21 އޯގަސްޓް 2025 - 12:59
އއ. މާޅޮހު، އޯކިޑްމާގޭ އަބްދުއްރަހުމާނަށް މިދިޔަ ޖުލައި 12 ވަނަ ދުވަހުގެ ރޭ ހަމަލާދީ މަރާލި މައްސަލައިގައި ހައްޔަރުކުރި އެކަކު، އަބްދުއްރަހްމާނަށް ހަމަލާދީފައި އޮތްކަން މީހުންނަށް އެނގުމުގެ މާ ކުރިން އަބްދުއްރަހްމާންގެ ދަރިއަކަށް ގުޅާފައި އޮތް ކަމަށާއި ގުޅީ ކީއްކުރަންތޯ އެހުމުން އެއީ ގޭދޮށަށް މީހުން އެއްވެގެން އުޅޭތީ ވެގެން އުޅޭ ގޮތެއް ބަލަން ކަމަށް ބުނެފައިވާކަން އެނގިއްޖެ އެވެ.
އަބްދުއްރަހްމާނަށް ހަމަލަދީފައި އޮތްކަން އެންމެ ފުރަތަމަ އެނގުނީ އޭނާގެ އަންހެނުން ނާޒިމާ އިބްރާހިމަށެވެ.
އެނގިފައިވާ ގޮތުގައި، ތުހުމަތަށް ހައްޔަރުކޮށްފައިވާ މީހުންގެ ތެރެއިން މާޅޮހު، ފިނިވާގޭ އަހުމަދު ފާރިސް، 28 ވަނީ އެ ރޭ އަބްދުއްރަހްމާންގެ ދަރިއަކަށް ގުޅައިފަ އެވެ. އެކަމަކު، އެއީ އަބްދުއްރަހްމާންގެ ދަރިއަށް ގުޅާ މީހެއް ވެސް ނޫން ކަމަށާއި ކޯލް މިސްވެފައި އޮތުމުން ފަހުން ގުޅުމުން އޭރު ގުޅީ ގޭދޮށަށް މީހުން އެއްވެގެން އުޅޭތީ ވެގެން އުޅޭ ގޮތެއް ބަލަން ކަމަށް ބުނި ކަމަށް ވެ އެވެ.
އަބްދުއްރަހުމާންގެ ތިން ކުދިން ވެސް އެ ދުވަސްވަރު އުޅުނީ މާލޭގަ އެވެ.
މިހާތަނަށް އެނގިފައިވާ މައުލޫމާތުތަކުން އެނގޭ ގޮތުގައި މި މައްސަލައިގެ ތުހުމަތުތައް ހައްޔަރުކުރީ މާޅޮހުގެ ތިން މީހުން ކަމަށްވާ ފިޔަ، އަހުމަދު އާޝިދު 28، އާއި ފިނިވާގޭ، އަހުމަދު ފާރިސް 28، އަދި ލިލީފެހި، މުހައްމަދު ވިސާމް، 23 އެވެ.
ވަރަށް ގާތްކޮށް ރަށުތެރޭގައި އުޅޭ އެ ތިން ޒުވާނުންގެ ތެރެއިން ފާރިސް، އަބްދުއްރަހުމާންގެ ގޭދޮށަށް މީހުން އެއްވެގެން އުޅޭތީ ކަމަށް ބުނެ ގުޅި ވަގުތަކީ އަދި ހަމަލާ ދިންކަން މީހުންނަށް އެނގުމުގެ މާ ކުރި އެވެ.
އެހެންވެ، ތަހުގީގުގައި އެ ސުވާލު ކުރިމަތިކޮށް ފާރިސްއާ ދިމާލަށް ފުލުހުންގެ ފޯކަސް ވަކި ހިސާބަކުން ބަދަލުވި އެވެ.
ފުލުހުން ވަނީ އާޝިދު އާއި ފާރިސް އަދި ވިސާމްގެ ގެ ވެސް މި މަހުގެ ކުރީކޮޅު ފާސްކޮށް، އޭގެ ތެރެއިން އެކެއްގެ އަންނައުނު ފަދަ ތަކެތި ގެންގޮސްފަ އެވެ.
އުމުރުން 65 އަހަރު ވެފައި ވިޔަސް މާޅޮހުގައި ޖާނުން އެންމެ ވަރުގަދަ މީހާ ކަަމަށް އެންމެން ވެސް ބުނާ އަބްދުއްރަހުމާނަށް ހަމަލަދީފައި އޮއްވައި ފެނުނު ރޭ ދަންވަރު ވެސް އެ ތިން ޒުވާނުން ރަށުތެރޭގައި އުޅުނު ކަމަށްވެ އެވެ. އަދި އަބްދުއްރަހުމާންގެ ކުއްޖަކަށް ގުޅި ކަމަށް ބުނާ ފާރިސް އޭރު ހުންނާނީ ޑިއުޓީގަ އެވެ.
