14 ޖުލައި 2025 - 09:23
ރޭ ބޮޑުތަކުރުފާނު މަގުގައި 17 އަހަރުގެ ކުއްޔަކު ނިޔާވި ނުރައްކާތެރި އެކްސިޑެންޓުގައި އަނިޔާވި 40 އަހަރުގެ މީހާއަށް ފަރުވާދެނީ ވެންޓިލޭޓަރުގައި ކަމަށް އައިޖީއެމްއެޗުން ބުނެފި އެވެ.
އެކްސިޑެންޓުގައި އަނިޔާވި 40 އަހަރުގެ މީހާ އަކީ ބާރު ސްޕީޑުގައި ދުއްވާފައި ދިޔަ ސައިކަލުން ޖެހުނު މީހާ އެވެ. އޭނާ ގައިގައި ސައިކަލުން ޖެހެނީ ކަސްރަތަށް ދުވަމުން ގޮސް، މާފަންނު ބަސް ޓާމިނަލް ކައިރީ އޮތް ޒިބްރާ ކްރޮސްއިން މަގުގެ އަނެއް ފަރާތަށް ދާން ދުއްވައިގަތް ވަގުތު ސައިކަލުން ޖެހިގެންނެވެ.
ރޭ 8:00 ހާއިރު ހިނގި އެ އެކްސިޑެންޓުގައި ނިޔާވީ ސައިކަލު ދުއްވަން އިން 17 އަހަރުގެ ޔޫސުފް އަލްސަން މުހައްމަދެވެ. އޭނާ އަކީ ލަވަކިޔުންތެރިޔާ މަރިޔަމް އަޝްފާ އާއި މުހައްމަދު އަބްދުލް ޣަނީ (ތޭރަވާ)ގެ ހަމަ އެކަނި ދަރިފުޅެވެ.
އައިޖީއެމްއެޗްގެ މީޑިއާ އޮފިޝަލަކު މިއަދު "މިހާރު" އަށް ބުނީ 40 އަހަރުގެ މީހާގެ ހާލު ސީރިއަސްކަމުން ފަރުވާދެނީ ވެންޓިލޭޓަރުގައި ކަމަށާއި 16 އަހަރުގެ ކުއްޖާއަށް އިމަޖެންސީގައި ފަރުވާ ދިނުމަށް ފަހު މިހާރު ވޯޑަށް ބަދަލުކޮށްފައިވާ ކަމަށެވެ.
އެކްސިޑެންޓުގައި ޒަހަމްވި މީހާ އާއި ކުއްޖާއަށް ލިބިފައިވާ އަނިޔާތަކުގެ ތަފްސީލެއް ހޮސްޕިޓަލަކުން ނުދެ އެވެ.
ނިޔާވި ކުއްޖާގެ ޖަނާޒާ އާ ސަހަރާގައި މިއަދު އަސްރު ނަމާދަށް ފަހު ބާއްވަން ވަނީ ނިންމައިފަ އެވެ.