20 ޖުލައި 2025 - 13:40
ވެލާނާ އިންޓަނޭޝަނަލް އެއާޕޯޓް (ވީއައިއޭ)ގެ އާ ޓާމިނަލް ހުޅުވުމުގެ ހަރަކާތްތައް މާލެ ސަރަހައްދުގައި ބާއްވާ ވަގުތާ ދިމާކޮށް ދޮޅުގަޑިއިރަށް އެ އެއާޕޯޓުގެ ވައިގެ ސަރަހައްދު ބަންދުކުރަން ނިންމައިފި އެވެ.
އެމްއޭސީއެލްގެ ޑެޕިއުޓީ މެނޭޖިން ޑައިރެކްޓަރު މުހައްމަދު ލަމްއާން "މިހާރު" އަށް މިއަދު ވިދާޅުވީ އަންނަ ހޮނިހިރު ދުވަހުގެ ރޭ ވީއައިއޭގެ އާ ޓާމިނަލް ރަސްމީކޮށް ހުޅުވުމުގެ ރަސްމިއްޔާތަށް ފަހުގެ ތައްޔާރީތައް މިހާރު ވަމުން އަންނަ ކަމަށެވެ. އާ ޓާމިނަލް ހުޅުވުމަށް ހޮނިހިރު ދުވަހުގެ ރޭ މާލެ ސަރަހައްދުގައި ކުލަގަދަ ހަރަކާތްތަކެއް ބާއްވަން ނިންމާފައިވާ ކަމަށް އޭނާ ވިދާޅުވި އެވެ.
ލަމްއާން ވިދާޅުވީ އާ ޓާމިނަލް ހުޅުވުމުގެ ރަސްމިއްޔާތުގެ ހަރަކާތްތައް އާންމުން އެއްވެ އުޅޭ ސަރަހައްދުތަކުގައި ސްކްރީން ބަހައްޓައިގެން ބަލައިލެވޭނެ އިންތިޒާމު މާލެ އާއި ވިލިމާލެ އާއި ހުޅުމާލެ އަދި އައްޑޫގައި ވެސް ހަމަޖައްސާނެ ކަމަށެވެ. މާލެއިން އެއާޕޯޓް ފެންނަ ސަރަހައްދު، ސީހައުސް އިން ފެށިގެން ކާނިވާ ސަރަހައްދާ ދެމެދުގައި ހުންނަ ކެފޭތަކުން މި ރަސްމިއްޔާތު ބެލޭނެ އިންތިޒާމު ހަމަޖައްސާނެ ކަމަށް ވެސް އޭނާ ވިދާޅުވި އެވެ.
"ކެފޭތަކުން އަޅުގަނޑުމެން އިންތިޒާމުކުރާ ބުފޭ ލިބޭނެ. ވަކި ކުއެންޓިޓީއަކަށް ހުންނާނެ ބުފޭ ހަމަޖައްސާފައި،" އޭނާ ވިދާޅުވި އެވެ.
ހުޅުމާލޭގެ ސެންޓްރަލް ޕާކާއި އައްޑޫގައި ވެސް އެ ރޭ ހާއްސަ ޝޯއެއް ބާއްވަން ވަނީ ނިންމައިފަ އެވެ. އަދި ހިޔާ ފްލެޓް ސަރަހައްދުގައި ވެސް ސްކްރީނެއް ބަހައްޓައިގެން މި ރަސްމިއްޔާތު ދައްކާނެ އެވެ.
ލަމްއާން ވިދާޅުވި އާ ޓާމިނަލް ހުޅުވުމުގެ ރަސްމިއްޔާތު ބާއްވާ ގަޑީގައި ދަތުރުކުރާ ފަސިންޖަރުންނަށް ހާއްސަ އިންތިޒާމުތަކެއް ވެސް ހަމަޖައްސާފައިވާ ކަމަށެވެ.
"އެ ގަޑީގައި ފުރަން އަންނަ މީހުން ޕޮލިސް ޗެކް ޕޯސްޓާ ހިސާބުން އަޅުގަނޑުމެންގެ ވެހިކަލްއަކަށް ޓްރާންސްފާ ކޮށްގެން ޓާމިނަލަށް ގެންދާ ގޮތަށް ވަނީ ހަމަޖައްސައިފައި. އާންމު އުޅަނދުތަކަށް އެ ވަގުތު އެއާޕޯޓަށް ނުވަދޭނެ،" އޭނާ ވިދާޅުވި އެވެ.
"[ރޭގަނޑު] 8:30 އިން 10:00 އަށް އެއީ ނޯ-އެއާ ޓައިމް [ވައިގެދަތުރުތައް މެދުކަނޑާލާ ވަގުތު]. އެއާލައިންތަކުން އެ ކަންކަން ހަމަޖައްސާނެ."
ލަމްއާން ވިދާޅުވި ގޮތުގައި، ވައިގެ ސަރަހައްދު ދޮޅުގަޑިއިރަށް ބަންދުކުރި ނަމަވެސް، ފްލައިޓްތަކުގެ ޗެކިން މެދުކަނޑާނުލައި ކުރިއަށް ގެންދާނެ އެވެ. އަދި އެ ރޭ 7:00 އިން ފެށިގެން ޗެކިން ވުމަށް ދާ ފަސިންޖަރުން ޕޮލިސް ޗެކް ޕޯސްޓާ ހިސާބުން ޓާމިނަލަށް ގެންދާނީ އެމްއޭސީއެލްގެ ވެހިކަލްތަކުގައި ކަމަށް އޭނާ ވިދާޅުވި އެވެ.
"އާންމުންނަށް ފުރުމުގައި އެއްވެސް ދަތިކަމެއް ކުރިމަތި ނުވާނެ ގޮތަށް އިންތިޒާމުތައް ހަމަޖައްސާނަން،" އޭނާ ވިދާޅުވި އެވެ.
ވީއައިއޭގެ އާ ޓާމިނަލްގެ މަސައްކަތް ސައުދީ ބިންލާދިން ގްރޫޕާ ދިވެހި ސަރުކާރުން ހަވާލުކުރީ 2016 ވަނަ އަހަރު އެވެ. ފަސިންޖަރުންގެ ޓާމިނަލް 78،000 އަކަ މީޓަރުގެ ބޮޑު ސަރަހައްދެއްގައި އިމާރާތްކޮށްފައިވާ މި ޓާމިނަލުން އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭނެ އެވެ.
ޕްރޮޖެކްޓަށް ގެނައި ބަދަލުތަކާ އެކު، މި ޓާމިނަލަށް ގާތްގަނޑަކަށް 600 މިލިއަން ޑޮލަރު (9.2 ބިލިއަން ރުފިޔާ) ހަރަދުކުރި ކަމަށް އެމްއޭސީއެލުން ބުނެފައިވެ އެވެ.
ވީއައިއޭގެ އާ ޓާމިނަލް އަންނަ ހޮނިހިރު ދުވަހު ހުޅުވަނީ ރާއްޖޭގެ މިނިވަން ކަމަށް 60 އަހަރު ފުރޭ މުނާސަބަތާ ވެސް ދިމާކޮށެވެ.
އެ ޓާމިނަލް ހުޅުވާ ރަސްމިއްޔާތަށް ރާއްޖޭގެ ކުރީގެ ހުރިހާ ރައީސުންނަށް ދައުވަތު ދޭން ވެސް އެމްއޭސީއެލުން ވަނީ ނިންމައިފަ އެވެ.