11 ސެޕްޓެމްބަރ 2025 - 01:09
އެމްޑީޕީގެ ގައުމީ މަޖިލިހުގެ މެމްބަރު އަދި ކުރީގެ ނޫސްވެރިޔާ ހުސައިން ހަސަން ރޭ ހައްޔަރުކޮށްފި އެވެ.
ފުލުހުން ބުނީ، މާލޭގައި ކުރިއަށް ގެންދިޔަ މަސްތުވާތަކެތީގެ އޮޕަރޭޝަނެއްގެ ސީނެއްގެ ތެރެއަށް ވަދެ، ފޮޓޯ އާއި ވީޑިއޯ ނަގަން ފެށުމުން ފުލުހުންގެ މަސައްކަތަށް ދަތި ނުވާނެ ގޮތަށް އަމަލު ކުރުމަށް ނަސޭހަތް ދިން ނަމަވެސް ޖަދަލުކޮށް، އެންގުމާ ހިލާފަށް ކަންކަން ކުރުމުން ހުސައިން ހަސަން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ.
ފުލުހުންގެ މީޑިއާ އޮފިޝަލް ވިދާޅުވި ގޮތުގައި، ފުލުހުންގެ އެންގުމާ ހިލާފަށް ސީންގެ ތެރެއަށް ވަދެ މޯލްޑިވްސް މީޑިއާ ކައުންސިލްގެ ކުރީގެ މެމްބަރު ހުސައިން ހަސަން އެވިޑެންސްގެ ފޮޓޯ ނަގަން މަސައްކަތްކުރި އެވެ. އެހެންވެ، ފުލުހުންގެ އަމުރަށް ނުކިޔަމަންތެރިވެ، ފުލުހުންގެ ވާޖިބަށް ހުރަސް އަޅާފައިވާ ކަމުގެ ތުހުމަތުގައި އޭނާ ފުލުހުންގެ ބެލުމުގެ ދަށަށް ގެންދިޔައީ ކަމަށް މީޑިއާ އޮފިޝަލް ވިދާޅުވި އެވެ.
މި ޑްރަގް އޮޕަރޭޝަނާ ގުޅޭ މައުލޫމާތު ފުލުހުން އަދި ހާމައެއް ނުކުރެ އެވެ.
ހުސައިން ހަސަން ހައްޔަރުކުރި މައްސަލަ އިދިކޮޅު އެމްޑީޕީން ވަނީ ހަރުކަށި އިބާރާތުން ކުށްވެރިކޮށް، އޭނާ ވަގުތުން ދޫކޮށްލަން ގޮވާލައިފަ އެވެ. އަދި ހުސައިން ހަސަން ހައްޔަރުކުރީ "ވަރަށް އަނިޔާވެރިކޮށް" ކަމަށް އެ ޕާޓީން ބުންޏެވެ.
ހުސައިން ހަސަނަކީ އެމްޑީޕީގެ ގއ. ވިލިނގިލި ދާއިރާގެ ރައީސްގެ އިތުރުން އެ ޕާޓީގެ "ޒުވާނުންގެ ހިތްވަރު" ގެ މީޑިއާ ކޮމިޓީގެ މުގައްރިރު ވެސް މެ އެވެ.