26 އޯގަސްޓް 2025 - 16:24
ދަރިވަރުންނަށް ސްކޫލު ބަދަލުކުރެވޭނީ ކޮންމެ ދިރާސީ އަހަރެއްގެ ވަކި ދުވަސްވަރެއްގައި ކަމަށް އެޑިއުކޭޝަން މިނިސްޓްރީން ކަނޑައަޅައިފި އެވެ.
މީގެ ކުރިން ދިރާސީ އަހަރުގެ ކޮންމެ ދުވަސްވަރެއްގައި ވެސް ދަރިވަރުންނަށް ސްކޫލު ބަދަލުކުރުމުގެ ފުރުސަތު މިނިސްޓްރީން ދިނެވެ.
ދައުލަތުގެ މީޑިއާއަށް ދެއްވި އިންޓަވިއުއެއްގައި އެޑިއުކޭޝަން މިނިސްޓްރީގެ ސްޓޭޓް މިނިސްޓަރު ޑރ. އަހުމަދު މުހައްމަދު، ވިދާޅުވީ ސްކޫލުތަކަށް ދަރިވަރުން ވެއްދުމާއި އެއް ސްކޫލުން އަނެއް ސްކޫލަށް ދަރިވަރުން ބަދަލުކުރުމުގެ އުސޫލަށް ބަދަލު ގެނެސް، އަންނަ އަހަރުގެ އެކަޑަމިކް ކަލަންޑަރުގައި ހިމަނާފައިވާ ކަމަށެވެ.
އޭނާ ވިދާޅުވި ގޮތުގައި މިހާރު ގެނެސްފައިވާ ބަދަލުގެ ދަށުން ކޮންމެ ދިރާސީ އަހަރެއްގައި ދެ ފަހަރަކު ސްކޫލު ބަދަލުކުރުމަށް ފުރުސަތު ދޭނެ އެވެ. ކުއްޖަކު ސްކޫލު ބަދަލުކުރާ ނަމަ މިހާރު ކަނޑައަޅާފައި ވަނީ ދިރާސީ އަހަރެއްގެ ދެވަނަ ޓާމު ނިމުމުގެ އެއް މަސް ދުވަސް ކުރިން ހުށަހެޅުމާއި ކުއްޖަކު ދެވަނަ ޓާމަށް އެހެން ސްކޫލަކަށް ބަދަލުކުރާ ނަމަ، ފުރަތަމަ ޓާމު ނިމުމުގެ އެއް މަސް ދުވަސް ކުރިން މިނިސްޓްރީއަށް ހުށަހަޅަން ޖެހޭ ގޮތަށް ބަދަލުކޮށްފައިވާ ކަމަށް ވިދާޅުވި އެވެ.
މިގޮތަށް ބަދަލު ގެނަޔަސް ހައްސާސް ހާލަތެއް ދިމާވެގެން ކުއްޖެއްގެ ސްކޫލު ބަދަލުކުރަން ބޭނުންވާ ނަމަ އެ ފުރުސަތު ވެސް ފަހިކޮށްދޭނެ ކަމަށް އޭނާ ވިދާޅުވި އެވެ.
ސްޓޭޓް މިނިސްޓަރު ވިދާޅުވީ ކޮންމެ ވަގުތެއްގައި ދަރިވަރުންގެ ސްކޫލު ބަދަލުކުރެވޭ ގޮތަށް އޮތުމަކީ އެންމެ ރަނގަޅު ގޮތް ނޫން ކަމަށެވެ. އެހެންވެ އުސޫލަށް ގެނެސްފައިވާ ބަދަލަކީ ދަރިވަރުންގެ އުނގެނުމަށް އަތުވެދާނެ ދަތިތަކަށް ލުއި ލިބޭނެ ގޮތަށް ގެނެސްފައިވާ ބަދަލުތަކެއް ކަމަށް ވިދާޅުވި އެވެ.