01 ސެޕްޓެމްބަރ 2025 - 21:06
އިޒްރޭލުން ފަލަސްތީނުގައި ހިންގަމުންދާ ގަތުލުއާންމާއި އަނިޔާވެރިކަމާ ދެކޮޅަށް ބައިނަލްއަގްވާމީ މުޖުތަމައުން އެކުގައި މަސައްކަތްކުރުމަށް ރައީސް ޑރ. މުހައްމަދު މުއިއްޒު އަނެއްކާ ވެސް ގޮވާލައްވައިފި އެވެ.
ޗައިނާއަށް މިހާރު ކުރައްވަމުން ގެންދަވާ ދަތުރުފުޅުގައި އެ ގައުމުގެ ޓިއަންޖިންގައި މިއަދު ބޭއްވި ޝަންހާއީ ކޯޕަރޭޝަން އޯގަނައިޒޭޝަން ނުވަތަ "އެސްސީއޯ ޕްލަސް" ބައްދަލުވުމުގައި ރައީސް މުއިއްޒު ވަނީ ފަލަސްތީނުގެ ރައްޔިތުންނަށް ތާއީދު ކުރުމުގައި ދިވެހިން އަބަދުވެސް ސާބިތުކަމާ އެކު ދެމިތިބޭނެ ކަމަށް ވިދާޅުވެފަ އެެވެ. އަދި ފަލަސްތީނުގެ ރައްޔިތުންގެ ހައްގުގައި ބައިނަލްއަގްވާމީ މުޖުތަމައުތަކުން ވެސް އެކުގައި މަސައްކަތް ކުރުމަށް އެ މަނިކުފާނު އިލްތިމާސް ކުރެއްވި އެވެ.
އަދި ފަލަސްތީނުގެ ރައްޔިތުންނަށް އިންސާފާއި އިންސާނީ ކަރާމާތާއި ސުލްހަ ގާއިމު ކޮށްދިނުމަށް ވަކާލާތު ކުރުމުގައި އެސްސީއޯ ފަދަ ޖަމާއަތްތަކާއި ގައުމުތަކުން ގުޅިގެން މަސައްކަތް ކޮށްދިނުމަށް ރައީސް އެދިވަޑައިގަތެވެ.
ރައީސް މުއިއްޒު ބައިވެރިވެވަޑައިގަންނަވާ ބައިނަލްއަގްވާމީ އެކި ފޯރަމްތަކުގައި އެ މަނިކުފާނު ވާހަކަފުޅު ދައްކަވާއިރު ގެންދަވަނީ ފަލަސްތީނުގެ މައްސަލައިގެ ސީރިއަސްކަން އެ ފޯރަމްތަކުގެ ބައިވެރިންނަށް އިއްވަވަމުންނެވެ.
ޗައިނާގައި އެސްސީއޯ ބައްދަލުވުމުގައި ވެސް އެކި ގައުމުތަކުގެ ލީޑަރުން ބައިވެރިވެވަޑައިގަންނަވަ އެވެ.
އެސްސީއޯ ޕްލަސް ބައްދަލުވުމަކީ އެސްސީއޯގެ މެމްބަރު ގައުމުތަކާއި ޕާޓްނާ ގައުމުތަކާއި ބައިނަލްއަގްވާމީ ޖަމިއްޔާތަކަށް އޮތް ގޮންޖެހުންތަކާއި ނުރައްކާތެރިކަމާއި އިގްތިސާދީ އިންޓެގްރޭޝަނާއި ގްލޯބަލް ގަވަނަންސް ފަދަ ކަންކަމާ ގުޅިގެން މަޝްވަރާކުރާ ތަނެކެވެ.
އެ ބައްދަލުކުރެއްވުމުގައި ރައީސް މުއިއްޒު ވަނީ އެސްސީއޯގެ އިސްނެގުމުގެ މަތިން ސަރަހައްދީ އަދި ބައިނަލްއަގްވާމީ ފެންވަރުގައި އަމާންކަމާއި ހަމަޖެހުމަށް މަސައްކަތްކުރުމުގެ މުހިއްމު ކަމަށް އަލިއަޅުއްވާލެއްވި އެވެ. އަދި ބައިނަލްއަގްވާމީ އެއްބާރުލުމާއި ތަރައްގީ އާއި ހިންގުމަށް އެދެވޭ ބަދަލުތައް ގެނައުމުގެ އަމާޒުގައި ހުށަހަޅާފައިވާ ބައިނަލްއަގްވާމީ ސިލްސިލާގެ ތެރޭގައި ހިމެނޭ، ގްލޯބަލް ގަވަނަންސް އިނީޝިއެޓިވް (ޖީސީއައި) ވެސް އެ މަނިކުފާނު ތައާރަފު ކޮށްދެއްވި އެވެ.
ރާއްޖެ އާއި ޗައިނާގެ ޒަމާންވީ ގުޅުމުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ ރާއްޖެއަކީ ވިލުންތެރި އަޒުމުވަރުގަދަ ގައުމެއް ކަަމަށެވެ. އަދި ރާއްޖޭގެ މޫސުމީ ލަނޑުދަނޑިތަކާއި މޯލްޑިވްސް 2.0 ޑިޖިޓަލައިޒޭޝަން މަސައްކަތާ ގުޅޭގޮތުން ވެސް ވާހަކަފުޅު ދެއްކެވި އެވެ.
ރައީސް ވިދާޅުވީ ގްލޯބަލް ގަވާނަންސް އިނީޝިއެޓިވް އަށް ރާއްޖެއިން ތާއީދުކުރާ ކަމަށާއި އެހެންވެ ބައިނަލްއަގްވާމީ ފެންވަރުގެ ނިންމުންތައް ނިންމުމުގެ މަރުހަލާގައި ތަރައްގީވަމުން އަންނަ ކުދި ޖަޒީރާ ގައުމުތައް ހިމެނުއްވުމަށް ގޮވައިލެއްވި އެވެ.