން ޖެހޭ ކަމެއް ކަމަށް ވިދާޅުވި އެވެ.
ޓްރަމްޕުގެ ވާހަކަތަކާ މެދު ހިތްހަމަޖެހިވަޑައިނުގެން ހުންނެވި އޮބާމާ ވިދާޅުވީ އެމެރިކާ އަކީ ދީނީ މިނިވަންކަން އޮތް ގައުމެއް ކަމަށާއި އެ ކަމަށް ހުރަސްއެޅޭ ގޮތަކަށް ކަންކުރުމަކީ އެ ގައުމުގެ ގާނޫނޫ އަސާސީއާ ވެސް ޚިލާފު ކަމެއް ކަމަށެވެ. އަދި އެންމެ ފަހުން އޯލެންޑޯގައި ދިން ހަމަލާ ދީފައި ވަނީ ވެސް އެމެރިކާ އަށް އުފަން މީހެއްކަން އޮބާމާ ވަނީ ފާހަގަ ކުރައްވައިފަ އެވެ. މަތީން އުފަންވެފައި ވަނީ ޓްރަމްޕް ވެސް ދިރިއުޅޭ ނިއު ޔޯކުގަ އެވެ.
ހަމަލާ އަށް ފަހު އޮބާމާ ދެއްވި ބަޔާނުގައި "ހަރުކަށި އިސްލާމް" މި ދެ ލަފުޒު ބޭނުން ކުރައްވާފައި ނުވާތީ އޮބާމާ އިސްތިއުފާ ދެއްވަން ޖެހޭނެ ކަމަށް ޓްރަމްޕް ވިދާޅުވި ވާހަކަ އަށް ރައްދު ދެއްވަމުން އޮބާމާ ވިދާޅުވީ ބަޔަކު ތަބާވާ ދީން ގޯސް ކަމަށް ނުބުނެވޭނެ ކަމަށެވެ. އޭގެ ބަދަލުގައި އޮބާމާ ވަނީ މި ބާވަތުގެ ހަމަލާތައް ހުއްޓުވުމަށް ބަޑި ގެންގުޅުން ކޮންޓްރޯލް ކުރުމަށް އަނެއްކާވެސް ބާރު އަޅުއްވައިފަ އެވެ.
އަފްޣާނިސްތާނުގެ ދަރިކޮޅު އެމެރިކާ މީހެއް ކަމަށްވާ އުމަރު މަތީން ކްލަބުގައި ދިން ބަޑީގެ ހަމަލާގައި 49 މީހުން މަރުވި އެވެ.