23 ސެޕްޓެމްބަރ 2025 - 11:46
އީ-ލާނިން ގައިޑްލައިންގެ ދަށުން އޮންލައިންކޮށް ކިޔެވުން މަނާކޮށްފައިވާ ޓީޗިން ފަދަ ބައެއް ކޯސްތައް ރަށުގައި ތިބެގެން ކިޔެވޭނެ ގޮތް ހަމަޖެއްސުމަށް މަޝްވަރާ ކުރައްވަމުން ގެންދަވާ ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެ އެވެ.
ރައީސް މިގޮތަށް ވިދާޅުވީ އެމަނިކުފާނު ހަތަރު އަތޮޅަކަށް ކުރައްވާ ދަތުރުފުޅުގައި މ. އަތޮޅުގެ އެންމެ ފަހު ރަށެއްގެ ގޮތުގައި އެ އަތޮޅު ކޮޅުފުއްޓަށް ވަޑައިގެން ރައްޔިތުންނާ އެކު ބޭއްވެވި ބައްދަލުވުމުގަ އެވެ.
ރަށުގައި ތިބެގެން އޮންލައިންކޮށް ބައެއް ކޯސްތައް ކުރިއަށް ނުގެންދެވޭތީ އެކަމުގެ ކަންބޮޑުވުން އެ ބައްދަލުވުމުގައި ބައެއް މީހުން ފާޅުކުރި އެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ވެރިކަމުގައި 2022 ވަނަ އަހަރު އަމަލުކުރަން ފެށި "އީލާނިން ގައިޑްލައިން"ގެ ދަށުން އޮންލައިންކޮށް ބައެއް ކޯސްތައް ކުރިއަށް ނުގެންދެވޭނެ ކަމަށް ވަނީ ކަނޑައަޅައިފަ އެވެ. އޭގެތެރޭގައި، ޓީޗިން އާއި ގުރުއާން އަދި އެއާ ގުޅޭ ދާއިރާތަކާއި ޑޮކްޓަރު ކަމުގެ ކޯހާއި ޑެންޓިސްޓްރީ އާއި ޓެކްނިކަލް އަދި ވޮކޭޝަަނަލް ތައުލީމާއި އިންޖިނިއަރިން އާއި އާކިޓެކްޗާ އާއި ހާއްސަ ލައިސަންސެއް ބޭނުންވާ ހެލްތު ސައިންސަސްގެ ކޯސްތައް ހިމެނެ އެވެ.
ކޮޅުފުށީގެ ޓީޗަރަކު ވިދާޅުވީ މިގޮތަށް މަނާކޮށްފައި އޮތުމުގެ ސަބަބުން ރަށުގައި ތިބެ ކިޔެވޭނެ މަގެއް ނެތުމަކީ ވަރަށް ބޮޑު ކަންބޮޑުވުމެއް ކަމަށެވެ.
"އެމްކިޔުއޭގެ ގައިޑްލައިންތަކާ ގުޅިގެން ރަށްރަށުގައި ދިރިއުޅޭ މީހުންނަށް، ރަށުގައި ތިބެގެން މަތީ މަރުހަލާއަށް ދިއުމަށް ދަތިތަކެއް ކުރިމަތިވެފައި ވަނީ. އެ ގަވައިދުގެ ދަށުން ރަށުގައި ތިބެގެން ކިޔެވުމަށް ހުރަސް އެޅޭ. ކްލާހަށް ގޮސްގެން ނޫނީ ނުކިޔެވޭ ގޮތަށް އޮންނަނީ. ހާއްސަކޮށް ޓީޗަރުންނަށް،" އޭނާ ވިދާޅުވި އެވެ.
އޭނާ ރައީސްގެ އަރިހުން އެދިވަޑައިގަތީ މިކަމަށް ހައްލެއް ހޯއްދަވައި ދެއްވުމަށެވެ.
ރައީސް ވިދާޅުވީ ޓީޗިން ފަދަ ބައެއް ކޯސްތައް ރަށްރަށުގައި އޮންލައިންކޮށް ކިޔެވޭނެ ގޮތް ހެދުމަށް ކަމާގުޅޭ އިދާރާތަކާ އެކު މަޝްވަރާ ކުރައްވަމުން އަންނަ ކަމަށެވެ.
ޓީޗިން ދާއިރާއަކީ ރާއްޖޭގައި އެންމެ ގިނަ އަދަދެއްގެ ދަރިވަރުން މަތީ ތައުލީމް ހާސިލުކުރަމުން އަންނަ އެއް ދާއިރާ އެވެ. އެ ގަވައިދަށް އަމަލުކުރަން ފެށުމުގެ ކުރިން ރަށްރަށުގެ ސްކޫލުތަކުގައި ޓީޗަރުންގެ ގޮތުގައި ވަޒީފާ އަދާ ކުރާ ގިނަ އަދަދެއްގެ ޓީޗަރުން، ކިޔަވަމުންދިޔައީ އޭރު ހުއްދަ ދޫކޮށްފައި ހުރި ކޮލެޖް ތަކުން އޮންލައިން ކޮށެވެ.
ވަޒީފާ އަދާކުރަން ރަށުގައި ތިބެގެން އޮންލައިންކޮށް ކިޔާވާ ޓީޗަރުންގެ އަދަދު ވެސް ވަރަށް ގިނަ އެވެ.