21 މާޗް 2017 - 12:33
އަދާލަތު ޕާޓީގެ ރައީސް އިމްރާން އަބްދުﷲގެ މައްޗަށް އިއްވާފައިވާ 12 އަހަރުގެ ޖަލު ހުކުމުގެ އިސްތިއުނާފު ޝަރީއަތް ހައި ކޯޓުން މިއަދު ނިންމާލައިފި އެވެ.
މޭ، 2015 ގައި އިދިކޮޅު ފަރާތްތަކުން ބޭއްވި މުޒާހަރާގައި ހަމަނުޖެހުމަށް ހިތްވަރު ލިބޭ ގޮތަށް ވާހަކަ ދެއްކެވި މައްސަލާގައި ޓެރަރިޒަމްގެ ކުށް ސާބިތުވެ، އިމްރާން ޖަލަށް ލާން ކްރިމިނަލް ކޯޓުން ކުރި ހުކުމް އިސްތިއުނާފްކުރަން އޭނާގެ ފަރާތުން ހުށަހެޅި މައްސަލައިގެ އަޑުއެހުންތައް ކުރިން އޮތީ ނިންމާލައިފަ އެވެ. ނަމަވެސް އެ މައްސަލަ ބައްލަވާ ފަނޑިޔާރުންގެ ބެންޗަށް ބަދަލު އައިސްފައިވާތީ މިއަދު ބޭއްވީ އިޖްރައާތު ފުރިހަމަކުރުމުގެ އަޑުއެހުމެކެވެ.
އަޑުއެހުންތައް ނިމިފައި ވަނިކޮށް، ފަނޑިޔާރުންގެ ބެންޗަށް ބަދަލެއް އަތުވެއްޖެ ނަމަ އިތުރު އަޑުއެހުމެއް އާންމު އުސޫލުން ބާއްވާނެ އެވެ.
އިމްރާންގެ މައްސަލަ ބައްލަވާ ބެންޗުގައި ރިޔާސަތު ބަލަހައްޓަވަނީ އިސް ފަނޑިޔާރު އަބްދުﷲ ދީދީ އެވެ. އެ ބެންޗުގައި ދެން ތިއްބަވަނީ ފަނޑިޔާރު އަބްދުﷲ ހަމީދާއި ފަނޑިޔާރު އަބްދުއްރައޫފް އިބްރާހިމެވެ.
ފަނޑިޔާރުންގެ ބެންޗުން ބުނީ މި މައްސަލާގައި އިތުރު ކަމެއް ސާފުކުރަން ނުޖެހިއްޖެ ނަމަ ދެން އޮނާނީ ހުކުމް އިއްވުމުގެ ޝަރީއަތް ކަމަށެވެ. އެހެންވެ، ޝަރީއަތުގައި އޮތީ ދެ ފަރާތުގެ ހުލާސާ ބަޔާން އިއްވުމެވެ.
އިމްރާންގެ ވަކީލު ހުސްނުއްސުއޫދު ވަނީ އިމްރާންގެ މައްޗަށް އިއްވި ޖަލު ހުކުމަކީ ގާނޫނުއަސާސީގައި ހުރި މާއްދާތަކާ ހިލާފަށް ކުރި ހުކުމެއް ކަމަށް ވިދާޅުވެފަ އެވެ. އެ ގޮތުން ކްރިމިނަލް ކޯޓުން އިމްރާންގެ މައްޗަށް ކުރި ހުކުމް ބާތިލް ކުރަން ޖެހޭ 12 ނުކުތާއެއް އޭނާ ފާހަގަކުރެއްވި އެވެ. ހާއްސަކޮށް ކްރިމިނަލް ކޯޓުން ހުކުމް ކުރީ ހެކިން ހާޒިރު ކުރުމެއް ނެތި ކަމަށް އޭނާ ވިދާޅުވި އެވެ.
ދައުލަތުން މިއަދު ކޯޓުގައި ވާހަކައެއް ނުދައްކަ އެވެ.
އިމްރާން ޖަލަށް ލާން ހުކުމް ކުރިޔަސް މިދިޔަ އަހަރުގެ މެދު ތެރެއިން ފެށިގެން މިއަދާ ހަމައަށް ވެސް އޭނާ ހުންނަވަނީ ގޭ ބަންދުގަ އެވެ. އޭނާ ގޭ ބަންދަށް ބަދަލުކުރީ ޖަލުގައި މަރާމާތެއް ކުރަމުންދާ ކަމަށް ބުނެ އެވެ.