17 ސެޕްޓެމްބަރ 2025 - 14:51
ދިވެހިރާއްޖޭގެ ނޭޝަނަލް ސާވިސް ޕްރޮގްރާމްގެ ފުރަތަމަ ބެޗުގެ ބައިވެރިން ތަމްރީނަށް މިއަދު ފުރައިފި އެވެ.
ރައީސް ޑރ. މުހައްމަދު މުއިއްޒު އިއުލާން ކުރެއްވި ނޭޝަނަލް ސާވިސް ޕްރޮގްރާމަކީ ހުޅުވާލީ އުމުރުން 16 އަހަރާއި 28 އަހަރާއި ދެމެދުގެ ޒުވާނުންނަށް ހާއްސަކޮށްގެން އިއުލާންކުރި ޕްރޮގްރާމެކެވެ. މިދިޔަ އޭޕްރީލް މަހު ހުޅުވާލި ފުރުސަތުގައި ޖުމްލަ 1،244 ޒުވާނުން އެ ޕްރޮގްރާމްގައި ބައިވެރިވާން ކުރިމަތިލި އެވެ.
ނޭޝަނަލް ސާވިސް އަށް މީހުން ނެގުމަށްޓަކައި ށ. ފުނަދޫ އާއި ނ. މަނަދޫ އަދި ތ. ވޭމަންޑޫގައި އިންޓަވިއު އަދި މެޑިކަލް އާއި ފިޓްނެސް ޓެސްޓުތައް ކުރިއަށް ގެންދިއުމަށްފަހު، ފުރަތަމަ ބުރުގައި 350 ބައިވެރިން ވަނީ ހޮވައިފަ އެވެ.
ޑިފެންސް މިނިސްޓްރީން ބުނީ އޭގެ ތެރެއިން ފުރަތަމަ ބެޗުގައި ހިމެނޭ 340 ބައިވެރިން ތަމްރީނު ހެދުމަށް މިއަދު ޅ. މާފިލާފުއްޓަށް ގޮސްފައިވާ ކަމަށެވެ. ސިފައިންގެ ބެލުމުގެ ދަށުގައި އޮންނަ އެ ރަށުގައި ތިން މަސް ދުވަހުގެ މުއްދަތަށް އެ މީހުން ތަމްރީނުތައް ފުރިހަމަ ކުރާނެ ކަމަށް ވެސް މިނިސްޓްރީން ބުންޏެވެ.
ނަސްރުގެ ދުވަސް ފާހަގަ ކުރުމަށް މިދިޔަ އަހަރު ބޭއްވި ރަސްމީ ޖަލްސާގައި ރައީސް ވިދާޅުވީ އެ މަނިކުފާނު ބޭނުންފުޅުވާ ގޮތަށް ސިފައިންގެ މަސައްކަތްތައް ކުރިއަރުވަން އަދިވެސް އިތުރު މީހުން ބޭނުންވާ ކަމަށެވެ. އެހެންވެ، ތައުލީމީ ރަނގަޅު ނަތީޖާ ނުލިބޭ ދަރިވަރުން 16 އަހަރުވުމުން ސިފައިންގެ އާއި ފުލުހުންގެ ތެރެއަށް ވަންނަން މަޖުބޫރުވާ ޕްރޮގްރާމެއް ފަށާނެކަން އެމަނިކުފާނު އިއުލާން ކުރެއްވި އެވެ.
ރައީސް އޭރު ވިދާޅުވީ ކުރިއަށް އޮތް ހަތަރު އަހަރުގެ ތެރޭގައި ސިފައިންގެ ވަޒީފާއަށް ކޮންމެ އަހަރަކު 1،000 މީހުން އަދި ފުލުހުންގެ ހިދުމަތް ފުޅާކުރަން އިތުރު 1،000 މީހުން ބޭނުންވާ ކަމަށެވެ.
ނޭޝަނަލް ސާވިސް ޕްރޮގްރާމް ޕްރޮގްރާމް ފަށާއިރު، ކޮންމެ ބައިވެރިއަކަށް 6،000ރ. ގެ އެލަވަންސެއް ދޭނެ އެވެ. އެހެންވެ، އެކަމަށް މަހަކު މަދުވެގެން 2.1 މިލިއަން ރުފިޔާ ހަރަދުވާނެ އެވެ.