25 މާޗް 2017 - 11:38
އޭޝިއަން ކަޕް ކޮލިފައިންގެ މެޗުތަކަށް ރާއްޖެ ފިޔަވައި އެހެން ހުރިހާ ގައުމަކުން އެކުވެރިކަމުގެ މެޗުތައް ވަނީ ކުޅެފަ އެވެ. ފަލަސްތީނާ ދެކޮޅަށް ރާއްޖެ މުހިއްމު މެޗަކަށް ނުކުންނަން ތައްޔާރުވެފައިވާއިރު މެޗެއް ނުކުޅޭތީ ފާޑުކިޔުން ވަނީ އަމާޒުވެފަ އެވެ.
އެފްއޭއެމުން މީގެ ކުރިން ބުނެފައިވަނީ ސްރީ ލަންކާ އާއި މިޔަންމާ އަދި އަފްގާނިސްތާނުން މެޗު ކުޅެން ދައުވަތު ލިބިފައިވާ ކަމަށެވެ. އަދި މެޗު ކުޅުމާ ގުޅޭގޮތުން ގޮތެއް ނިންމާނީ ގައުމީ ޓީމުގެ ހާއްސަ ކޮމެޓީން ކަމަށް އެފްއޭއެމުން އޭރު ވަނީ ބުނެފަ އެވެ.
ގައުމީ ޓީމުގެ ކޯޗު އޮސްޓްރޭލިއާގެ ޑަރެން ސްޓެވާޓް އެއްބަސްވުމުގައި ސޮއިކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ގައުމީ ޓީމުގެ ކަންތައްތައް ބެލެހެއްޓުމަށް އެކުލަވާލު ކޮމިޓީގެ ޗެއާޕާސަން އަލީ ނާޝިދު (އޮގަރު އައްޔަ) ވިދާޅުވީ އެހެން ގައުމަކަށް ގޮސް މެޗެއް ކުޅުމަށް ވަގުތު ނެތް ކަމަށާއި މާލޭގައި މެޗެއް ރޭވުމަށް މަސައްކަތް ކުރައްވަމުން އަންނަ ކަމަށެވެ.
އެފްއޭއެމްގެ ރައީސް ބައްސާމް އަދީލް ޖަލީލް "މިހާރަ"ށް ވިދާޅުވީ ގައުމީ ޓީމު މާލޭގައި ކުޅެން މެޗެއް ހަމަޖެހުނު ކަމަށާއި ނުކުޅުނީ މާލޭގައި އެޗް1އެން1 ފެތުރެމުން އަންނާތީ ކަމަށެވެ.
"ސްރީލަންކާއާ ދެކޮޅަށް މާލޭގައި މެޗެއް ކުޅެން ހަމަޖެހުނު. އެކަމަކު އެންމެ ފަހު ވަގުތު މެޗު ކެންސަލް ކޮށްލަން ޖެހުނީ ފްލޫ ފެތުރެމުންދާތީ. ކަމާބެހޭ ފަރާތްތަކުން ލަފާ ނުދޭ އެ ވަގުތު މެޗު ކުޅުމަށް،" ބައްސާމް ވިދާޅުވި އެވެ.
މީގެ ކުރިން ގައުމީ ޓީމާ ހަވާލުވި ކޯޗުން އެންމެ ބޮޑަށް ކޮށްފައިވާ އެއް ޝަކުވާ އަކީ ވާދަވެރި މެޗުތަކަށް ނުކުންނައިރު އެ މެޗަށް ތައްޔާރުވާން އެކުވެރިކަމުގެ މެޗުތައް ނުލިބޭ ކަމެވެ. އޭޝިއަން ކަޕް ޕްލޭއޮފް މެޗުގައި މިދިޔަ ސެޕްޓެމްބަރު މަހު ލާއޮސްއާ ދެކޮޅަށް ކުޅުމުގެ ކުރިން އެ މެޗަށް ތައްޔާރުވުމަށް ރާއްޖޭން ވަނީ މާލޭގައި ބަންގްލަދޭޝްއާ ދެކޮޅަށް ރަހުމަތްތެރިކަމުގެ މެޗެއް ކުޅެފަ އެވެ. އެ މެޗު ވެގެންދިޔައީ ސްޓެވާޓްގެ އިރުޝާދުގެ ދަށުން ގައުމީ ޓީމު ކުޅުނު ފުރަތަމަ މެޗަށެވެ.
ބަންގްލަދޭޝް އަތުން އެ މެޗުގައި ހޯދި ބޮޑު މޮޅާ އެކު ލާއޮސް މެޗަށް ޓީމުގެ ފޯމު ވަރަށް ރަނގަޅުވި އެވެ. އަދި ލާއޮސްގެ މައްޗަށް ވެސް މޮޅަށް ކުޅެގެން ރަނގަޅު ކާމިޔާބެއް ހޯދި އެވެ.
ބައްސާމް ވިދާޅުވީ ކޮލިފައިންގައި ކުރިއަށް ހުރި މެޗުތަކަށް ތައްޔާރުވުމުގެ ގޮތުން ގައުމީ ޓީމަށް މެޗުތަކެއް ހަމަޖައްސައިދޭނެ ކަމަށެވެ.
"އިންޝާﷲ ކުރިއަށް ހުރި ކޮލިފައިން މެޗުތަކަށް ދިއުމުގެ ކުރިން ފްރެންޑްލީ މެޗުތައް ހަމަޖައްސާނަން،" ބައްސާމް ވިދާޅުވި އެވެ.
ކޮލިފައިންގައި ރާޢްޖެއާ ދެކޮޅަށް ކުޅުމުގެ ކުރިން ފަލަސްތީނުން ވަނީ ޔަމަނާ ދެކޮޅަށް އެކުވެރިކަމުގެ މެޗެއް ކުޅެފަ އެވެ. އެ މެޗުން ފަލަސްތީން މޮޅުވީ 1-0 އިންނެވެ. ރާއްޖެ އާއި ފަލަސްތީން ކުޅޭ މެޗު އޮންނާނީ އަންނަ އަންގާރަ ދުވަހުގެރޭގަ އެވެ.