17 ސެޕްޓެމްބަރ 2025 - 19:19
މީޑިއާ ރެގިއުލޭޓް ކުރާ ބިލު ތަސްދީގުނުކުރައްވަން އެދި މޯލްޑިވްސް މީޑިއާ ކައުންސިލް (އެމްއެމްސީ) އިން ރައީސް ޑރ.މުހައްމަދު މުއިއްޒަށް މިއަދު ސިޓީއެއް ފޮނުވައިފި އެވެ.
ރައީސަށް ސިޓީ ފޮނުވުމަށް ފަހު ނެރުނު ބަޔާނުގައި އެމްއެމްސީން ބުނީ ގިނަ އަދަދެއްގެ ނޫސްވެރިންނާއި މީޑިއާ މުއައްސަސާތަކާއި މަދަނީ ޖަމިއްޔާތަކުން ކަންބޮޑުވުން ފާޅުކުރަމުން ދަނިކޮށް "މީޑިއާ އެންޑް ބްރޯޑްކާސްޓިން ރެގިއުލޭޝަން ބިލް" މަޖިލީހުން ފާސްކުރުމުން ކަންބޮޑުވާ ކަމަށެވެ. ބިލު ތަސްދީގު ނުކުރައްވަން އެދި ރައީސަށް ސިޓީ ފޮނުވީ އެކަންބޮޑުވުންތަކަށް ރިއާޔަތްކުރުމެއް ނެތި ފާސްކޮށްފައިވާ ބިލަކަށް ވާތީ ކަމަށް ވެސް އެކައުންސިލުން ބުންޏެވެ.
ފުޅާދާއިރާއެއްގައި މަޝްވަރާކޮށް، ގައުމީ ފެންވަރުގައި ގިނަ ބައެއްގެ ބައިވެރިވުމާ އެކު ބިލު ދިރާސާކުރަން އެދުނު ނަމަވެސް ބިލު ފާސްކުރީ "މަރުހަލާތައް ނަމަކަށް ފުރިހަމަކޮށްގެން" ކަމަށް ދެކޭ ކަމަށް ވެސް ބަޔާނުގައި އެމްއެމްސީން ބުންޏެވެ.
"...އެކަމުގެ ސަބަބުން، ފަހަށް ފުންކޮށް ވިސްނައި ރަނގަޅަށް ބަހުސްކުރުމުގެ ފުރުސަތު ގެއްލިގެން ދިއުމަކީ އެތައް މައްސަލަތަކެއް އަލަށް ފެންމަތިވެގެން އަންނާނެ ކަމެއް ކަމަށް މިކައުންސިލުން ދެކެމެވެ،" އެމްއެމްސީގެ ބަޔާނުގައި ބުންޏެވެ.
މީޑިއާ ބިލު ގާނޫނަކަށް ވެއްޖެ ނަމަ މީޑިއާ ރެގިއުލޭޓްވުމުގެ ބަދަލުގައި ކޮންޓްރޯލުކުރެވިގެންދާނެ ކަމަށް ވެސް ބަޔާނުގައި އެ ކައުންސިލުން ބުންޏެވެ.
ނޫސްވެރިންގެ އިހުތިޖާޖުތަކާއި މުޒާހަރާތަކުގެ ތެރޭ ބިލް ފާސްކޮށްފައިވަނީ އެންމެ ފުރަތަމަ ހުށަހެޅި ގޮތް ބަދަލުކޮށް، ނޫސްވެރިންގެ ކަންބޮޑުވުން ހުރި ބައެއް މާއްދާތަކަށް ބައެއް އިސްލާހުތައް ގެނެސްފަ އެވެ. އެކަމަކު މިއީ ބަދަލުތަކެއް ގެނެސްގެން ވެސް ރަނގަޅު ނުކުރެވޭނެ ބިލެއް ކަމަށް ބުނެ އެ ބިލް މަޖިލީހުން ބޭރުކުރުމަށް ދިޔައީ ތަކުރާރުކޮށް އެދެމުންނެވެ.