17 ޖުލައި 2025 - 10:35
އއ. މާޅޮހުގައި ބޮޑެތި އަނިޔާތަކެއް ދީ، މަރާލި އަބްދުއްރަހުމާން އާދަމްގެ ހަށިގަނޑުގެ ޕޯސްޓްމޯޓަށް ހެދުމަށް އަންނަ ހަފުތާގައި އިންޑިއާ އަށް ފޮނުވައިލަން ހަމަޖެހިފައިވާ ކަމަށް ފުލުހުން މިއަދު ބުނެފި އެވެ.
އެ ރަށު އޯކިޑްމާގޭ އުމުރުން 65 އަހަރުގެ އަބްދުއްރަހުމާން ނިދާފައި އޮއްވައި އޭނާގެ ބޮލަށް ބޮޑެތި އަނިޔާތަކެއް ދީފައި އޮއްވައި ފެނުނީ ގޭގައި ނިދާފައި އޮއްވައި މިދިޔަ ހޮނިހިރު ދުވަހުގެ ރޭ ދަންވަރު އެކެއް ޖަހާކަންހާއިރު އެވެ.
ސިއްހީ މަރުކަޒަށް ގެންގޮސް ފަރުވާ ދެމުން އަންނަނިކޮށް އެ ރޭ ފަތިހު އަބްދުއްރަހުމާން ވަނީ މަރުވެފަ އެވެ.
ފުލުހުން މިއަދު ބުނީ އަބްދުއްރަހްމާންގެ ހަށިގަނޑު ޕޯސްޓްމޯޓަމް ހަދަން، އަންނަ ހޯމަ ދުވަހު އިންޑިއާގެ ޓްރެވިންޑްރަމަށް ފޮނުވާލަން ނިންމާފައިވާ ކަމަށެވެ. އޭނާގެ ހަށިގަނޑުގެ އިތުރު ތަހުލީލު ކުރުމަށާއި ޕޯސްޓްމޯޓަމް ހެދުމަށް އިންޑިއާ އަށް ފޮނުވައިލުމަށްޓަކައި މާލެ ގެނައީ މިދިޔަ އާދިއްތަ ދުވަހު އެވެ.
އަބްދުއްރަހުމާންގެ މަރާ ގުޅޭ ގޮތުން ރަށުގައި އެކި ގޮތްގޮތަށް ވާހަކަ ދައްކަމުން އައި ނަމަވެސް އޭނާގެ މަރާ ގުޅޭ އެއްވެސް ހެއްކެއް ފެނުނު ކަމަކަށް ފުލުހުން އަދި ނުބުނެ އެވެ. އަބްދުއްރަހުމާނަށް ހަމަލަދީފައި އޮއްވައި ފެނުނުތާ 2-3 ގަޑިއިރުގެ ތެރޭގައި ފުލުހުންގެ ޓީމެއް މާޅޮހަށް ގޮސް ވަނީ އޭނާ ދިރިއުޅުނު މާހިޔަގެ ހުންނަ ސަރަހައްދު ބަންދުކޮށްފަ އެވެ. އެ މަރަށް ހަފުތާއެއް ވާން އުޅޭއިރު އަދިވެސް އެ ގެ އާއި ގެ ހިމެނޭ ސަރަހައްދު ފުލުހުން ވަނީ ބަންދުކޮށްފަ އެވެ.
ފުލުހުން ވަނީ އަބްދުއްރަހުމާނަށް ހަމަލަދީފައި ވަނިކޮށް އެ ގެ އަށް ވަން އެންމެންގެ އިނގިއްޔާއި ފައިގެ ނިޝާން ނަގައިފަ އެވެ. އަދި އެކި މީސްމީހުންނާ ސުވާލު ކުރުން މިހާރު ވެސް އެ ރަށުގައި ކުރިއަށް އެބަގެންދެ އެވެ.