12 ސެޕްޓެމްބަރ 2025 - 20:54
ހަމާސް ޖަމާއަތުގެ ބައިވެރިވުން ނޯންނަ ގޮތަށް ފަލަސްތީނުގެ ދައުލަތެއް އުފެއްދުމަށް ހަދާފައިވާ "ނިއު ޔޯކް ޑެލްލަރޭޝަން" އަށް ތާއީދުކުރުމަށް އދ.ގެ އާންމު މަޖިލީހުން މިއަދު ފާސްކޮށްފި އެވެ.
މިއީ ފަލަސްތީނާއި އިޒްރޭލު ވެސް ދައުލަތެއްގެ ގޮތުގައި ބަލައިގަނެ، ފަލަސްތީނުގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގައި މި ފަހުން ކުރި އެންމެ މުހިންމު މަސައްކަތުގެ ގޮތުގައި ވަނީ ބެލެވިފަ އެވެ.
ހަމާސް އިން ޣައްޒާގެ ކޮންޓްރޯލް ދޫކޮށްލައި ފަލަސްތީން އޮތޯރިޓީއަށް ހަތިޔާރު ހަވާލުކުރުމަށް ގޮވާލާ މި ގަރާރަށް އދ.ގެ 193 މެންބަރު ގައުމުގެ ތެރެއިން 142 ގައުމަކުން ވަނީ ތާއީދުކޮށް ވޯޓު ދީފަ އެވެ. ދެކޮޅަށް 10 ވޯޓު ދީފައި ވާއިރު އޭގެ ތެރޭގައި އިޒްރޭލާއި އެމެރިކާ ހިމެނެ އެވެ. ވޯޓުގައި 12 ގައުމަކުން ބައިވެރިއެއް ނުވެ އެވެ.
އޮކްޓޫބަރު 7، 2023 ގައި ހަމާސް އިން އިޒްރޭލަށް ދިން ހަމަލާ ކުށްވެރިކުރުމުގައި އދ.ގެ އިދާރާތައް ފެއިލްވެފައިވާ ކަމަށް ބުނެ އިޒްރޭލުން މި ގަރާރާ ދެކޮޅުހަދައި މިއީ ހަމާސްގެ ހަމަލާގެ ބަދަލުގައި ދޭ އިނާމެއްގެ ގޮތުގައި އައީ ސިފަކުރަމުންނެވެ. ނަމަވެސް ފްރާންސާއި ސައޫދީ އަރަބިއްޔާގެ އިސްނެގުމަށް ހުށަހެޅި ގަރާރުގައި ހަމާސް ކުށްވެރިކޮށް އަދި އިޒްރޭލުގެ ހުރިހާ އަސީރުން މިނިވަންކުރުމަށް ވެސް ގޮވާލާފައިވެ އެވެ.
"ނިއު ޔޯކް ޑެކްލަރޭޝަން އޮން ދަ ޕީސްފުލް ސެޓުލްމަންޓް އޮފް ދަ ކުއެޝަން އޮފް ފަލަސްތީން އެންޑް ދަ އިމްޕްލިމެންޓޭޝަން އޮފް ދަ ޓޫ ސްޓޭޓް ސޮލޫޝަން" ޣައްޒާގައި ހިނގަމުންދާ ހަނގުރާމަ ނިމުމަކަށް ގެނެސް، އިޒްރޭލާއި ފަލަސްތީނުގެ މައްސަލައަށް އިންސާފުވެރި، ސުލްހަވެރި އަދި ދެމެހެއްޓެނިވި ހައްލެއް ހޯދުމަށް އެންމެން ގުޅިގެން މަސައްކަތް ކުރުމަށް ވެސް ގޮވާލާފައިވެ އެވެ.
ނިއު ޔޯކް ޑެކްލަރޭޝަންގައި، އދ.ގެ ސަލާމަތީ މަޖިލީހުގެ ބެލުމުގެ ދަށުން ބައިނަލްއަގުވާމީ "ސްޓެބިލައިޒޭޝަން މިޝަނެއް" އެއް ގާއިމުކުރުމާ ބެހޭ ގޮތުން މަޝްވަރާކުރަން ކަނޑައަޅާފައިވެ އެވެ. މި މިޝަންގެ މަގްސަދަކީ ފަލަސްތީނުގެ އާންމު ރައްޔިތުންނަށް އެހީތެރިވުމާއި ސަލާމަތީ ޒިންމާތައް އަދާކުރުމުގައި ފަލަސްތީން އޮތޯރިޓީއަށް އެހީތެރިކަން ފޯރުކޮށްދިނުމެވެ.
މި ގަރާރު ފާސްކޮށްފައި މި ވަނީ ފްރާންސުން ފަލަސްތީނުގެ ދައުލަތް ބަލައިގަންނާނެ ކަމަށް އެ ގައުމުގެ ރައީސް އެމެނުއެލް މެކްރޮން ވިދާޅުވެފައިވާ، މި މަހުގެ 22 ވަނަ ދުވަހު ބާއްވާ ސަމިޓުގެ ކުރިންނެވެ. ފްރާންސާއި ސައޫދީ ގުޅިގެން އެ ސަމިޓު ބާއްވާއިރު އދ.ގެ އާންމު މަޖިލީހުގައި ފަލަސްތީނުގެ ދައުލަތް ބަލައިގަނެ އެކަން އިއުލާނުކުރާނެ ކަމަށް އެތައް ގައުމަކުން ވަނީ ބުނެފަ އެވެ.
މި ގަރާރު ފާސްކުރުމުގެ ކުރިން އިޒްރޭލުން އިއްޔެ ވަނީ ފަލަސްތީނުގެ ދައުލަތެއް ގާއިމުކުރުމަށް ހުރަސްއެޅޭ ގޮތަށް ގުދުސްއާ ޖެހިގެން، ހުޅަނގު އައްސޭރީގެ ބޮޑު ސަރަހައްދެއްގައި ޔަހޫދީން އާބާދުކުރުމުގެ މަސައްކަތް ހަލުވިކުރުމުގެ މަސައްކަތް ފަށައިފަ އެވެ. އެކަމަށް ބޭއްވި ރަސްމިއްޔާތުގައި އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ ވަނީ ފަލަސްތީނުގެ ދައުލަތެއް އުފެއްދިޔަ ނުދޭނެ ކަމަށް ބުނެ އިންޒާރުތައް ދީފަ އެވެ.