26 އޯގަސްޓް 2025 - 23:22
މި ސަރުކާރުން މަސައްކަތް ކުރަމުން އަންނަނީ ކައުންސިލްތައް ބާރުވެރި ކުރުވަައި، ނަފާ ހޯދޭނެ މަގުތައް ފަހިކޮށްދީގެން ކައުންސިލްތައް މެދުވެރިކޮށް ރައްޔިތުންނަށް ހިދުމަތް ކުރަން ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ހދ. އަތޮޅުގެ ރަށްތަކަށް ކުރައްވާ ދަތުރުފުޅުގައި މިރޭ ކުޅުދުއްފުށީގެ ރައްޔިތުންނާ ބައްދަލުކުރައްވައި ރައީސް ވިދާޅުވީ ކައުންސިލްތަކުން ފާސްކޮށްފައި އޮންނަ ލޭންޑްޔޫޒް ޕްލޭނާ އެއްގޮތަށް ކަމެއް ކުރަން ހުށަހަޅައިފި ނަމަ އެކަމެއް މަނާ ނުކުރައްވާނެ ކަމަށެވެ. އެކަމަކަށް ހުއްދަ ލިބޭނެ ކަމުގެ ޔަގީންކަން ރައީސް ދެއްވި އެވެ.
ނަމަވެސް އޭގެން ބޭރުން ކަމެއް ހުށަހަޅައިފި ނަމަ ސަރުކާރުގެ ސިޔާސަތާއި އެމަނިކުފާނުގެ ވައުދުތަކާ ދިމާވޭތޯ ސަރުކާރުން ބަލާނެ ކަމަށް ވިދާޅުވި އެވެ.
"އެއީ ގާނޫނުގައި އޮންނަ ގޮތް. ސަރުކާރުގެ ސިޔާސަތާ ދިމާވޭތޯ ބަލައި އެއްވެސް ކަމެއް ނުހިފަހައްޓާނެ. ވަޒީފާއަކަށް މީހަކު ނަގަން ވިޔަސް. ފާސް ކޮށްފައި އޮތް އޮނިގަނޑާ އެއްގޮތަށް އަދި ބަޖެޓު ހަމަޖެހިފައި އޮތްނަމަ ބަލާފައި ހުއްދަ ދޭނެ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި މާލޭގެ މޭޔަރަކަށް އެމަނިކުފާނު ހުންނެވިއިރު، ވެރިކަން ކުރި އެމްޑީޕީގެ ސަރުކާރުން މާލޭ ސިޓީ ކައުންސިލަށް ކުރި "ޖެއްސުންތައް" މި ސަރުކާރުގައި އެއްވެސް ކައުންސިލަކަށް ކުރިމަތިވާން އެދިވަޑައިނުގަންނަވާ ކަމަށެވެ. އޭގެ ބަދަލުގައި މި ސަރުކާރުން މަސައްކަތް ކުރާނީ، ކައުންސިލްތަކަށް ނަފާ ހޯދައިދިނުމަށް، އިހްތިސާސް ތެރޭގައި އޮންނަ ފަޅު ރަށްތަށް ވެސް ކައުންސިލަށް ހަމަޖައްސަައިދީގެން ކަމަށް ރައީސް ވިދާޅުވި އެވެ.
ކައުންސިލްތަކުން ދައްކާ ބައެއް ވާހަކަ ގަބޫލުނުކުރެއްވޭ ސަބަބެއް ކަމަށް ރައީސް ވިދާޅުވީ މިހާރު ކައުންސިލްތަކަށް ކަންކަން ކުރުމުގެ ގާނޫނީ ބާރު ދެއްވާފައި އޮވެމެ ކަންކަން ނުކޮށް ތިބުމެވެ.
"ބޯޅަ އޮތީ ކައުންސިލްގެ ކޯޓުގައޭ މިހާރު. އެތައް ކައުންސިލަކަށް ދެވިއްޖޭ އެތައް ރަށެއް މިހާރު. އެހެންވެ އެކަން ކުރައްވަންވީއޭ މިހާރު. މި ރަށު ކައުންސިލާ ވެސް ހަވާލުކޮށްފައި އޮންނާނެ ސްވިމިން ޓްރެކެއް އަޅަން. އެކަމަކު އަދިވެސް ނާޅާ،" ރައީސް ވިދާޅުވި އެވެ.
