26 ޖުލައި 2025 - 22:39
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އާ ޓާމިނަލްގެ މަސައްކަތުގައި ކުރީގެ ސަރުކާރުތަކުން އަދާކުރި ދައުރު ފާހަގަކުރައްވައި، ކުރީގެ ރައީސް އަބްދުﷲ ޔާމީން އަދި އިބްރާހިމް މުހައްމަދު ސޯލިހު (އިބޫ) އަށް ރައީސް ޑރ. މުހައްމަދު މުއިއްޒު މިރޭ ހާއްސަ ޝުކުރެއް އަދާކުރައްވައިފި އެވެ.
ހަތަރުސަތޭކަ ފަންސާސް ހަތް މިލިއަން ޑޮލަރު (ހަތް ބިލިއަން ރުފިޔާ) ގެ އާ ޓާމިނަލް ރަސްމީކޮށް ހުޅުވަން އެއާޕޯޓުގައި ބޭއްވި ކުލަގަދަ ހަފުލާގައި ރައީސް މުއިއްޒު ފާހަގަކުރެއްވި ގޮތުގައި އެ ޓާމިނަލްގެ މަސައްކަތް ފެށީ ޔާމީންގެ ސަރުކާރުގަ އެވެ. އަދި އިބޫގެ ވެރިކަމުގައި ވެސް އެ މަސައްކަތް އިތުރަށް ކުރިއަށް ގެންދިޔަ ކަމަށް ވިދާޅުވި އެވެ.
"...މި މަސައްކަތް ފެށިގެން އައީ ރައީސް ޔާމީންގެ ވެރިކަމުގައި ކަމުގައި ވާތީ އެ މަނިކުފާނަށާއި އެ އަށް ފަހު ދެން ރައީސް އިބްރާހިމް މުހައްމަދު ސޯލިހުގެ ވެރިކަމުގައި ވާތީ މި ދެ ރައީސުންނަށް އަޅުގަނޑު ވަރަށް ބޮޑަށް ޝުކުރު ދަންނަވަން،" ރައީސް މުއިއްޒު ވިދާޅުވި އެވެ.
"އާދެ މިއީ ދެންމެގައި ރިޕޯޓުންނާއި އަދި އެމްޑީގެ ވާހަކަފުޅުން ވެސް ފާހަގަވި ގޮތުގައި ގާތްގަނޑަކަށް 10 ވަރަކަށް އަހަރުވި މަސައްކަތެއް. ވަރަށް ވެސް ގިނަ ފަރާތްތަކުގެ މިންނެތް ބުރަ މަސައްކަތެއް މީގައި ހިމެނޭ ކަމެއް. ދެ ސަރުކާރެއްގެ ބުރަ މަސައްކަތެއް މީގައި ހިމެނޭ."
މި ސަރުކާރު ހަވާލުވިއިރު، އާ ޓާމިނަލްގެ މަސައްކަތް ކުރިއަށް ގޮސްފައިވާ ދުވެއްޔާއި އެހެން ކަންކަމަށް ބަލާއިރު، މަސައްކަތް ނިމިފައިވާ މިންވަރުގެ ތަފްސީލަށް ވަޑައިގަންނަވަން ބޭނުންފުޅުނުވާ ކަމަށް ރައީސް މިރޭ ވިދާޅުވި އެވެ.
ނަމަވެސް، ރައީސް މުއިއްޒުގެ ވާހަކަފުޅުގެ ކުރިން އެ ރަސްމިއްޔާތުގައި ވާހަކަ ދެއްކެވި، އެމްއޭސީއެލްގެ ސީއީއޯ އަދި މެނޭޖިން ޑިރެކްޓަރު އިބްރާހީމް ޝަރީފް މުހައްމަދު ވިދާޅުވި ގޮތުގައި، މި ސަރުކާރު ހަވާލުވި އިރު، އާ ޓާމިނަލްގައި ނިމިފައިވަނީ އެންމެ 30 ޕަސެންޓު މަސައްކަތެވެ.
