19 ސެޕްޓެމްބަރ 2025 - 17:27
ވ. ފުލިދޫގެ ގުދުރަތީ ރީތި ގޮނޑުދޮށް ހަލާކު ނުވެ، ރައްޔިތުން ބޭނުންވި ގޮތަށް ބަނދަރުގެ މަސައްކަތް މިއަދު ފަށައިފި އެވެ.
އެ މަސައްކަތް ފެށީ ރައީސް ޑރ. މުހައްމަދު މުއިއްޒު ހަތަރު އަތޮޅެއްގެ 31 ރަށަށް މިއަދު މެންދުރު ފެއްޓެވި ދަތުރުފުޅުގެ ތެރެއިން ފުލިދޫގައި ބޭއްވި ހާއްސަ ރަސްމިއްޔާތެއްގަ އެވެ.
ގާތްގަނޑަކަށް 500 މީހުންގެ އާބާދީއެއް އޮންނަ ފުލިދޫ ބަނދަރުގެ އަމަލީ މަސައްކަތް ފައްޓަވައި ދެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބު އެވެ. އެ މަސައްކަތް ހަވާލުކުރި ކުންފުނި އެމްޓީސީސިގެ މެނޭޖިން ޑިރެކްޓަރު އަހުމަދު ސައުދީ ވެސް މިއަދުގެ ރަސްމިއްޔާތުގައި ބައިވެރިވެވަޑައިގަތެވެ.
ލޯކަލް ޓޫރިޒަމަށް މަޝްހޫރު ފުލިދޫގައި ބަނދަރުގެ ބަދަލުގައި މިހާރު ބޭނުންކުރަމުން އަންނަނީ ޖެޓީ އެކެވެ. ޖެޓީ ހަދާފައިވާ ސަރަހައްދުގައި ރީތި މޫދަކާއި ހުދު ދޮންވެލި ގަނޑެއް އޮވެ އެވެ. އެއީ ގިނަ އަދަދެއްގެ މޫދުގެ ދިރުންތައް ވެސް ޖަމާވާ ސަރަހައްދެކެވެ.
އެ ރަށުން "މިހާރު" އާ ވާހަކަ ދެއްކި ގިނަ މީހުން ބުނީ ބަނދަރެއް ނެތް ކަމުގެ އުނދަގޫ ކުރިމަތިލާން ވަރަށް ބޮޑަށް ޖެހޭ ކަމަށެވެ. މިއަދު ފެށި ބަނދަރު ހެދުމުގެ މަސައްކަތަކީ އެ ރަށުގެ ހުރިހާ ރައްޔިތުންގެ ވެސް ވަރަށް ގިނަ ދުވަސްތަކެއް ވަންދެން ދެކެމުން އައި ހުވަފެނެއް ކަމަށް ވެސް އެ މީހުން ބުންޏެވެ.
"މި ރަށުގެ ގުދުރަތީ ރީތިކަން ހަލާކު ނުކޮށް، ބަނދަރެއް ރައްޔިތުން ބޭނުންވަނީ. އެންމެ ކުރިއްސުރެ، މައުމޫނު އިރުގެ ކުރިން ފެށިގެން މި ރަށު މީހުން ކޮންމެ ސަރުކާރެއްގަ އެދޭ ބަދަރެއް ހަދައިދިނުމަށް. އެކަމަކު އެއްވެސް ސަރުކާރަކުން އެ ކަމެއް ނުކޮށްދިން،" ފުލިދޫން ވާހަކަ ދެއްކި މީހަކު ބުންޏެވެ.
"މިއީ ރައްޔިތުން ވަރަށް ގިނަ ދުވަސް ވަންދެން ދުށް ހުވަފެނެއް، މިއަދު ހަގީގަތަކަށް ވެގެން މި ދިޔައީ."
ފުލިދޫގެ އާ ބަނދަރާ އެކު، އެ ރަށަށް އަންނަ ޓޫރިސްޓުންގެ އަދަދު އިތުރުވެ، ރަށަށް ލިބޭ އާމްދަނީ ވެސް އިތުރުވާނެ ކަމަށް ރައްޔިތުން ގަބޫލުކުރެ އެވެ.
- މަސައްކަތަށް ހަރަދު ކުރަނީ ދައުލަތުގެ ބަޖެޓުން.
- މަސައްކަތުގެ އަގަކީ 63.4 މިލިއަން ރުފިޔާ
- ކޮންޓްރެކްޓުގެ މުއްދަތަކީ 465 ދުވަސް.
- ބަނދަރު ފުންކޮށް 334 މީޓަރުގެ ކީވޯލްއެއް ލާނެ. އަދި 351 މީޓަރުގެ ބޭރުތޮށި ހަދާނެ. މީގެ އިތުރުން 593 މީޓަރުގެ ރިވެޓްމަންޓު ޖަހާނެ.
- ބަނދަރުގެ ޕޭވްމަންޓާއި ފެން ހިންދާ ނިޒާމު ގާއިމްކުރުމާއި މަގު ބައްތި އާއި ނެރުބައްތި ޖަހާނެ.