ފާރިސްގެ ވަޒީފާއަކީ ފެނަކައިގެ ފެން ޕްލާންޓު އޮޕަރޭޓް ކުރުން ކަމަށް ވާއިރު ފެނަކަ ބްރާންޗުން ނުކުންނައިރު އަބްދުއްރަހުމާންގެ ގެ ފެންނާނެ އެވެ. އަބްދުއްރަހުމާން ނިދާފައި އޮތީ އަންހެނުން ނާޒިމާގެ ގެ މާހިޔައިގަ އެވެ.
އަބްދުއްރަހުމާންގެ އަންހެނުން ނާޒިމާ "މިހާރު" ގެ ނޫސްވެރިންނަށް ކުރިން ކިޔައިދީފައިވާ ގޮތުން ނަމަ ފިރިމީހާ އަށް ހަމަލަދީފައި އޮތް ކަން އެނގުނީ ފާހާނާއަކަށް ވަންނަން އެ ކޮޓަރި އަށް ވަން ވަގުތުގަ އެވެ. އެއީ އެ ރޭގެ ދަންވަރު އެކެއް ޖަހާކަންހާއިރު ކަމަށް ނާޒިމާ ބުނެފައި ވެ އެވެ. އެއާ އެކު، ނާޒިމާ އެންމެ ފުރަތަމަ ގުޅީ އާއިލާގެ ބައެއް މީހުންނަށެވެ. ރަށުގައި އުޅޭ އެކަކަން ވެސް ނުގުޅާ ކަމަށް ވެ އެވެ.
އަބްދުއްރަހުމާންގެ ތިން ކުދިންގެ ތެރެއިން ރަށުގައި ދިރިއުޅޭ ހަމައެކަނި ދަރިފުޅު ނިމާލް ވެސް އެ ދުވަސްވަރު ހުރީ މާލޭގަ އެވެ. އަދި ނިމާލްގެ އަންހެނުން ވެސް އުޅުނީ އުފަން ރަށް އުކުޅަހުގަ އެވެ.
އަބްދުއްރަހުމާނަށް ދިން ހަމަލައާ ސިހުރާ ވެސް ބައެއް މީހުން ގުޅުވަ އެވެ. "މިހާރު" އާ ކުރިން ވާހަކަ ދެއްކި ބައެއް މީހުން ބުނެފައިވާ ގޮތުގައި އެ ރަށުގެ ފިހާރައެއްގެ ކެމެރާ ހަރުކުރަން ޖެހުނު މައިގަނޑު ސަބަބަކީ ވެސް އެފަދަ ތުހުމަތުތަކެއް ކުރެވުމުންނެވެ. އަދި ކެމެރާ ހަރުކުރި ފަހުން އަބްދުއްރަހުމާންގެ އެ ގޭގެ ކެމެރާއަށް އަރާފައިވާ ކަމަށް ރަށުތެރޭގައި ބައެއް މީހުން ވާހަކަ ދައްކާފައިވެ އެވެ.
އެކަމަކު، އަބްދުއްރަހުމާނާއި ސިހުރާ ގުޅުވައިގެން ދައްކާ ވާހަކަތައް މާޅޮހުގެ ގިނަ މީހުން ގަބޫލު ނުކުރާ ކަމަށްވެ އެވެ. ބައެއް މީހުންނަށް އެ ވާހަކަ އިވުނީ ވެސް މި ފަހަރު އެކަނި ކަމަށް ބުނެފައި ވެ އެވެ.
އަބްދުއްރަހުމާންގެ މަރުގެ މައްސަލައިގައި ތުހުމަތަށް ތިން މީހަކު ހައްޔަރުކުރި ކަން ފިޔަވައި އިތުރު އެއްވެސް ވާހަކައެއް ފުލުހުން އަދި ހާމައެއް ނުކުރެ އެވެ.
އާންމުކޮށް އެހެން ރަށްރަށުގެ މަސްދޯނިތަކުން މަހަށް ގޮސް އުޅޭ އަބްދުއްރަހުމާނާ އެއްވެސް މީހަކާ އެއްވެސް މައްސަލައެއް އޮތް ކަމަށް އެނގިފައި ނެތް ކަމަށް މާޅޮހުގެ މީހުން ބުނެފައި ވެ އެވެ. އަދި މާޅޮހުގެ ގިނަ މީހުން ގަބޫލުކުރަނީ އެއީ ފަހަކަށް އައިސް ކުށް ކުރުން ހަމަ އެއްގޮތަކަށް ވެސް ނެތް ރަށަކަށް ވާއިރު، މީހަކު މަރާލަން ހަމަލަދޭން ކެރޭ ވަރުގެ މީހަކު މާޅޮހުގައި ނުހުންނާނެ ކަމަށެވެ. އެހެންވެ، މާޅޮހުގެ ގިނަ މީހުން ގަބޫލު ކުރަމުން އައީ އަބްދުއްރަހުމާނަށް ހަމަލަދިނީ އެހެން ރަށެއްގެ ބަޔަކު ދަންވަރު މާޅޮހަށް އަރައިގެން ކަމަށެވެ.