15 އޯގަސްޓް 2025 - 23:30
ރާއްޖޭގެ އަސްކަރިއްޔާ ވަރުގަދަ ކުރުމުގެ ގޮތުން އަސްކަރީ އިތުރު ކަނޑުގެ އުޅަނދުތައް ރައީސް އަދި ސިފައިންގެ އެންމެ މަތީވެރިޔާ ޑރ. މުހައްމަދު މުއިއްޒު ހޯއްދަވައި ދެއްވާ ތަން ދާދި އަވަހަށް ފެންނަން ފަށާނެ ކަމަށް ޗީފް އޮފް ޑިފެންސް ފޯސް މޭޖަ ޖެނެރަލް އިބްރާހިމް ހިލްމީ މިރޭ ވިދާޅުވެއްޖެ އެވެ.
އޭނާ އެހެން ވިދާޅުވީ، ތުރުކީގެ ސަރުކާރުން ރާއްޖެ އަށް ހަދިޔާކުރި ޓީސީޖީ ވޮލްކަން (ޕީ-343) މަނަވަރު ދިވެހި އަސްކަރިއްޔާއާ ހަވާލު ކުރުމަށް ހުޅުމާލޭ އެމްޕީއެލް ސަރަހައްދުގައި ބޭއްވި ހާއްސަ ރަސްމިއްޔާތުގަ އެވެ.
"... ދިވެހި ކަނޑުތައް ބެލެހެއްޓުމުގެ ގާބިލްކަން ހޯއްދަވައި ދެއްވުމަށް ކައިރި މުސްތަގުބަލެއްގައި އިތުރު އަސްކަރީ ކަނޑުގެ އުޅަނދުފަހަރު އެ މަނިކުފާނު އެމްއެންޑީއެފަށް ހޯއްދަވައި ދެއްވާނެ. މި މަންޒަރު ދާދި އަވަހަށް ތިޔަބޭފުޅުންނަށް ފެނިވަޑައިގަންނަވާނެ،" ޗީފް އޮފް ޑިފެންސް ފޯސް ވިދާޅުވި އެވެ.
"މިއީ އަސްކަރިއްޔާ ތަރައްގީ ކުރެއްވުމަށް އެ މަނިކުފާނު ވެވަޑައިގެންފައިވާ ވައުދުފުޅުތައް ފުއްދަވަމުން ގެންދަވާ ކަމުގެ ވަރުގަދަ އަލިގަދަ ހެއްކަކަށް ފުދޭ."
ހިލްމީ ވިދާޅުވީ، ރައީސް މުއިއްޒު ކުރައްވާ މަސައްކަތްޕުޅަކީ ގާނޫނުއަސާސީ އާއި ގާނޫނުތަކުން ދިވެހި ސިފައިންނާ ހަވާލުކޮށްފައިވާ މަސްއޫލިއްޔަތު އަދި ބައިނަލްއަގްވާމީ ކަނޑުގެ މުއާދަހާތަކުން ރާއްޖެ އަށް މަތިކޮށްފައިވާ ޒިންމާ އަދާކުރުމަށްޓަކައި ދިވެހި ސިފައިންގެ ގާބިލްކަން އިތުރުކޮށް، ވަރުގަދަ ކުރުން ކަމަށެވެ.
ހިލްމީ ވިދާޅުވިގޮތުގައި ޑޯގަން-ކްލާސްގެ މިސައިލުން ހަމަލާދިނުމުގެ ގާބިލްކަން ލިބިފައިވާ މަނަވަރު ޓީސީޖީ ވޮލްކަން (ޕީ-343) އަކީ މިހާރު ދިވެހި އަސްކަރިއްޔާގެ އެންމެ ބޮޑު އުޅަނދެވެ.
ރާއްޖޭގެ އަސްކަރިއްޔާގެ ފުރަތަމަ މަނަވަރުގެ ނަމަކަށް އެމްއެންޑީއެފުން ހަމަޖެއްސީ "ދަރުމަވަންތަ" އެވެ. އެ މަނަވަރުގެ ކޮމާންޑިން އޮފިސަރަކީ ލެފްޓިނެންޓް ކާނަލް ހަސަން ޝިނާނެވެ.
ޗީފް އޮފް ޑިފެންސް ފޯސް ހިލްމީ ވިދާޅުވީ، ތުރުކީގެ މަނަވަރާ އެކު، ދިވެހި އަސްކަރިއްޔާގެ ކަނޑުގެ ލަޝްކަރުގެ ބާރު އެތައް ގުނައަކަށް އިތުރު ވާނެ ކަމަށެވެ.
"މި މަނަވަރުގެ ހަތިޔާރަށާއި ފަޔާ ޕަވާ އަށް ބެލި ކަމުގައި ވިޔަސް މިއީ މިހާރު ކޯސްޓް ގާޑުގައި ބޭނުންކުރާ އުޅަނދުތަކާ އަޅާ ބަލާއިރު މުޅިން އެހެން ދަރަޖައެއްގެ ނޭވީ މަނަވަރެއް،" ހިލްމީ ވިދާޅުވި އެވެ.
އެ ރަސްމިއްޔާތުގައި ވާހަކަ ދައްކަވަމުން ޑިފެންސް މިނިސްޓަރު ޣައްސާން މައުމޫން ވިދާޅުވީ މިރެއަކީ ރާއްޖޭގެ މިނިވަންކަމުގެ ދިފާއުގައި ރައީސް މުއިއްޒު ކުރެއްސެވި ރަތް ރޮނގު އިތުރަށް ފަވާލަދެއްވާ ރެޔެއްކަމަށެވެ.
މިރޭ ހަވާލުކުރި މަނަވަރަކީ ޑޯގަން-ކްލާސްގެ މިސައިލުން ހަމަލާދިނުމުގެ ގާބިލްކަން ލިބިފައިވާ މަނަވަރެކެވެ. ޓީސީޖީ ވޮލްކަން (ޕީ-343) މަނަވަރު މިހާރު އޮތީ މާލެ ސަރަހައްދުގަ އެވެ.
ތުރުކީ ސަރުކާރުން ހަދިޔާކުރި މަނަވަރަށް 45 އަހަރު ވެފައިވީ ނަމަވެސް މަރާމާތުތަކަށް ފަހު، ޓެސްޓް އަދި ތަމްރީނު އުޅަނދެއްގެ ގޮތުގައި މިދިޔަ އަހަރު އެ މަނަވަރު ވަނީ އަލުން ގިންތި ކޮށްފަ އެވެ.
ޑޯގަން-ކްލާސްގެ އުޅަނދުތައް ފަރުމާކޮށްފައިވަނީ ޖަރުމަނުގެ ކުންފުންޏެއް ކަމަށްވާ ލޫރްސެން ވެރްފްޓްއިންނެވެ. އެއީ 20 ވަނަ ގަރުނުގެ ފަހުކޮޅު ތުރުކީވިލާތުގެ ކަނޑުގެ ސިފައިންގެ ގާބިލުކަން އިތުރު ކުރުމުގައި މުހިންމު ދައުރެއް އަދާކުރި އުޅަނދުތަކެކެވެ. ހާއްސަކޮށް މިއީ ހާޕޫން އެންޓި-ޝިޕް މިސައިލްތަކާ އެކު ތައްޔާރުކުރި ފުރަތަމަ ގިންތީގެ އުޅަނދުތަކެވެ.