27 ޖުލައި 2025 - 20:48
ވެލާނާ އިންޓަނޭޝަނަލް އެއާޕޯޓު (ވީއައިއޭ)ގެ އާ ޓާމިނަލް ހުޅުވަން ރޭ އެރުވި ތާރީޚީ ހަވާ ދުނިޔޭގެ ރެކޯޑް ފޮތުން ޖާގަ ހޯދައިފި އެވެ.
ވީއައިއޭ ހިންގާ އެމްއޭސީއެލް އަށް "ގިނިސް ވޯލްޑް ރެކޯޑް ޓައިޓަލް ފޯ ދަ މޯސްޓް ވެނިއުސް ޕާފޯމިން ސައިމަޓޭނިއަސް، ކޮރިއޯގްރާފްޑް ފަޔަވޯކްސް ޑިސްޕްލޭ"ގެ ރެކޯޑުގެ ލިޔުން ހަވާލުކުރީ، އާ ޓާމިނަލުން ހިދުމަތް ދިން ފުރަތަމަ މަތިންދާބޯޓަށް މަރުހަބާ ކިޔުމަށް މިއަދު މެންދުރު ފަހު ބޭއްވި ހާއްސަ ރަސްމިއްޔާތުގަ އެވެ.
އެ ރަސްމިއްޔާތުގައި މި ރެކޯޑްގެ ލިޔުން އެމްއޭސީއެލްގެ ޗެއާޕާސަން ނޫރައިން ޖަނާހުއާ ހަވާލުކޮށްދެއްވީ އެޑްޖޫޑިކޭޓާ ފޯ ގިނިސް ވޯލްޑް ރެކޯޑްސް، އެމްބާލީ އިންކޯސީ އެވެ.
އެމްބާލީ ވިދާޅުވި ގޮތުގައި، މިއީ ގިނިސް ވޯލްޑް ރެކޯޑަށް މުޅިން އަލަށް ތައާރަފުކުރި ރެކޯޑެކެވެ.
މިއީ ވަކިގޮތަކަށް އަރުވަން ރޭވި، އެއް ފަހަރާއި އެއް ވަގުތެއްގައި އެންމެ ގިނަ ސަރަހައްދުތަކުގައި ހަވާ އަރުވައިގެން ލިބުނު ރެކޯޑެވެ. އެ ރެކޯޑް ހާސިލްކުރުމަށް މަދުވެގެން ފަސް ދިމާލެއްގައި އެއް ވަގުތެއްގައި ހަވާ އަރުވަން ޖެހޭ ގޮތަށް އޮތީ ކަނޑައަޅައިފަ އެވެ.
އާ ޓާމިނަލް ހުޅުވަން ރޭ ބޭއްވި ކުލަގަދަ ރަސްމިއްޔާތުގައި ވަނީ އެއްފަހަރާ، މާލެ ސަރަހައްދުގައި ވަށައިގެން 19 ދިމާލެއްގައި ހަ މިނެޓަށް ހަވާ އަރުވައިފަ އެވެ.
އެމްބާލީ ވިދާޅުވީ މި ރެކޯޑް ހާސިލްކުރިކަން ކަށަވަރުކުރުމަށް ގިނިސް ވޯލްޑް ރެކޯޑްސްގެ ފަރާތުން 32 ހެކިވެރިން ހަމަޖެއްސި ކަމަށެވެ. އޭގެ ތެރެއިން 16 ހެކިވެރިންނަކީ ދިވެހި ސިފައިން ކަމަށާއި މި ރެކޯޑް ދިނުމަށް ކަނޑައަޅާފައިވާ ގައިޑްލައިނާ އެއްގޮތަށް ހަވާއެރުވުން ކުރިއަށް ގެންދޭތޯ ބަލަން އޭނާއާ އެކު ސައިޓުގައި އިތުރު ދެ ހެކިވެރިޔަކު ތިބި ކަމަށް ވެސް ވިދާޅުވި އެވެ.
- މަދުވެގެން ފަސް ދިމާލެއްގައި އެއް ވަގުތެއްގައި ހަވާ އަރުވަން ޖެހޭނެ
- ހަވާ އެރުވުން ހުރިހާ ދިމާލެއްގައި ފަށަން ޖެހޭނީ އެއް ވަގުތެއްގައި
- ހުރިހާ ދިމާލަކުން އަރުވާ ހަވާގައި އެއްގޮތް ކަމެއް ހުންނަން ޖެހޭނެ
- މަދުވެގެން ފަސް މިނެޓަށް ހަވާ އަރުވަން ޖެހޭނެ
"ގައިޑްލައިނާ އެއްގޮތަށް ހަވާ އެރުވިކަން އަޅުގަނޑު ކަށަވަރުކޮށްދެން،" އެމްބާލީ ވިދާޅުވި އެވެ.
އެމްބަލީ ވިދާޅުވީ އެމްއޭސީއެލް އަށް މި ރެކޯޑު ހެދުނީ ހަވާ އެރުވި 19 ސަރަހައްދުގެ ތެރެއިން 9 ސަރަހައްދެއްގައި މި ރެކޯޑުގެ ގައިޑްލައިނާ އެއްގޮތަށް ހަވާ އެރުވިފައިވާތީ ކަމަށެވެ.
ރާއްޖޭގައި މިހާތަނަށް ހިންގި އެންމެ ބިޔަ އެއް ޕްރޮޖެކްޓުގެ ނިމުން ފާހަގަކުރުމާ އެކު، އާ ޓާމިނަލް ހުޅުއްވައިދެއްވީ ރާއްޖޭގައި މިހާތަނަށް ބޭއްވި އެންމެ ބޮޑު ޑްރޯން ޝޯ އާއި ހަވާ އެރުވުމާ އެކު، ރައީސް ޑރ. މުހައްމަދު މުއިއްޒެވެ.
އެ ޓާމިނަލްގެ މަސައްކަތް ފެށީ 2016 ވަނަ އަހަރު އެވެ. އެ ޓާމިނަަލަށް ވަނީ 457 މިލިއަން ޑޮލަރު (ހަތް ބިލިއަން ރުފިޔާ) ހޭދަކޮށްފަ އެވެ.