ރައީސް ވިދާޅުވި ގޮތުގައި އެމަނިކުފާނަށް މުހިންމީ ކޮންމެ ރައްޔިތަކަށް ވެސް ހަމަހަމަ ކަމާއެކު ހިދުމަތް ކުރެއްވުމެވެ. ސިޔާސީ ގޮތުން ސަރުކާރާ ވަރަށް ބޮޑަށް ހިޔާލު ތަފާތު ރަށްރަށަށް ދަތުރުކުރައްވައި ރައްޔިތުންނާ ބައްދަލު ކުރައްވާއިރު ވެސް ވަކި ސިޔާސީ ފިކުރެއް އެމަނިކުފާނަށް މުހިއްމެއް ނޫން ކަމަށް ވިދާޅުވި އެވެ. ސަރުކާރުން އެއްވެސް ރައްޔިތަކާ މެދު ތަފާތު ނުކުރައްވާނެ ކަމުގެ ޔަގީންކަން ދެއްވި އެވެ.
ލާމަރުކަޒީ ގާނޫނަށް ބަދަލު ގެނައި ބިލް ތަސްދީގު ކުރައްވާފައިވާ އިރު، ބައެއް ކައުންސިލްތަކުން އަންނަނީ އެ ބަދަލާ މެދު ކަންބޮޑުވުން ފާޅުކުރައްވަމުންނެވެ. އަދި އެ ބަދަލުތަކާ މެދު އިތުރަށް ވިސްނެވުމަށް ކައުންސިލްތަކުން އަންނަނީ ރައީސަށް ހުށަހަޅަމުންނެވެ.
އެ ބައްދަލުވުމުގައި ވާހަކަ ދައްކަވަމުން ކުޅުދުއްފުށީގެ މޭޔަރު އަހުމަދު އާތިފް ވެސް ވަނީ ކައުންސިލްތަކުގެ ގާނޫނަށް ގެނައި އިސްލާހާ މެދު ވާހަކަ ދައްކަވައިފަ އެވެ. އޭނާ ވަނީ އެ ގާނޫނުގައި ހުރި ކަންކަމުގެ ސަބަބުން ރައްޔިތުންނަށް ކައުންސިލްތަކުން ކޮށްދޭން ޖެހޭ ކަންކަން ނުކޮށްދެވޭ ކަމުގެ ކަންބޮޑުވުން ފާޅުކުރައްވައިފަ އެވެ. އަދި އެ ގާނޫނާ މެދު އަލުން ވިސްނަވައި އިސްލާހު ކުރައްވަން ވެސް ވަނީ އެދިވަޑައިގެންފަ އެވެ.
ލާމަރުކަޒީ ގާނޫނަށް ބަދަލުތަކެއް ގެނެސްފައި ވާއިރު ކައުންސިލްތަކުގެ އަދަދު މަދުކުރުން ފަދަ ބަދަލުތައް ގެންނަވާނެ ކަމަށް ވެސް ރައީސް ވަނީ ވިދާޅުވެފަ އެވެ. އެއީ މެންބަރުން މަދުކުރުމުގެ ގޮތުން، 2،000 އިން ދަށުގެ އާބާދީގެ ރަށްރަށުގައި ތިން މެމްބަރުންގެ ކައުންސިލެއް އަދި 2،000 އަށް ވުރެ އާބާދީ ބޮޑު ނަމަ ފަސް ކައުންސިލަރުން ތިބޭ ގޮތަށް ހަމަޖެއްސުމެވެ.
އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް މެންބަރުން ހޮވަން ވެސް އެ ރޭޝިއޯ ހަމަޖެއްސުން ހިމެނެ އެވެ. އެކަމަކު، އަންހެނުންގެ ތަރައްގީ އަށް މަސައްކަތްކުރާ ކޮމިޓީތަކުގެ ރައީސާގެ މަގާމަށް މުޅި ރަށުގެ ރައްޔިތުން ވޯޓުލައިގެން މީހަކު އިންތިހާބުކުރުމާއި އެއީ ފުލްޓައިމް ވަޒީފާއަކަށް ހަދަން ގާނޫނު އިސްލާހު ކުރާނެ ކަމަށް ވެސް ރައީސް ވަނީ ވިދާޅުވެފައި އެވެ.