އަދި މި ސަރުކާރުން އެންމެ ދޮޅު އަހަރު ދުވަހުގެ ތެރޭގައި 70 ޕަސެންޓު މަސައްކަތް ނިންމައި، އާ ޓާމިނަލް މިރޭ ހުޅުވީ ކަމަށް ޝަރީފް ވިދާޅުވި އެވެ.
ރައީސް ވަނީ ވީއައިއޭގެ އާ ޓާމިނަލްގެ މަސައްކަތް ނިންމުމަށް، ސައުދީ ފަންޑާއި ކުވައިތު ފަންޑާއި އަބޫދާބީ ފަންޑުގެ އިތުރުން އޯޕެކް ފަންޑުން ފޯރުކޮށްދިން މާލީ އެހީތެރިކަމަށް ވެސް ޝުކުރު އަދާކުރައްވައިފަ އެވެ.
ރާއްޖޭގައި މިހާތަނަށް ހިންގި އެންމެ ބިޔަ އެއް ޕްރޮޖެކްޓުގެ ނިމުން ފާހަގަކުރުމާ އެކު، އެތަން ހުޅުއްވައިދެއްވީ ރާއްޖޭގައި މިހާތަނަށް ބޭއްވި އެންމެ ބޮޑު ޑްރޯން ޝޯ އާއި ހަވާ އެރުވުމާ އެކު، ރައީސް މުއިއްޒެވެ.
ޓާމިނަލް ހުޅުވުުގެ ކުރިން ޑްރޯން ޝޯއަކުން ރާއްޖެ އާއި މިނިވަންކަމާ ގުޅޭ އެކި މަންޒަރުތައް ދައްކާލި އެވެ. އަދި މާލެ ވަށައިގެން 19 ދިމާލަކުން ހަވާ އަރުވައި މުޅި އުދަރެސް ކުލަތަކުން ދިއްލައިލި އެވެ.
އެ ޓާމިނަލްގެ މަސައްކަތް ފެށީ 2016 ވަނަ އަހަރު އެވެ.
އާ ޓާމިނަލްގެ ބޭރުން ފެންނަނީ ރާއްޖޭގެ ތާރީހާއި ސަގާފަތާއި ދީނީ ތަރިކަ ރަމްޒު ކޮށްދޭ ހިރިގަލުގެ ފަންނުވެރި ކެނޑުންތަކުންތަކެވެ. ގާތްގަނޑަކަށް 12 ވަރަކަށް ފޫޓުގެ އެ ޓާމިނަލުން ރާއްޖޭގެ ހިތްގައިމު ކަނޑުގެ މަންޒަރުތަކާއި ގުދުރަތީ ރީތި ރަށްތަކުގެ ނަލަ ކަމާއި ކުލަތައް ފެނެ އެވެ. އެ ޓާމިނަލުގެ ކޮންމެ ސަރަހައްދަކުން ވެސް ފެންނާނީ ވިލު ނޫކުލަ އާއި ރާއްޖޭގެ މޫދާއި ރަށްތަކުގެ މަލަމަތިން ފެންނަ ކުލަތަކެވެ.
އާ ޓާމިނަލާ އެކު އެމްއޭސީއެލްގެ އާމްދަނީ ފުރަތަމަ އަހަރު ވެސް 8-7 ޕަސެންޓަށް އިތުރުވެ، ޖެހިގެން އަންނަ އަހަރު 15 ޕަސެންޓަށް އިތުރުވާނެ ކަމަށް އެކުންފުނިން ލަފާކުރެ އެވެ. އެކަން ހާސިލުކުރަނީ، ޕީކް ވަގުތުގައި އިތުރު އެއާލައިންތަކަށް ފުރުސަތު ދެވި، ޑިއުޓީ ފްރީ ފުޅާކޮށްގެންނެވެ.