11 އޯގަސްޓް 2025 - 23:05
އެކި ރަށްރަށުން ގޯތި ދިނުމުގެ ބޭނުމުގައި އެކި ދުވަސްވަރު ހިއްކާފައިވާ އެކަމަކު އެއްވެސް ބޭނުމެއް ނުކޮށް ހުރި ބިންތައް ތަރައްގީ ކުރުމަށްޓަކައި ޔުޓިލިޓީގެ ހިދުމަތް ފޯރުކޮށްދިނުމުގެ ހާއްސަ މަޝްރޫއެއް ދައުލަތުގެ އަންނަ އަހަރުގެ ބަޖެޓުގައި ހިމަނުއްވާނެ ކަމަށް ރައީސް ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.
ބ. އަތޮޅަށް މިއަދު ފެއްޓެވި ދަތުރުފުޅުގައި، އެ އަތޮޅު އޭދަފުށީގައި ވާހަކަފުޅު ދައްކަވަމުން އެ މަނިކުފާނު ވިދާޅުވީ، އެ ރަށުގެ ހިއްކި ބިން ވެސް އޮތީ ނަމެއްގައި ހިއްކާފައި ކަމަށާއި ކަރަންޓާއި ފެނާއި މަގުތައް ހެދޭނެ ގޮތެއް ނެތި ކުރިއެރުން ހުއްޓިފައިވާ ކަމަށެވެ. އޭދަފުށީގެ އިތުރުން ވެސް މި ގޮތަށް ހިއްކި ބިން ތަރައްގީ ކުރެވޭނެ ގޮތެއް ނެތް އެތައް ރަށެއް އެބައޮތް ކަމަށް ރައީސް ވިދާޅުވި އެވެ.
"އަޅުގަނޑުމެން މި އަންނަ އަހަރަށް ބަޖެޓު މި ހަދަނީ މިކަމަށް ހާއްސަ ޕްރޮގްރާމެއް ހިމަނައިގެން. މި އަންނަ އަހަރުގެ ބަޖެޓު ހަދާއިރުގައި ހާއްސަ ނިއު ޕޮލިސިޓީ އިނިޝިއޭޓިވް ޕްރޮގްރާމެއް އެބަ ހިމަނަން ހިއްކާފައި ހުރި ބިންތަކަށް ބޭނުންވާ ޔުޓިލިޓީސް ގާއިމް ކޮށްދިނުމާއި އިންފްރާސްޓްރަކްޗާ ގާއިމް ކޮށްދޭން. އޭގެ ތެރޭގައި އެންމެ އިސްކަންދޭނީ އާބާދީ އާއި ތަރައްގީ އެއްފަސްކުރެވޭނެ ރަށްތަކަށް. ދެން އާބާދީ ބޮޑެތި ރަށްތަކަށް،" ރައީސް މުއިއްޒު ވިދާޅުވި އެވެ.
އެ މަނިކުފާނު ވިދާޅުވިގޮތުގައި އޭގެ ތެރެއިން ވެސް އެންމެ އިސްކަންދޭނެ އެއް ރަށަކީ އޭދަފުއްޓެވެ. މި އަހަރު ވެސް އެ ރަށުގައި މަސައްކަތް ފެށޭނެ ގޮތެއް އޮތްތޯ ބައްލަވައި އެކަން ކޮށްދެއްވާނެ ކަމަށް ވިދާޅުވި އެވެ.
"ހަމަ ޔަގީނުން ވެސް މި އަންނަ އަހަރަށް މި ކަނޑައަޅާ ބަޖެޓުގެ ތެރޭގައި ހިމެނޭނެ މި ދެންނެވި ގޮތަށް ހިއްކި ބިންތަކަށް ބޭނުންވާ ފެން، ކަރަންޓު، ނަރުދަމާ، މަގު ހިމެނޭ ގޮތަށް ވަރަށް ބިޔަ ބޮޑު ޕްރޮގްރާމެއް،" ރައީސް ވިދާޅުވި އެވެ.
ރައީސް މުއިއްޒު އޭދަފުށީގެ ރައްޔިޔުންނަށް ދެއްވި ޔަގީންކަމަކީ އެ މަނިކުފާނު އެ ރަށަށް ވެވަޑައިގެންނެވި ހުރިހާ ވައުދެއް ފުއްދަވައި ދެއްވާނެ ކަމެވެ.
ރައީސް ވިދާޅުވީ، އޭދަފުށީގައި 1،000 ހައުސިން ޔުނިޓް އިމާރާތްކުރުމަށް ބޭރުގެ ބަޔަކާ އެކު ސޮއިކޮށްފައިވާނެ ކަމަށާއި ދެއްވަން ބޭނުންފުޅުވާ ޔަގީންކަމަކީ އޭގެ އަމަލީ މަސައްކަތް މި އަހަރު ފަށައި މި ދައުރުގައި ނިންމައިދޭނެ ކަމެވެ.
"އެ 1،000 ހައުސިން ޔުނިޓު މި ރަށުގެ ރައްޔިތުންނާއި އަދި އާބާދީ އާއި ތަރައްގީ އެއްފަސްކުރުމުގެ ސިޔާސަތުގެ ތެރެެއިން އަންނަން ބޭނުންވާނެ ފަރާތްތަކާއި އެކިއެކި ބޭނުންތަކަށް، ކިޔެވުމަށާއި އިގުތިސާދީ ބޭނުންތަކަށާއި ކަންކަމަށް މި ރަށުގައި ގާއިމްވެ ތިބެން ބޭނުންވާ ފަރާތްތަކަށް މިހެން ގޮސް ހުރިހާ ފަރާތްތަކަށް މިއީ ވަރަށް މުހިންމު ސަތޭކަ ޕަސެންޓު ފީޒަބަލް މަޝްރޫއެއް،" ރައީސް ވިދާޅުވި އެވެ.