01 ސެޕްޓެމްބަރ 2025 - 13:33
ވިނަރެސްގެ ހަ ވަނަ ޓަވަރުގައި ހުންނަ އެޗްޑީސީގެ ކަސްޓަމާ ކެއާ އޮފީހުން ބިލުތައް ބަލައިގަންނަން ފަށައިފި އެވެ.
އެޗްޑީސީން ދެމުން އަންނަ ހިދުމަތްތަކުގެ ފެންވަރު ރަނގަޅުކުރުމަށް ކުރަމުން އަންނަ މަސައްކަތްތަކުގެ ތެރެއިން ވިނަރެސްގައި އެޗްޑީސީގެ އޮފީހެއް ހުޅުވީ މިދިޔަ މެއި މަހު އެވެ.
ހުޅުމާލޭގެ ދެވަނަ ފިޔަވަހީގައި ދިރިއުޅޭ ރައްޔިތުންނަށް ފަސޭހައިން ކަސްޓަމާ ކެއާ މެދުވެރިކޮށް މައުލޫމާތު ސާފުކުރެވޭނެ މަގު ފަހިކުރުމަށް ހުޅުވި މިތަނުން އެކި އެޕްލިކޭޝަންތަކާއި ފައިސާ ބަލައިގަތުމުގެ ހިދުމަތްތައް މިހާރު ލިބޭނެ ކަމަށް އެޗްޑީސީން ބުންޏެެވެ.
އެޗްޑީސީން ބުނި ގޮތުގައި ރަސްމީ ބަންދު ނޫން ކޮންމެ ދުވަހެއްގެ ހެނދުނު 9:00 އިން މެންދުރު 2:00 އަށް ހިދުމަތް ލިބޭނެ އެވެ.
އެޗްޑީސީން ކުރިން އޮފީހެއް ހިންގީ ހިޔާ ޓަވަރުގަ އެވެ. އެކަމަކު އެތަން ދާއިމީކޮށް ބަންދުކުރުމާ ގުޅިގެން އެ އޮފީހުން ދެމުން އައި ހުރިހާ ހިދުމަތްތަކެއް ވަނީ ވިނަރެސް އޮފީހަށް ބަދަލުކޮށްފަ އެވެ.